ជីវិតកម្សាន្ដ
សំណាង! ក្រោយម៉ូតូចាស់ត្រូវគេលួច ជៀស ស្រួច បានទទួលម៉ូតូថ្មីសន្លាង១គ្រឿង ពីលោកឧកញ៉ា ឡេង ប្រុស
ដោយក្ដីអាណិតអាសូរ លោកឧកញ៉ា ឡេង ប្រុស ដែលជាបងបង្កើតរបស់អ្នកឧកញ៉ា ឡេង ណាវ៉ាត្រា បានឧបត្ថម្ភម៉ូតូ Dream ឆ្នាំ២០២១ថ្មីសន្លាង១គ្រឿង ដល់អតីតកីឡាករប្រដាល់ ជៀស ស្រួច បន្ទាប់ពីលោកបានទទួលដំណឹងថា ម៉ូតូចាស់ និងជាក្ដីសង្ឃឹមរបស់អតីតកីឡាករប្រដាល់រូបនេះ ត្រូវបានជនសង្ស័យលួចយកទៅ។
ពិធីប្រគល់ និងទទួលម៉ូតូជាអំណោយរបស់លោកឧកញ៉ា ឡេង ប្រុស ត្រូវបានធ្វើឡើងរវាងលោក ហេង ឡុង ប្រធានសមាគមសិល្បៈស្ម័គ្រចិត្តជួយសង្គមតំណាងម្ចាស់ជំនួយ ជាមួយសាមីខ្លួនជនរងគ្រោះ ជៀស ស្រួច នៅការិយាល័យអង្គភាពសារព័ត៌មាន តារាញ៉ូវស៍ នាព្រឹកថ្ងៃទី២៧ ខែកញ្ញា ឆ្នាំ២០២១នេះ។
បើតាមប្រធានសមាគមសិល្បៈស្ម័គ្រចិត្តជួយសង្គមលោក ហេង ឡុង បានឲ្យដឹងថា ក្រោយទទួលដំណឹងពីអតីតកីឡាករប្រដាល់លោក ជៀស ស្រួច ត្រូវបានជនសង្ស័យលួចយកម៉ូតូកាលពីពេលថ្មីៗនេះ ហើយខ្វះខាតមធ្យោបាយធ្វើដំណើរប្រកបរបរចិញ្ចឹមគ្រួសារនោះ លោកឧកញ៉ា ឡេង ប្រុស ក៏បានកើតការអាណិតអាសូរចំពោះអតីតកីឡាកររូបនេះ និងបានពឹងពាក់ឲ្យលោកជួយសម្របសម្រួលកិច្ចការនេះ។
ម្យ៉ាងទៀត លោកឧកញ៉ាយល់ឃើញថា ម៉ូតូជាមធ្យោបាយធ្វើដំណើរដ៏សំខាន់ សម្រាប់ការប្រកបរបរចិញ្ចឹមជីវិត ហើយប្រសិនបើអតីតកីឡាករ ជៀស ស្រួច ទៅធ្វើការរកស៊ីដោយជិះម៉ូតូឌុប ឬកង់បីជាដើម ប្រហែលជាត្រូវចំណាយច្រើន ដែលនឹងធ្វើឲ្យជួបការលំបាកផ្នែកជីវភាពកាន់តែខ្លាំង។
លោក ហេង ឡុង មានប្រសាសន៍ថា៖ “ខ្ញុំគិតថា គាត់(ជៀស ស្រួច) នឹងមានទឹកចិត្តឡើងវិញ។ នៅពេលគាត់មានទឹកចិត្ត អាចប្រឹងប្រែងធ្វើការងារបង្កើនចំណូលសម្រាប់ជីវភាពរបស់គាត់ ខ្ញុំជឿថា គាត់មានជីវភាពល្អប្រសើរជាងមុន”។
ទោះបីជាយ៉ាងណា ប្រធានសមាគមលោក ហេង ឡុង បានបង្ហាញក្ដីសង្ឃឹមមុតមាំថា ក្រោយទទួលបានម៉ូតូមួយគ្រឿងនេះ ពីសប្បុរសជនហើយ អតីតកីឡាករ ជៀស ស្រួច នឹងយកទៅប្រើប្រាស់ ក្នុងន័យដើម្បីស្ដារជីវភាពឲ្យបានល្អប្រសើរ ដោយប្រកបរបរត្រឹមត្រូវស្របច្បាប់ និងធ្វើយ៉ាងណាថែរក្សាឲ្យបាន ជៀសវាងការបាត់បង់ម្ដងទៀត ដែលធ្វើឲ្យសប្បុរសជន បាត់បង់ទំនុកចិត្ត ក្នុងការបន្តជួយ។
ក្នុងឱកាសនោះ អតីតកីឡាករ ជៀស ស្រួច បានបង្ហាញក្ដីរំភើបរីករាយ ដែលបានទទួលអំណោយម៉ូតូមួយគ្រឿងថ្មីសន្លាងពីលោកឧកញ៉ា ឡេង ប្រុស សម្រាប់ជាមធ្យោបាយធ្វើដំណើរ និងប្រកបរបររកស៊ីចិញ្ចឹមគ្រួសារទៅទៀត បន្ទាប់ពីម៉ូតូចាស់ដែលជាក្ដីសង្ឃឹមតែមួយគត់ ត្រូវបានជនសង្ស័យជាអ្នកស្គាល់រាប់អានគ្នាលួចយកទៅ។ លោក ជៀស ស្រួច បានឆ្លើយតបថា៖ “ខ្ញុំមិនធ្លាប់នឹកស្មានដល់ទេ និងអស់សង្ឃឹមខ្លាំងណាស់! ប៉ុន្តែខ្ញុំពិតជារំភើបរីករាយណាស់ ដែលបានលោកឧកញ៉ា ឡេង ប្រុស មានទឹកចិត្តសប្បុរសធម៌បានឧបត្ថម្ភម៉ូតូ១គ្រឿងនេះដល់ខ្ញុំ។ ខ្ញុំនឹងខិតខំថែរក្សាវាឲ្យបានល្អទុកជាកេរដំណែលតទៅ និងតាំងចិត្តខិតខំធ្វើការងារប្រកបរបរចិញ្ចឹមជីវិតឲ្យបានប្រសើរ”។
គួររំលឹកផងដែរថា កាលពីថ្ងៃទី១៨ ខែកញ្ញា ឆ្នាំ២០២១ កន្លងទៅនេះ កីឡាករប្រដាល់គុនខ្មែរលោក វង្ស ណយ បានប្រកាសនៅលើបណ្ដាញសង្គមរបស់ខ្លួនធ្វើបង្កឲ្យមានការភ្ញាក់ផ្អើលយ៉ាងខ្លាំង ខណៈដែលខ្លួនត្រូវបានបុរសម្នាក់ ដែលជាអ្នកដឹកងៀតក្របី លួចយកម៉ូតូចំនួនពីរគ្រឿង និងលុយលក់ងៀតក្របីមួយចំនួន។ ក្នុងចំណោមម៉ូតូ២គ្រឿងនោះ ក៏មាន១គ្រឿងជារបស់អតីតកីឡាករ ជៀស ស្រួច ដែលជាមធ្យោបាយដឹកងៀតក្របីទៅឲ្យអតិថិជន។
ទោះបីជាយ៉ាងណា ជនសង្ស័យដែលបានបោកយកម៉ូតូរបស់កីឡាករ វង្ស ណយ និងអតីតកីឡាករ ជៀស ស្រួច ទៅនោះ ត្រូវបានសមត្ថកិច្ចស្ទាក់ចាប់បាននៅស្រុកមោងឬស្សី ខេត្តបាត់ដំបង កាលពីថ្ងៃទី២៣ ខែកញ្ញា ឆ្នាំ២០២១កន្លងទៅនេះ៕
-
ព័ត៌មានអន្ដរជាតិ៩ ម៉ោង agoធ្លាក់យន្តហោះឯកជនមួយនៅអាមេរិក បណ្តាលឱ្យមនុស្សក្នុងយន្តហោះ ស្លាប់ទាំងអស់
-
កីឡា៥ ថ្ងៃ agoល្ងាចនេះ U19 កម្ពុជា ប៉ះ ថៃ វគ្គពាក់កណ្តាលផ្តាច់ព្រ័ត្រ ខណៈជួបគ្នាចុងក្រោយ ថៃ ខកចិត្តម្តងហើយ
-
ព័ត៌មានអន្ដរជាតិ៣ ថ្ងៃ agoឥណ្ឌា តវ៉ាយ៉ាងខ្លាំង ចំពោះអាមេរិកដែលវាយប្រហារនាវាដឹកប្រេងបណ្តាលនាវិកឥណ្ឌា ៣នាក់ស្លាប់
-
អត្ថាធិប្បាយ៥ ថ្ងៃ agoវិចារណកថាចក្ខុវិស័យកែទម្រង់យោធាកម្ពុជា៖ ពីកម្លាំងបរិមាណ ឆ្ពោះទៅកងទ័ពជំនាញឌីជីថល និងមនសិកាការពារជាតិ
-
ព័ត៌មានអន្ដរជាតិ៦ ថ្ងៃ agoអាមេរិក បើកការវាយប្រហារអ៊ីរ៉ង់ ថ្មីទៀត ដើម្បីសងសឹក ចំពោះការធ្លាក់ឧទ្ធម្ភាគចក្រ Apache
-
ព័ត៌មានអន្ដរជាតិ៥ ថ្ងៃ agoអាមេរិក បើកការវាយប្រហារទ្រង់ទ្រាយធំជាថ្មី លើអ៊ីរ៉ង់ ខណៈទីក្រុងតេហេរ៉ង់ សងសឹកវិញ ហើយបិទច្រក Hormuz ទៀត
-
ព័ត៌មានជាតិ២ ថ្ងៃ agoរោងចក្រផលិតជីក្រុមហ៊ុន ម៉ុង ឫទ្ធី ចាយទុនប្រមាណ ១០ លាន នឹងចាប់ផ្តើមផលិតចែកចាយលក់ក្នុងតម្លៃទាប ជួយកសិករដាំដុះដំណាំកសិកម្ម
-
ព័ត៌មានអន្ដរជាតិ២ ថ្ងៃ agoពូទីន៖ រុស្ស៊ីតែម្នាក់ឯង ត្រូវប្រយុទ្ធជាមួយ លោកខាងលិចទាំងមូល ក្នុងសង្គ្រាមនៅ អ៊ុយក្រែន