ផលិតករ​ភាព​យន្ត​ខ្មែរ​លើកដៃ​អង្វរ​ឲ្យ​ពលរដ្ឋងាក​មកគាំទ្រ​ភាពយន្ត​ក្នុង​ស្រុក​ជំនួស​ភាពយន្ត​បរទេស

ផលិតករភាពយន្តខ្មែរ លោក ហ៊ុយ យ៉ាឡេង អង្វរសុំឲ្យប្រជាពលរដ្ឋខ្មែរ​ដែល​និយមតាមដាន​ទស្សនាភាពយន្តបរទេស​ងាកមកគាំទ្រភាពយន្តខ្មែរដែលផលិតនៅក្នុងស្រុកវិញ។ ការលើកឡើងរបស់អ្នកដឹកនាំរឿងរូបនេះ នៅចំពេលដែលស្នាដៃថ្មីរបស់លោក គឺរឿងគ្រោះ​ជីវិតកូវីដ១៩ គ្រោងនឹងដាក់សម្ពោធជាផ្លូវការនាពេលឆាប់ៗនេះ។

ក្នុងសន្និសីទសារព័ត៌មាននៅព្រឹកថ្ងៃទី១២ ខែឧសភានេះ លោក ហ៊ុយ យ៉ាឡេង បានឲ្យដឹងថា នៅក្នុងកំឡុងពេលនៃការរីករាលដាលនៃជំងឺកូវីដ១៩ វិស័យភាពយន្តខ្មែរបានធ្លាក់ចុះយ៉ាងគំហុក។ ទន្ទឹមនឹងការធ្លាក់ចុះនេះដែរ លោកសង្កេតឃើញថា ប្រជាជនខ្មែរភាគច្រើនបានទស្សនា និងគាំទ្រ​ភាពយន្តបរទេស ដែលជាហេតុធ្វើឲ្យភាពយន្តក្នុងស្រុក​កាន់តែបាត់បង់នូវចំនួន​គាំទ្រជាបន្តបន្ទាប់។

ផលិតករភាពយន្តរូបនេះបន្តថា សម្រាប់ការប្រឹងប្រែងរបស់លោកនាពេលកន្លងមក គឺលោកចង់​ឃើញ​វិស័យភាពយន្តនៅកម្ពុជាមានការរីកចម្រើន និងចង់ឃើញប្រជាជនខ្មែរ មិនថាក្មេង ចាស់ ប្រុស ស្រីនោះទេ នាំគ្នានិយម និងឲ្យតម្លៃខ្សែភាពយន្តខ្មែរឲ្យដូចការនិយម និងទស្សនាចំពោះ​ខ្សែភាព​យន្តបរទេសក្នុងពេលបច្ចុប្បន្ន។

លោក ហ៊ុយ យ៉ាឡេងបញ្ជាក់ថា៖ «ជាឆន្ទៈរបស់ខ្ញុំគឺខ្ញុំចង់ឃើញ​ភាពយន្តនៅកម្ពុជាមាន​ការរីក​ចម្រើន ខ្ញុំសូមសំណូមពរឲ្យប្រជាពលរដ្ឋខ្មែរ ងាកមកគាំទ្រភាពយន្តខ្មែរឡើងវិញ ដូចការទស្សនា​ភាពយន្តបរទេស ពិព្រោះផលិតករភាពយន្តខ្មែរមានអ្នកធ្វើល្អ និងអ្នកធ្វើមិនល្អ ដូចនេះសូមបងប្អូន​ជួយគាំទ្រអ្នកដែលធ្វើល្អ ដើម្បីឲ្យពួកគាត់មានកម្លាំងចិត្តក្នុងការផលិតបន្តទៀត»។

បើតាមអ្នកដឹកនាំរឿងរូបនេះ អ្នកគាំទ្រវិស័យភាពយន្តនៅកម្ពុជាបច្ចុប្បន្នភាគច្រើនសុទ្ធតែជាយុវវ័យ ដូចនេះការផ្ដោតតែទៅលើមនុស្សមួយក្រុមនោះ គឺមិនមែនជាការចង់បានរបស់លោកនោះ​ទេ។

លោកបន្ថែមថា ដើម្បីលើកស្ទួយវិស័យភាពយន្តរបស់កម្ពុជាបាន លុះត្រាតែមាន​ការឲ្យតម្លៃ និងចូលរួមពីសំណាក់មនុស្សគ្រប់វ័យ និងគ្រប់ស្រទាប់វណ្ណៈដូចឆ្នាំ១៩៥៤​ដែលជាយុគ​មាស​នៃវិស័យសិល្បៈភាពយន្តខ្មែរ ទើបវិស័យមួយនេះអាចដើរទន្ទឹម ឬមានការរីកចម្រើន​ស្មើនឹង​ភាពយន្ត​បរទេសដែលកំពុងវាយលុកទីផ្សារក្នុងស្រុក។

គួរបញ្ជាក់ថា ក្នុងរយៈពេលជាងពីរឆ្នាំមកនេះ វិស័យសិល្បៈនៅកម្ពុជា​មានការធ្លាក់ចុះស្ទើគ្រប់​ទម្រង់ដោយ​សារ​វិបត្តិ​កូវីដ១៩ ដោយសារតែការបិទខ្ទប់ និងហាមប្រាមមិនឲ្យមានការ​ប្រមូល​ផ្ដុំកម្សាន្ត​តសប្បាយនៅតាមទីប្រជុំជន។

ក្នុងនោះវិស័យភាពយន្ត បានរងផល់ប៉ះពាល់ជាខ្លាំង ដោយសារតែរោងបញ្ចាំងភាពយន្តទាំងអស់បានបិទ ផលិតករនិងអ្នកវិនិយោគលើវិស័យ​នេះជា​ច្រើនមិន​ហ៊ានចំណាយដើមទុនក្នុងការផលិត ចំណែកឯតារាសម្ដែងវិញក៏មិនហ៊ានមកសម្ដែងផ្ទាល់ ដោយខ្លាចមានការឆ្លងជំងឺកូវី១៩ជាដើម៕

អត្ថបទ៖ លន់ សេនី