កីឡា

សហព័ន្ធកីឡាជឺជីតស៊ូកម្ពុជា ដំណើរការបាន ៧០% ហើយត្រៀមធ្វើជាម្ចាស់ផ្ទះការប្រកួតជើងឯកអាស៊ីអាគ្នេយ៍លើកទី៥

បានផុស

៤ នាទី មុន

នៅ

ថ្ងៃសុក្រ ១០ កក្កដា ២០២៦

ដោយ

សហព័ន្ធកីឡាជឺជីតស៊ូកម្ពុជា គិតមកដល់ពេលនេះដំណើរការបានប្រហែល ៧០% ហើយដែលសម្រេចបានលើការត្រៀមខ្លួនធ្វើជាម្ចាស់ផ្ទះការប្រកួតជ្រើសរើសជើងឯកអាស៊ីអាគ្នេយ៍ លើកទី៥ អំឡុងខែសីហា ឆ្នាំ ២០២៦ នៅឯខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សំអុន បូរមី

លោក សំអុន បូរមី អគ្គលេខាធិការសហព័ន្ធកីឡាជឺជីតស៊ូកម្ពុជាបានឲ្យដឹងថា បើគិតមកដល់ពេលនេះសហព័ន្ធសម្រេចការងារបានប្រហែល ៧០% ហើយលើការងារត្រៀមខ្លួនក្នុងនាមជាម្ចាស់ផ្ទះព្រឹត្តិការណ៍ប្រកួតកីឡាជឺជីតស៊ូជ្រើសរើសជើងឯកអាស៊ីអាគ្នេយ៍ លើកទី៥ ឆ្នាំ២០២៦។

សហព័ន្ធបានត្រៀមមន្ត្រីបច្ចេកទេស អាជ្ញាកណ្ដាល ចៅក្រម កីឡាករ កីឡាការិនី រួមទាំងក្រុមការងារផ្សេងៗទៀតប្រហែល ១៧០ ទៅ ១៨០នាក់។ បច្ចុប្បន្ននេះសហព័ន្ធបានជ្រើសរើសយកទីតាំងសណ្ឋាគារសុខាសៀមរាប សម្រាប់ជាកន្លែងស្នាក់នៅរបស់កីឡាករ កីឡាការិនីផង និងជាកន្លែងសម្រាប់ធ្វើការប្រកួតផងដែលនេះជាភាពងាយស្រួលផ្នែកទៀត។

ទិដ្ឋភាពប្រកួតជឺជីតស៊ូកន្លងទៅ

អគ្គលេខាធិការរូបនេះបន្ថែមទៀតថា ប្រទេសដែលបានផ្ដល់ដំណឹងថានឹងចូលរួមការប្រកួតនេះមានប្រមាណ ៨ប្រទេសមកហើយ ខណៈប្រទេសមួយចំនួនក៏បានបញ្ជាក់ពីចំនួនកីឡាករ កីឡាការិនីទៀតផង។ នៅពេលនេះសហព័ន្ធកំពុងដំណើរការការចុះបញ្ជីឈ្មោះកីឡាករ កីឡាការិនីដែលនឹងត្រូវលេងលើប្រភេទវិញ្ញាសា ប្រភេទទម្ងន់ និងបន្តការចុះឈ្មោះនេះរហូតដល់សប្ដាហ៍ទី២ នៃខែសីហា ឆ្នាំ២០២៦ ឯណោះ។

ទិដ្ឋភាពប្រកួតជឺជីតស៊ូកន្លងទៅ

ថ្នាក់ដឹកនាំខាងលើលើកឡើងទៀតថា ការងារផ្សេងៗនោះគឺសឹងតែរួចរាល់ទាំងស្រុងទៅហើយមិនថាការងាររដ្ឋបាលទំនាក់ទងជាមួយអាជ្ញាធរ ភាគីពាក់ព័ន្ធ ឯកសារផ្សេងៗបានបញ្ជូនរួចហើយ និងរង់ចាំការឆ្លើយបតមកវិញប៉ុណ្ណោះ។ ប្រសិនបើមិនមានអ្វីប្រែប្រួលនោះទេគឺរង់ចាំតែដំណាក់កាលចុងក្រោយនាំយកសម្ភារផ្សេងទៅទីតាំងផ្ទាល់ និងរៀបចំទីលានប្រកួតជាក់ស្ដែងតែប៉ុណ្ណោះ។

ក្រុមកីឡាជឺជីតស៊ូកម្ពុជា

បញ្ជាក់ដែរថា សហព័ន្ធកីឡាជឺជីតស៊ូកម្ពុជា គ្រោងនឹងរៀបចំការប្រកួតជ្រើសរើសជើងឯកអាស៊ីអាគ្នេយ៍ លើកទី៥ (5th Southeast Asia Regional Championships 2026) អំឡុងថ្ងៃទី២១ ដល់ ២៣ ខែសីហា ឆ្នាំ២០២៦ នៅឯសណ្ឋាគារសុខា ខេត្តសៀមរាប។ ប្រទេសដែលបញ្ជាក់ថានឹងមកចូលរួមមាន ៨ ហើយ និងសរុបចំនួនកីឡាករ កីឡាការិនីចុះឈ្មោះបឋមមានខ្ទង់ ៣០០នាក់ផងដែរ៕