មុនគ្រងមកុដ​ បវរកញ្ញាចក្រវាលថៃ Anna ធ្លាប់ឆ្លងកាត់សង្វៀនសម្រស់តាំងពីមិនទាន់ពេញវ័យ

កន្លងទៅជិត ៣ខែហើយ ដែលបវរកញ្ញា Anna Sueangam-iam បានក្លាយជាម្ចាស់មកុដ Miss Universe Thailand 2022 ស្របពេលលដែលប្រវត្តិរបស់បវរកញ្ញារូបនេះ ប្រិយមិត្តកម្ពុជាថ្មី​ទំនងជាបានដឹងខ្លះៗ​ជាក់ជាមិនខាន។

មុនពេលគ្រងតំណែងជាម្ចាស់ក្សត្រីសម្រស់ ​MUT នាងជាក្មេងស្រីម្នាក់ដែលមានប្រវត្តិជូរចត់មកពីគំនរសំរាម និងធំធាត់ឡើងដោយសារបាយវត្ត។ ប៉ុន្តែដោយសារមានក្ដីសុបិនធំ Anna ប្រឹងជម្នះរាល់ឧបសគ្គ រហូតដណ្ដើមបានជោគជ័យ ក្លាយជាអ្នកគ្រងមកុដ Miss Universe Thailand 2022 កាលពីចុងខែកក្កដា កន្លងទៅថ្មីៗនេះ។

យ៉ាងណាមិញ ​មុនពេលគ្រងតំណែង MUT គឺកំលុង ៨ឆ្នាំមុន ពោលពេលនាងមានអាយុទើបតែ ១៥ឆ្នាំ នាងធ្លាប់ចូលរួមប្រកួតកម្មវិធី “Miss Teen Thailand 2014” ប៉ុន្តែកាលណោះមិនទទួលបានពានរង្វាន់ណាមួយឡើយ។

ទោះយ៉ាងណា ​នាង​នៅតែ​បន្ត​តស៊ូ​លើ​វិថី​​សម្រស់ ដើម្បីឈោងចាប់ក្តីសុបិនទាល់តែបានសម្រេច។ ក្នុងឆ្នាំ២០១៨ ​បវរកញ្ញា Anna បានចូលរូមប្រកួតកម្មវិធី “Miss Mobile Thailand 2018” រហូតដល់ទទួលបានតំណែងឯក ហើយនៅឆ្នាំ ២០២០ នាងចូលរួមប្រកួតនៅលើឆាក “Miss Tin Thai Ngam” ដោយទទួលបានជយលាភីរងទី២។ លុះមកដល់ឆ្នាំ ២០២២ នាងដាក់ពាក្យប្រកួតកម្មវិធី Miss Universe Thailand ហើយទទួលបានតំណែង​ឯក ក្លាយជារាជិនីសម្រស់គ្រងមកុដ MUT ដោយជោគជ័យ៕

ប្រែសម្រួល៖ សន្យា

ចុចអាន៖ បវរកញ្ញាចក្រវាលថៃ ២០២២ មានប្រវត្តិចេញពីគំនរសំរាម និងធំធាត់ឡើងដោយសារបាយវត្ត

ចុចអាន៖ Bella Ranee សង្វាតធ្វើបុណ្យទាន ក្រោយនៅខ្លួនមួយ