Kourtney និង Travis ទើបតែទិញផ្ទះលំហែមួយកន្លែងនៅក្បែរឆ្នេរសមុទ្រ រដ្ឋ California កាលពីឆ្នាំទៅ ខែតុលា ក្នុងតម្លៃ ១៤,៥លានដុល្លារ ពីលោក Conan O’Brien ។ ស្រាប់តែម្សិលមិញជាថ្ងៃទី១២ ខែមករា ផ្ទះអ្នកទាំងពីរត្រូវព្យុះស៊ីក្លូនគ្រាប់បែកវាយប្រហារតែម្ដង ។

តំបន់ដែលរងគ្រោះដោយសារព្យុះមិនមែនមានតែផ្ទះតារាស្រី Kourtney ម្នាក់ទេ នៅមានផ្ទះរបស់ Ashton Kutcher និង Mila Kunis ទៀត ។ ក្រៅពីនេះគេសង្កេតឃើញថា ទឹកជំនន់ឡើងដល់លើយានដ្ឋានឡានហើយ សូម្បីតែផ្លូវចេញចូលក៏ត្រូវគ្របដណ្ដបដោយដីភក់ដែរ នាំឲ្យពិបាកក្នុងការប្រើប្រាស់យានជំនិះដើម្បីធ្វើដំណើរ ។ ជាមួយគ្នានេះដែរ មិនមាននរណាដឹងឡើយថាអ្នកទាំងពីរនៅក្នុងផ្ទះអំឡុងពេលព្យុះឬអត់ ចំណែកឯសភាពក្នុងផ្ទះយ៉ាងណានោះក៏មិនទាន់ដឹងដូចគ្នា ។

ផ្ទះខាងលើមានទំហំ ២,១០០ ហ្វីតការ៉េ បន្ទប់គេង ២ និងបន្ទប់ទទួលភ្ញៀវ ២ បំពាក់គ្រឿងបរិក្ខារច្រើនទៀតរួមមាន យ៉រការពារសំឡេង យានដ្ឋានឡានពីរដែលមានស្ថានីយ៍សាកថ្ម Tesla និងកន្លែងអាំងសាច់ដ៏ធំទូលាយមួយ ។ ចំណុចពិសេសរបស់ផ្ទះលំហែដដែលនេះគឺមានកន្លែងអង្គុយមើលទេសភាពសមុទ្រ និងជណ្ដើរផ្ទាល់ខ្លួនសម្រាប់ចុះទៅលេងសមុទ្រទៀតផង ។

សូមបញ្ជាក់ដែរថា ទោះបីជាទើបតែរៀបការថ្មីថ្មោងក្ដី ប៉ុន្តែអ្នកទាំងពីរមិនសូវនៅផ្ទះជាមួយគ្នាទេ គ្រាន់តែមានរស់នៅក្នុងសង្កាត់តែមួយប៉ុណ្ណោះ ៕

ប្រែសម្រួលដោយ ៖ វារី

ចុចអាន ៖ មកស្គាល់ផ្ទះតារាហូលីវូដ ៧ ដួង ធ្លាប់រស់នៅកាលពីវ័យក្មេង