ជនជាតិវៀតណាម ដែលធ្វើឱ្យប៉ះពាល់កិត្តិយសខ្មែរ ថា ឥឡូវ​ចេះ​តែ ២​ម៉ាត់ប៉ុណ្ណោះ “​សុំទោសកម្ពុជា”

Hứa Quốc Anh អ្នកផលិតមាតិកាជនជាតិវៀតណាមមួយរូប ដែលផ្សព្វផ្សាយវីដេអូធ្វើឱ្យប៉ះពាល់ដល់កិតិ្តយសកម្ពុជា បានបង្ហាញការដឹងខុសជាថ្មីម្តងទៀត ក្រោយត្រូវបានសារព័ត៌មានក្នុងស្រុក-ក្រៅស្រុក វាយប្រហារជាបន្តបន្ទាប់ និងរងការខឹងសម្បារយ៉ាងខ្លាំងពីសំណាក់ប្រជាជនកម្ពុជា។

តាមរយៈការផុសផ្សាយឃ្លីបខ្លី២ Hứa Quốc Anh បាននិយាយពាក្យសុំទោសជាភាសារខ្មែរ ហើយសរសេរ​ថា “Tôi xin Lỗi Campuchia” ដែលមានន័យថា “សុំទោសចំពោះកម្ពុជា” នៅលើកទី១ ហើយប៉ុន្មានម៉ោងមុននេះ បានសម្តែងការដឹងខុសម្តងទៀត ដោយសរសេរថា “ឥឡូវ​ ខ្ញុំចេះ​តែ ២​ម៉ាត់ប៉ុណ្ណោះ សុំទោស🇰🇭” ។

ក្រោយអ្នកផលិតមាតិកាលើបណ្តាញទំនាក់ទំនងសង្គម Tik Tok រូបនេះ បានធ្វើឱ្យប៉ះពាល់ដល់កម្ពុជា ឥឡូវនេះ គណនី Tik Tok របស់លោកដែលមានអ្នកតាមដានជាង 700K នោះ ក៏បានបាត់ចេញពីកម្មវិធី បណ្តាញទំនាក់ទំនងសង្គមល្បីនេះបាត់ហើយដែរ។

គួររំលឹកថា Hứa Quốc Anh បានផុសផ្សាយវីដេអូមួយ ដែលខ្លួនបានថតនៅក្នុងបរិវេណ ប្រាសាទអង្គរវត្ត កម្ពុជា តែបែរជាប្រើពាក្យថា Hello Thailand និងបង្ហាញរូបទង់ជាតិថៃ ព្រមនឹងរូបព្រះមហាក្សត្រថៃទៅវិញ ដែលនេះ ជាចេតនាធ្វើឱ្យភាន់ច្រឡំ ដល់ពិភពលោកយ៉ាងជាក់ច្បាស់។ ទង្វើនេះ មិនត្រឹមតែធ្វើឱ្យសង្គមកម្ពុជា ខឹងសម្បារប៉ុណ្ណោះទេ សូម្បីសារព័ត៌មានក្នុងស្រុករបស់វៀតណាម ក៏បានចុះផ្សាយពីអកប្បកិរិយាមិនគប្បី និងគាំទ្រចំពោះបុគ្គលរូបនេះផងដែរ។

បើតាមការចុះផ្សាយរបស់សារព័ត៌មាន tuiriviu បានរៀបរាប់ថា “សកម្មភាពរបស់បុគ្គលរូប​នេះ ​មិន​ត្រឹម​តែ​បំពាន​លើ​បទប្បញ្ញត្តិ​របស់​ប្រាសាទ​ប៉ុណ្ណោះ​ទេ ​ថែម​ទាំង​ធ្វើ​ឱ្យ​ខូច​កិត្តិយស​ជាតិ និង​ជាតិ​សាសន៍​ របស់​ប្រជាជន​កម្ពុជា​ទៀត​ផង។ ដូចដែលដឹងហើយថា កម្ពុជា និងថៃ ធ្លាប់មានជម្លោះវប្បធម៌ និងប្រវត្តិសាស្ត្រ ជាច្រើន តែបុគ្គលរូបនេះ បែរជាមានចេតនាសាងរូបភាពនេះឡើង។ ក្រោយមានរិះគន់ពីប្រជាជនកម្ពុជា ភ្លាមៗ Hua Quoc Anh មិនត្រឹមតែមិនសុំទោស និងកែប្រែទេ បែរជាអះអាងបន្ថែមថា កាលដែលលោកធ្វើបែបនេះ ក៏ដោយសារ “មិនចូលចិត្តកម្ពុជា”។ ទង្វើនេះ មិនត្រឹមតែមិនគោរពចំពោះប្រទេសដទៃប៉ុណ្ណោះទេ តែកំពុងបង្ហាញថា tiktoker ម្នាក់នេះ គ្មានសីលធម៌។

ប្រភពដដែលបញ្ជាក់ទៀតថា “នេះមិនមែនជាលើកទីមួយទេ ដែល Hua Quoc Anh បង្កបញ្ហាឱ្យសង្គម មនុស្សខឹងសម្បារ។ បុគ្គលនេះ ក៏ធ្លាប់បានចូលរួមសកម្មភាពនៃការរើសអើងវប្បធម៌ ផ្សព្វផ្សាយព័ត៌មានមិនពិត អំពីសាសនាផ្សេងៗ និងទង្វើមិនគោរពនៅកន្លែងទីសក្ការៈផ្សេងៗផងដែរ។ ​ច្រើនលើកច្រើនសារហើយ ដែល Hua Quoc Anh ​ត្រូវ​បាន​បណ្តេញ​ចេញ​ពី​តំបន់​ដែលខ្លួនជ្រកកោន បន្ទាប់ពីប្រព្រឹត្តទង្វើខុសឆ្គងទាំងនោះ។

គួរបញ្ជាក់ថា តាមរយៈគណនីបណ្តាញទំនាក់ទំនងសង្គមហ្វេសប៊៊ុក Hứa Quốc Anh បុគ្គលរូបនេះ បានបង្ហាញការសោកស្តាយចំពោះបាត់បង់គណនី Tik Tok របស់ខ្លួន និងបានសុំទោសប្រជាជនកម្ពុជា ជាថ្មីម្តងទៀត កាលពី ៤ម៉ោងមុននេះ ដោយភ្ជាប់ជាមួយវីដេអូ reaction មួយ និងសរសេរថា “ឥឡូវ​ ខ្ញុំ​ចេះ​តែ​២​ម៉ាត់ប៉ុណ្ណោះ ​សុំទោស” ៕