ល្អហួស តាំងចិត្តមិនយកស្នេហាក្នុងវ័យសិក្សាឡើយ និងបន្តពង្រឹងសមត្ថភាព ធ្វើអ្វីជាប្រយោជន៍សង្គមជាតិថ្ងៃមុខ

បវរកញ្ញាវ័យក្មេង ជូរី ល្អហួស បានចេញមកសន្យាទៅមហាជននិងអ្នកគាំទ្ររបស់ខ្លួនថា ស្ថិតនៅក្នុងវ័យកំពុងសិក្សាគឺ ដាច់ខាត់នាងមិនបណ្តោយខ្លួន ពាក់ព័ន្ធរឿងស្នេហាឡើងហើយអ្វីដែលតាំងចិត្តនោះតាមរយ:ការពង្រឹងសមត្ថភាពខ្លួនឯងឲ្យកាន់តែខ្លាំងដើម្បីចូលរួមជួយសង្គមជាតិនិងប្រជាជនកម្ពុជា។

ប្រាកដណណាស់កន្លងមកក្នុងនាមកូនខ្មែរមួយរូប ជូរី ល្អហួស តែងបានបង្ហាញការប្តេជ្ញាចិត្តដើម្បីចូលរួមផ្សព្វផ្សាយលើកស្ទួយនូវមរតកវប្បធម៌ រួមនឹងទេសចរណ៍ទៅលើឆាកជាតិឆាកអន្តរជាតិឱ្យនៅគង់វង្សយូរអង្វែង សម្រាប់កូនខ្មែរជំនាន់ក្រោយបានស្គាល់នូវអ្វីដែលជារបស់ខ្មែរ។

ម្ចាស់មកុដ Miss Preteen Junior Idol World 2024 ជូរី ល្អហួស បានលើកឡើងពីការតាំងចិត្តរបស់ខ្លួនថា “នាងខ្ញុំមិនយកស្នេហាចូលខ្លួននៅក្នុងវ័យសិក្សានោះទេ នាងខ្ញុំត្រូវតែពង្រឹងសមត្ថភាពរបស់ខ្លួនឯង ឱ្យកាន់តែខ្លាំងព្រោះ នាងខ្ញុំត្រូវធ្វើរឿងជាច្រើនទៀតដើម្បីប្រទេសជាតិ និងប្រជាជនកម្ពុជានៅថ្ងៃខាងមុខ“។

ទន្ទឹមនឹងការលើកឡើងនេះ អ្នកគាំទ្រមួយចំនួនបានកោតសរសើរពីឆន្ទ:របស់យុវតីវ័យក្មេងរូបនេះ ដែលបានបង្ហាញពីគំរូល្អសម្រាប់យុវជន ក៏ដូចជាអ្នកផ្សេងៗទៀត ក្នុងនាមជាកូនខ្មែរដែលជាទំពាំងស្នងឬស្សី មានឧត្តមគតិគិតគូរដល់សង្គមជាតិ។

មកទល់ពេលបច្ចុប្បន្ននេះ ម្ចាស់មកុដបរវកញ្ញាយុវតីកម្ពុជាឆ្នាំ២០២៣ ជូរី ល្អហួស ដែលដណ្តើមបានមកុដ Miss Preteen Junior Idol World 2024 ត្រូវបានទស្សនិកជនកត់សម្គាល់ឃើញថា នាងពិតជាមានភាពលេចធ្លោខ្លាំងទាំងរូបសម្ផស្សនិងការងារសិល្ប: ពិសេសថែមទៀត គឺការងារសង្គមជាដើម។ ទង្វើនេះត្រូវបានមហាជនមួយចំនួនធំបានសម្តែងការគាំទ្រ និងសរសើរគ្រប់ៗគ្នា៕ អត្ថបទ៖ ចាន់រ៉ា