ទោះជោគជ័យបន្តបន្ទាប់! ល្អហួស នៅតែបន្តដុះខាត់សមត្ថភាពជានិច្ច ដើម្បីទៅកាន់ដំណែងម្ចាស់មកុដបន្ទាប់ទៀត

ឆ្លងកាត់ការប្រកួតវិស័យបវរកញ្ញាទាំងនៅក្នុងស្រុក និងនៅលើឆាកអន្តរជាតិ បវរកញ្ញាវ័យក្មេង ជូរី ល្អហួស បានធ្វើការចែករំលែកបទពិសោធនខ្លួនថា គ្រប់ការប្រកួតនៅលើឆាកបវរកញ្ញា អ្នកដែលមានសមត្ថភាពខ្លាំង គឺជាម្ចាស់មកុដហើយអ្វីដែលសំខាន់យើងក៏ត្រូវពង្រឹងសមត្ថភាពខ្លួនឯង។

ជាបទពិសោធ អតីតម្ចាស់មកុដ Miss Preteen Junior Idol World 2024 យុវតី ជូរី ល្អហួស បានឲ្យដឹងថារាល់បេក្ខភាពចូលរួមប្រកួតគឺសុទ្ធសឹងតែសម្លឹងមើលមកុដជាធំ ទាំងនាងទាំងបេក្ខភាពផ្សេងៗទៀត ខណៈនាងមិនដែលមើលងាយគូរប្រកួតថាគេអន់ឬខ្សោយជាងខ្លួននោះឡើយ។

ល្អហួស បានបញ្ជាក់ថា “រឿងដែលសំខាន់បំផុតនោះ គឺខ្ញុំត្រូវដុះខាត់សមត្ថភាពរបស់ខ្លួនឯងបន្ថែម ប៉ុន្តែបើសមត្ថភាពអ្នកផ្សេងខ្លាំងជាងខ្ញុំ និងទទួលបានមកុដធំព្រោះសមត្ថភាពគាត់ខ្លាំងម្ចាស់កម្មវិធីនិង គណ:កម្មការសុក្រឹតណាស់ពួកគាត់ជ្រើសរើសបេក្ខភាពណា ដែលមានសមត្ថភាពខ្លាំង ស័ក្តិសមនឹងគ្រងមកុដ ប៉ុន្តែបើសិនជាងនាងខ្ញុំមិនទទួលបានជោគជ័យ នៅក្នុងឆ្នាំនេះ ចាត់ទុកថាវាជាមេរៀនដែលនាងខ្ញុំកំពុងតែអាន ប៉ុន្តែមិនទាន់ដល់ចំណុចបញ្ចប់”។

ជូរី ល្អហួស បានបន្តថា ជាបទពិសោធមួយនៃជំហ៊ានជីវិត ដែលនាងយកវាមកកែប្រែដើម្បីទទួលបានចំណុចល្អៗដើម្បីយកទៅអភិវឌ្ឍន៍ចំណុចខ្លាំង និងកែប្រែភាពខ្វះខាតដែលនាងបានជួបពីមុនយកទៅបំពេញនិងបង្ហាញនៅឆ្នាំណាមួយដែលគិតថា ស័ក្តិសម ជាមួយនិងសមត្ថភាពរបស់ខ្លួន។

បន្ថែមពីនេះ ជូរី ល្អហួស បញ្ជាក់ដែរថា ឈ្នះមកុដក្នុងប្រទេស ឈ្នះមកុដក្រៅប្រទេសគឺទទួលបានក្តីស្រលាញ់ពិតប្រាកដ និងភាពកក់ក្តៅពីប្រជាជនកម្ពុជា រំដួលដែលមានក្លិនក្រអូបទោះជាទៅដល់ទីណាក៏នៅ តែមានក្លិនក្រអូប និងមានអ្នកផងចោមរោមចូលចិត្តស្រលាញ់ក្លិនផ្កាកម្ពុជា៕ ចាន់រ៉ា