ល្អហួស ប្រកាសជូនសំបុត្រអ្នកគាំទ្រវិស័យបវរកញ្ញា ២០០សន្លឹក ខណៈកំពុងត្រៀមខ្លួនប្រកួត MTC ខែក្រោយ

ក្នុងឱកាសចូលរួមប្រកួតប្រជែងសម្រស់ និងសមត្ថភាពជាថ្មីម្តងទៀត ម្ចាស់​មកុដ​ Miss Preteen International Cambodia 2023 យុវតី ជូរី ល្អហួស បាន​ប្រកាស​ជូនសំបុត្រទស្សនាកម្មវិធី Miss Teen Cambodia ដែលគ្រោងរៀបចំនៅខែក្រោយនេះ ចំនួន ២០០សំបុត្រ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្មានឆ្នាំលើវិស័យបវរកញ្ញា ជូរី ល្អហួស ត្រូវបានមហាជនទទួលស្គាល់ថា ជាបេក្ខភាពបវរកញ្ញាវ័យក្មេងពេញដោយសមត្ថភាព មិនថារូបសម្រស់ លក្ខណៈសម្បត្តិ និងចរិយាសម្បត្តិ បេក្ខភាពបវរកញ្ញាវ័យក្មេងរូបនេះ តែងតែមានភាពលេចធ្លោមិនធម្មតា ទាំងក្នុងការប្រកួតសម្រស់ ក៏ដូចជាកិច្ចការក្នុងសង្គមជាដើម។

កន្លងទៅថ្មីៗនេះ ល្អហួស ទើបតែធ្វើឱ្យមហាជនផ្ទុះការកោតសរសើរ ជាមួយនឹងការបង្ហាញ វត្តមានក្នុងកម្មវិធី រំលឹកចំណងមិត្តខ្មែរចិន « Dream of Winter Global promotional campaign » ផងដែរ។ ក្នុងឱកាសនោះ ល្អហួស បានបង្ហាញឡើងឆាកកម្មវិធីច្រៀងចម្រៀងភាសាចិន ជាមួយឈុតតំណាងជាតិថែមទៀតផង។

គួររំលឹកថា ថ្មីៗនេះ បេក្ខភាពបវរកញ្ញាពេញដោយសមត្ថភាព វ័យ ១៦ឆ្នាំ ជូរី ល្អហួស ទើបតែធ្វើឱ្យមហាជនមោទនភាពចំពោះខ្លួន ដែលបានឈររាំរបាំក្នុងឈុតបុរាណខ្មែរ ដោយបាតជើងទទេរលើកម្រាលព្រំស្តើងក្រាលផ្ទៃព្រិល ក្រោមសីតុណ្ហភាពត្រជាក់ឥតឧបមា ក្នុងន័យដើម្បីជាការផ្សព្វផ្សាយវប្បធម៌ខ្មែរនៅប្រទេសចិន។

ជាមួយនឹងសកម្មភាពនេះ ល្អហួស ត្រូវបានមហាជន ក៏ដូចជាសិល្បករសិល្បការិនី បានបញ្ចេញកោតសរសើរព្រោងព្រាត នូវការបង្ហាញរូបភាពដ៏ល្អប្រពៃរបស់យុវតីរូបនេះ ដែលស៊ូទ្រាំនឹងអាកាសធាតុត្រជាក់ដល់ -0 អង្សារសេ ឈររាំពន់ពែនរស់រវើកជាមួយនឹងរបាំដ៏ស្រស់ផូរផង់ បង្ហាញអត្តសញ្ញាណជាតិ៕