ស៊ីន យូប៊ីន បារម្ភភាពយន្តខ្មែរធ្លាក់ចុះ ខណ:តារាជើងចាស់ រ៉េតរ៉ូស សង្ឃឹមផលិតករស្តាកុនខ្មែរឡើងវិញ

តារាសម្តែងស្រីល្បីឈ្មោះកញ្ញា ស៊ីន យូប៊ីន កាលពីថ្មីៗនេះបានចេញមុខសម្តែងការព្រួយបារម្ភរបស់ខ្លួនដោយភ័យក្លាចវិស័យភាពយន្តរបស់ខ្មែរបច្ចុប្បន្នមានការធ្លាក់ចុះព្រោះតែសន្ទុះនៃការគាំទ្រពីសំណាក់ទស្សនិកជនហាក់មិនសូវឱ្យតម្លៃលើភាពយន្តជាតិ ។

តារាសម្តែងស៊ីន យូប៊ីនបាននិយាយថាតាមការសង្កតនាពេលសព្វថ្ងៃវិស័យភាពយន្តរបស់ខ្មែរហាក់កំពុងប្រឈមនឹងការធ្លាក់ចុះដោយហេតុថាវាបានធ្លាក់ក្នុងស្ថានភាពមួយដែលពុំសូវមានអ្នកទស្សនា។ នាងបន្តថាបើក្រឡេកទៅមើលតាមទូរទស្សន៍វិញស្ទើរតែទាំងស្រុងគឺលែងសូវមានអ្នកមើលតែម្តង។

កញ្ញា ស៊ីន យូប៊ីនបាននិយាយទៀតថា មូលហេតុនេះហើយទើបនាងមានក្តីព្រួយបារម្ភនិងស្នើរដល់មហាជនក៏ដូចជាពលរដ្ឋខ្មែរគួរងាកនាំអ្នកមកគាំទ្រវិស័យភាពយន្តខ្មែរយើងផង ហើយសូមបងប្អូនកុំលែងដៃចោលឱ្យសោះ។ ម្យ៉ាងព្រោះតែលំហូរចូលនៃភាពយន្តបរទេសច្រើនទើបធ្វើឱ្យការគាំទ្រវិស័យភាពយន្តយើងធ្លាក់ចុះ។

នាងថាកន្លងមកគឺឃើញថា ទស្សនិកជនយើងក៏មានការគាំទ្រច្រើនគួរសមចំពោះវិស័យភាពយន្តខ្មែរ ដែលធ្វើឱ្យតារាសម្តែង និងផលិតករមានទឹកចិត្តខិតខំប្រឹងពង្រឹងសមត្ថភាពទាំងការសម្តែងនិងផលិត។ ដូច្នេះហើយសូមមេត្តាកុំបោះបង់ចោលភាពយន្តជាតិយើងដោយនាំគ្នាគាំទ្រឡើងវិញផង។

ទន្ទឹមគ្នានៃការលើកឡើងរបស់ ស៊ីន យូប៊ីន ខាងលើងាកមកតារាសម្តែងជើងចាស់អ្នកស្រី រ៉េត រ៉ូស បានបញ្ចេញទស្សន:ដោយលើកឡើងថាបានអី្វរឹងមាំមកពីផលិតករម្នាក់ហ្នឹងជំពាក់លុយតួរាប់ភ្លេចហើយហ្នឹងដល់គេលែងទៅថតឱ្យកាត់សុីនចោលបានអីមានគុណភាព។

តារាសម្តែងជើងចាស់រូបនេះបន្ថែមថា អ្នកស្រីសង្ឃឹម ថាមានផលិតករល្អៗនឹងរួមគ្នាមកស្តាកុនយើងលើងវិញឆាប់ៗផងដែរ។ ចំណែកលោក លៀក លីដា ដែលជាផលិតករនិងថៅកែផលិតកម្ម LD កាលពីថ្មីៗនេះដែរ បានបញ្ចេញទស្សន:ដោយយល់ឃើញថា វិស័យភាពយន្តជាតិនឹងដើរថយក្រោយក្នុងឆ្នាំ២០២៥នេះ៕ អត្ថបទ៖ ចាន់រ៉ា