រឿងជាតិ ជារឿងទាំងអស់គ្នា! រាជិនីក្រមា អំពាវនាវឱ្យរក្សាចិត្តត្រជាក់ និងជឿជាក់លើរាជរដ្ឋាភិបាល

តារាសម្តែងមានងារជារាជិនីក្រមា កញ្ញា មាន សូនីតា បានចេញមុខអំពាវនាវដោយទទួចប្រជាជនខ្មែរគ្រប់រូប បន្តរក្សាចិត្តឱ្យត្រជាក់ និងទុកចិត្តជឿជាក់លើថ្នាក់ដឹកនាំ ដែលជាប្រមុខរាជរដ្ឋាភិបាលរបស់កម្ពុជា។

តារាស្រីរូបស្រស់កញ្ញា មាន សូនីតា បានឱ្យដឹងថា នាងពិតជាមានមោទនភាពក្នុងនាមជាកូនខ្មែរ ពេលមានរឿងទើបដឹងថាខ្មែរក្រោកហើយ ប្រទេសយើងខ្លាំង ព្រោះប្រជាជនយើងខ្លាំង។ នាងបន្តថា នាងសូមជូនពរបងប្អូនពលករខ្មែរដែលត្រលប់មកកម្ពុជាវិញ គឺធ្វើដំណើរទៅស្រុកកំណើតប្រកបដោយសុខសុវត្ថិភាព មិនតែប៉ុណ្ណោះ គ្រប់យ៉ាងរាជរដ្ឋាភិបាលយើងលោកយកចិត្តទុកដាក់ និងបានរៀបចំជូនបងប្អូនរួចជាស្រេច ទាំងមធ្យោបាយធ្វើដំណើរ និងឱកាសការងារ។

មាន សូនីតា បានបញ្ជាក់ថា”ខ្ញុំសូមអំពាវនាវឱ្យបងប្អូនខ្មែរទាំងអស់រក្សាចិត្តឱ្យត្រជាក់ និងទុកចិត្តនិងជឿជាក់លើថ្នាក់ដឹកនាំដែលជាប្រមុខរាជរដ្ឋាភិបាលរបស់យើង មិនតែប៉ុណ្ណោះគឺយើងរួមគ្នាបន្តសហការគ្នា សាមគ្គីគ្នាក្នុងការគាំទ្រទៅដល់បងៗទាហានជួរមុខបន្តទៀត មិនថាជាថវិកាក្ដី ឬសម្ភារៈប្រើប្រាស់ចាំបាច់ក្ដី”។

តារាសម្តែងស្រីរូបនេះនិយាយទៀតថា ទោះជាយ៉ាងណា ខ្លួនសូមដឹងគុណយ៉ាងជ្រាលជ្រៅចំពោះទាហានជួរមុខដែលលះបង់ទាំងកម្លាំងកាយនិងកម្លាំងចិត្ត ក្នុងការថែរក្សាឱ្យបាននូវបូរណភាពទឹកដី និងប្រាសាទគ្រប់ប្រាង្គណ៍នៃព្រះរាជាណាចក្រកម្ពុជា។

កញ្ញា មាន សូនីតា បន្ថែមថា “ចំណែករឿងតួថៃដែលមិនល្បីតែតោងចង់បានល្បីតាមរយៈស្ថានការណ៍ជារឿងដែលគ្មានប្រយោជន៍បំផុត ព្រោះនេះជាការបញ្ឆេះកំហឹងជាតិសាសន៍ឱ្យកាន់តែខឹងស្អប់គ្នាកាន់តែខ្លាំង តែនេះយើងពិបាកហាមដែរ ព្រោះសារជាតិជាឈ្លើង គឺឈឺចាប់ពេលដែលគេបេះចេញពីសាច់លែង ឱ្យជញ្ជក់ឈាមហើយត្រូវគេញិចចោលទៀត អ្នកសិល្បៈជ្រុលនិយមបែបហ្នឹងមិនប្រាកដថាទទួលបានការសិក្សាពេញលេញទេយើងក៏មិនគួរឈឺក្បាលហាលថ្ងៃនឹងមនុស្សធន់ហ្នឹងពេកដែរ”៕ ចាន់រ៉ា