ក្រុមតន្ត្រី ភី សុគន្ធី សម្រេចលុបចម្រៀងបែបកន្ទ្រឹមខ្មែរសុរិន្ទ និងប្រកាសលែងប្រើទ្របែបសុរិន្ទលើឆាកតន្ត្រីខ្លួន

ក្រុមតន្ត្រី ភី សុគន្ធី ដែលជាក្រុមតន្ត្រីវង់ភ្លេងបុរាណខ្មែរ បានប្រកាសក្តែងៗថា ចាប់ពីពេលនេះទៅ ក្រុមខ្លួនលែងប្រើទ្របែបសុរិន្ទលើឆាកតន្ត្រីទៀតហើយ ខណៈចម្រៀងបែបកន្ទ្រឹមខ្មែរសុរិន្ទដែលធ្លាប់សម្តែង និងផ្សព្វផ្សាយលើ You Tube Channel កន្លងមក ក៏នឹងត្រូវលុបចេញផងដែរ។

ក្រុមតន្ត្រី ភី សុគន្ធី បានបញ្ជាក់ដល់អ្នកនិយមគាំទ្រតន្ត្រី ភី សុគន្ធី ក៍ដូចជាចូលចិត្តនូវការប្រគុំបទចម្រៀងបែបកន្ទ្រឹមខ្មែរសុរិន្ទ ឱ្យបានជ្រាបថា ចាប់ពីពេលតទៅ ក្រុមតន្ត្រីភី សុគន្ធី នឹងមិនមានការប្រគុំបទចម្រៀងប្រភេទនេះទៀតនោះឡើយ និងបានសង្កត់ធ្ងន់ទៀតថា ចំពោះឧបករណ៍ទ្រ ក៍នឹងមិនមានប្រភេទទ្របែបសុរិន្ទលេីឆាកតន្ត្រីខ្លួនទៀតនោះដែរ ពោលពីពេលនេះទៅ គឺរៀបចំតែឧបករណ៍ទ្រអ៊ូ និង ទ្រសោរ តែប៉ុណ្ណោះ។

ដោយឡែក ចំពោះបទចម្រៀងបែបកន្ទ្រឹមខ្មែរសុរិន្ទដែលក្រុមតន្ត្រី ភី សុគន្ធី ធ្លាប់បាន Uploaded លើ platform YouTube កន្លងមក ក៍និងត្រូវលុបចេញពី Channel របស់ខ្លួនផងដែរ។

ទន្ទឹមនេះ ក្រុមតន្ត្រី ភី សុគន្ធី ក៏បង្ហាញការអរគុណដល់សាធារណជន ដែលជាអ្នកគាំទ្រក្រុមតន្ត្រីរបស់ខ្លួន រយៈពេលជិត២០ឆ្នាំកន្លងមកនេះ។

គួរជម្រាបថា ការសម្រេចចិត្តនេះ គឺបន្ទាប់ពីក្នុងស្ថានការណ៍ដ៏តឹងតែងនៃជម្លោះព្រំដែនរវាងកម្ពុជា-ថៃ ខ្មែរសុរិន្ទដែលមានដូនតាជាខ្មែរ ហើយរស់ក្រោមការកាន់កាប់របស់ថ្នាក់ដឹកនាំថៃជាច្រើនឆ្នាំ វង្វេងជាតិសាសន៍ខ្លួន ព្រួតគ្នាវាយប្រហារកម្ពុជាដោយបំភ្លេចកំណើតដូនតាខ្លួន និងហ៊ានអះអាងមិនខ្មាសថា “ខ្លួនជាថៃសុរិន្ទ មិនមែនខ្មែរឡើយ”។ ពិសស តារាចម្រៀងសុរិន្ទ ឈ្មោះ ឃុង ឃុយ ចេញប្រកាសលើកទឹកចិត្តកងទ័ពសៀមនៅខេត្តសុរិន្ទ ដោយបញ្ជាក់ថា កងទ័ពថៃនៅខេត្តសុរិន្ទ អាចទៅហូបចុកនៅហាងខ្លួនបាន៕