មិនមែនអ្នកគាំទ្រលំៗ! G Devith ធ្លាប់និពន្ធចម្រៀង « I Love GD »

តាមរយៈបទសម្ភាសក្នុងកម្មវិធីថ្មីមួយជាមួយ Artika តារាចម្រៀងរ៉េបល្បីឈ្មោះ G Devith បានលើកឡើងពីផ្នត់គំនិតរបស់ខ្លួនក្នុងវិស័យតន្ត្ត្រីចម្រៀងរ៉េប និងបានលាតត្រដាងការពិតមួយដែលមិនសូវមានអ្នកបានដឹងថា លោកជាអ្នកស្រលាញ់គាំទ្រតារា K-PoP ល្បីរបស់កូរ៉េខាងត្បូង G Dragon រហូតដល់និពន្ធនិងច្រៀងបទ “I Love GD” ។ តែទោះជាយ៉ាងណា G Devitht មិនធ្លាប់មានចម្រៀងលំនាំ G Dragon មួយបទណានោះឡើយ។

ជាច្រើនឆ្នាំមកនេះ មហាជនដែលជាអ្នកគាំទ្រលោក ងួន ចាន់ដេវីដ សុទ្ធតែបានជ្រាបថា តារារ៉េបជួរមុខកម្ពុជារូបនេះ ជាអ្នកគាំទ្រ GD ខ្លាំងកម្រិតណា រហូតឈ្មោះក្នុងសិល្បៈរបស់លោកសព្វថ្ងៃ ក៏មានទំនាក់ទំនងនឹង GD ផងដែរ។ ប៉ុន្តែអ្វីដែលប្លែកអារម្មណ៍ សម្រាប់អ្នកគាំទ្រទំនងជាមិនសូវបានដឹងឭពាក់ព័ន្ធនឹងចម្រៀងមួយបទដែល G Devith និពន្ធឡើងសម្រាប់ GD នោះឡើយ។

មួយបទនេះ G Devith សរសេរឡើងតាំងពីលោកមិនទាន់មានឈ្មោះក្នុងសិល្បៈមកម្ល៉េះ។ លោកថា ជំនាន់នោះ លោកធ្វើបទតាមរយៈ Web Cam និងប្រើភ្លេងផ្សំគ្នាពី YouTube ហើយបើទោះជាការចាប់ផ្តើមរបស់លោកហាក់រោករ៉ាកបន្តិចមែន ប៉ុន្តែលោកពិតជាស្រលាញ់ចម្រៀងរ៉េប។

ជាមួយគ្នានេះ G Devith បានឱ្យដឹងដែរថា លោកចាប់អារម្មណ៍នឹងវិស័យរ៉េប ចាប់តាំងពីជំនាន់ក្រុមចម្រៀង ខ្មែររ៉េបប៊យ និង APING ជាង១០ឆ្នាំមុនមកម្ល៉េះ រហូតដល់លោកមានក្តីស្រមៃបង្កើតក្រុមចម្រៀងផ្ទាល់ខ្លួនឡើង។ សូមស្តាប់វីដេអូលម្អិត៖

ពីក្តីស្រមៃរហូតក្លាយជាការពិត ក្នុងដំណើរឆ្លងកាត់ឧបសគ្គជាច្រើន ទម្រាំមានកេរ្តិ៍ឈ្មោះដូចសព្វថ្ងៃ លោក ងួន ចាន់ដេវីត បានគូសបញ្ជាក់ចំណុចមួយដែលលោកមិនចង់ឱ្យមានលើវិស័យចម្រៀងរ៉េបនោះគឺ “ការចម្លងគ្នា” ដោយបានលើកយកឧទាហរណ៍ជាក់ស្តែងមកបង្ហាញផងដែរ។