លោក ត្រាំ បដិសេធ​ផ្តល់​ឲ្យ​អ៊ុយក្រែននូវមីស៊ីល Tomahawk

ប្រធានាធិបតីអាមេរិក លោក ដូណាល់ ត្រាំ បានបដិសេធផ្តល់ឲ្យអ៊ុយក្រែននូវមីស៊ីល Tomahawk រយៈចម្ងាយឆ្ងាយ ដោយនិយាយថា លោកសង្ឃឹមថានឹងបញ្ចប់សង្រ្គាមជាមួយរុស្ស៊ី​តាមរយៈទំនាក់ទំនងការទូត ដែលជាជំហរផ្ទុយស្រឡះជាមួយនឹងការទទូចរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ដែលថាទីក្រុងមូស្គូ «មិនទាន់ត្រៀមខ្លួន» សម្រាប់សន្តិភាពទេ។

មេដឹកនាំទាំងពីរបានជួបប្រជុំគ្នាជាច្រើនម៉ោងនៅសេតវិមានកាលពីថ្ងៃសុក្រ​ទី​១៧​ខែ​តុលា​។ យោងតាម ​​CNN លោក ត្រាំ បានបញ្ជាក់យ៉ាងច្បាស់​ថា អ៊ុយក្រែននឹងមិនទទួលបានមីស៊ីលរយៈចម្ងាយឆ្ងាយដែលខ្លួនកំពុងស្វែងរក ដើម្បីវាយប្រហារជ្រៅទៅក្នុងទឹកដីរុស្ស៊ីនោះឡើយ។

លោក ត្រាំ បានប្រាប់ជំនួយការបន្ទាប់ពីកិច្ចប្រជុំថា ការផ្តោតអារម្មណ៍នៅពេលនេះគួរតែផ្តោតលើការធានាបទឈប់បាញ់មួយនៅតាមបន្ទាត់សមរភូមិបច្ចុប្បន្ន ដោយលើកឡើងពី«ការបំផ្លិចបំផ្លាញច្រើនពេក និងការសម្លាប់ច្រើនពេក»។ លោក​បានប្រកែកថា «ភាគីទាំងសងខាងត្រូវតែធ្វើកិច្ចព្រមព្រៀង» ដោយឆ្លុះបញ្ចាំងពីការព្រួយបារម្ភកាន់តែខ្លាំងឡើងរបស់​លោកដែលថា ជម្លោះអាចកាន់តែអាក្រក់ក្នុងអំឡុងពេលរដូវរងាដែល​ខិត​ជិតមកដល់​នា​ពេល​ខាង​មុខ។

សារព័ត៍មាន TRT បាន​ចុះ​ផ្សាយ​ថា នៅ​ក្នុ​ង​ថ្ងៃ​ដដែល​នោះ លោក ត្រាំ បាន​បង្ហាញ​ក្ដី​ជឿ​ជាក់​ថា ប្រធានាធិបតីរុស្ស៊ី លោក វ៉្លាឌីមៀរ ពូទីន «ចង់បញ្ចប់សង្រ្គាម» ហើយបាននិយាយថា លោកសង្ឃឹមថានឹងទទួលបានសន្តិភាព មុនពេលអនុម័តអាវុធថ្មីសម្រាប់ទីក្រុងកៀវ។ លោក​បាន​លើក​ឡើង​ថា «សង្ឃឹមថា ពួកគេនឹងមិនត្រូវការវាទេ។ សង្ឃឹមថា យើងនឹងអាចបញ្ចប់សង្រ្គាមដោយមិនគិតពី Tomahawk»។

ទោះជាយ៉ាងណាក៏ដោយ លោក ហ្សេលេនស្គី បានច្រានចោលគំនិតដែលថា ទីក្រុងមូស្គូបានត្រៀមខ្លួនសម្រាប់ការចរចា។ មេដឹកនាំ​អ៊ុយក្រែន​បាន​រៀបរាប់​​ថា​ «​គាត់​មិន​ទាន់​ត្រៀម​ខ្លួន​ទេ​» ដោយ​រក្សា​ថា​​មាន​តែ​ការ​បន្ត​សម្ពាធ​ផ្នែក​យោធា រួម​ទាំង​សព្វាវុធ​ទំនើបៗ​របស់​អាមេរិកទើប​អាច​បង្ខំ​រុស្ស៊ី​​ឲ្យ​​ចរចា​យ៉ាង​ហ្មត់ចត់​បាន។

អ៊ុយក្រែនបាននិងកំពុងបញ្ចុះបញ្ចូលក្រុងវ៉ាស៊ីនតោនសម្រាប់មីស៊ីល Tomahawk ជាច្រើនសប្តាហ៍ ដោយលើកហេតុផលថា ពួក​វា​អាចផ្លាស់ប្តូរតុល្យភាពសមរភូមិ និងពង្រឹងជំហររបស់ទីក្រុងកៀវ នៅក្នុងកិច្ចចរចានាពេលអនាគតណាមួយ។ វិមានក្រឹមឡាំងបានព្រមានថា ការផ្គត់ផ្គង់អាវុធបែបនេះនឹងត្រូវបានចាត់ទុកថាជាការកើនឡើងដ៏ធំ​មួយ។

ទោះបីជាមានការខ្វែងគំនិតគ្នាក៏ដោយ លោក ហ្សេលេនស្គី បានពណ៌នាកិច្ចប្រជុំថាជា«ការសន្ទនាដ៏​ច្បាស់លាស់​មួយ» ដែល«ពិតជាអាចជួយនាំសង្រ្គាមនេះកាន់តែខិតជិតដល់ទីបញ្ចប់»។

លោក ត្រាំ និងលោក ពូទីន ត្រូវបានគេរំពឹងថានឹងជួបប្រជុំគ្នានៅទីក្រុង Budapest ក្នុង​ពេល​ប៉ុន្មានសប្តាហ៍ខាងមុខនេះ ដែល​អាច​ចាត់​ទុក​ជាកិច្ចប្រជុំកំពូលសន្តិភាពអាមេរិក និងរុស្ស៊ី ហើយ​នឹង​ក្លាយ​​​ជាការជួបគ្នាលើកដំបូងរបស់ពួកគេចាប់តាំងពីកិច្ចចរចានៅ​រដ្ឋ​អាឡាស្កាក្នុងខែសីហា ដែលបានបញ្ចប់​ទៅ​ដោយគ្មានលទ្ធផលជា​ដុំ​កំភួន៕

ដោយ៖ ឈាង