ព័ត៌មានអន្ដរជាតិ

កូរ៉េខាងជើង ហៅ កូរ៉េខាងត្បូង ជា«អាយ៉ង»របស់អាមេរិក

បានផុស

១៨ វិនាទី មុន

នៅ

ថ្ងៃសុក្រ ១៧ កក្កដា ២០២៦

ដោយ

ប្រព័ន្ធផ្សព្វផ្សាយរដ្ឋកូរ៉េខាងជើង បានហៅកូរ៉េខាងត្បូង ថាជា «អាយ៉ង» ក្រោយចូលរួមធ្វើសមយុទ្ធជើងទឹកដែលដឹកនាំដោយអាមេរិក ហើយថែមទាំងប្រកាសថា ទីក្រុងសេអ៊ូល និងវ៉ាស៊ីនតោន ត្រូវតែទទួលខុសត្រូវចំពោះការកើនឡើងកម្តៅយោធាដែលមិនអាចទាយទុកជាមុនបាន នៅក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយពីទីភ្នាក់ងារសារព័ត៌មានរដ្ឋកូរ៉េខាងជើង (KCNA) បានធ្វើឡើងបន្ទាប់ពីសមយុទ្ធ Rim of the Pacific (RIMPAC) នៅកោះហាវ៉ៃរបស់សហរដ្ឋអាមេរិកកាលពីសប្តាហ៍មុន ដែលបានឃើញកងទ័ពជើងទឹកកូរ៉េខាងត្បូង ដឹកនាំកងកម្លាំងជើងទឹកជាលើកដំបូង។

សមយុទ្ធនេះត្រូវបានគេចាត់ទុកជាសមយុទ្ធជើងទឹកអន្តរជាតិដ៏ធំបំផុតនៅលើពិភពលោក និងត្រូវបានប្រារព្ធឡើងរៀងរាល់ពីរឆ្នាំម្តង។ យោងតាមគេហទំព័រ RIMPAC បានឲ្យដឹងថា មានប្រទេសប្រហែល ៣០ បានចូលរួមក្នុងឆ្នាំនេះ រួមមានជប៉ុន កាណាដា និងអូស្ត្រាលី ។

KCNA បាននិយាយថា កងកម្លាំងអាយ៉ងកូរ៉េខាងត្បូង បានចូលរួមជាសមាសភាគដ៏សំខាន់ នៅចំពេលដែលការឃុបឃិតគ្នាខាងយោធា កំពុងក្លាយជាការបើកចំហកាន់តែខ្លាំងឡើង ដោយយោងទៅលើការគូសបញ្ជាក់ពីការពង្រឹងកិច្ចសហប្រតិបត្តិការយោធារវាងកូរ៉េខាងត្បូង-ជប៉ុន នាពេលថ្មីៗនេះ និងទំនាក់ទំនងរបស់កូរ៉េខាងត្បូងជាមួយអង្គការណាតូ។

ប្រព័ន្ធផ្សព្វផ្សាយរដ្ឋកូរ៉េខាងជើង ក៏បាននិយាយផងដែរថា RIMPAC មិនមែនគ្រាន់តែជា «សមយុទ្ធធម្មតាប្រឆាំងនឹងសត្រូវសន្មត» នោះទេ ប៉ុន្តែវាគឺជាការបង្ហាញសង្រ្គាមដោយអាមេរិក និងសម្ព័ន្ធមិត្តរបស់ខ្លួន ដែលមានគោលដៅលើបណ្តាប្រទេសនៅក្នុងតំបន់ឥណ្ឌូ-ប៉ាស៊ីហ្វិក។ ការពិតទាំងអស់នេះបង្ហាញយ៉ាងច្បាស់ថា សមយុទ្ធទាំងនេះមានបង្កប់យុទ្ធសាស្ត្រវាយប្រហារទុកជាមុន ពោលគឺត្រៀមលក្ខណៈវាយកម្ទេចមុន ប្រសិនបើឃើញសញ្ញាថាគូសត្រូវ (កូរ៉េខាងជើង) ចង់បាញ់មីស៊ីល ឬអាវុធនុយក្លេអ៊ែរ។

ប្រភពនេះក៏បានរិះគន់បន្ថែមទៀតចំពោះសមយុទ្ធរួមគ្នារវាងកងម៉ារីនក្រុងវ៉ាស៊ីនតោន និងសេអ៊ូល ដោយលើកឡើងថា សមយុទ្ធផ្លូវអាកាសរួមគ្នា បានធ្វើការក្លែងធ្វើ «ការជ្រៀតចូលយ៉ាងជ្រៅទៅក្នុងតំបន់ខាងក្រោយរបស់សត្រូវ» ចេញពីនាវាផ្ទុកយន្តហោះ USS Essex របស់កងទ័ពជើងទឹកអាមេរិក។

គួររម្លឹកឡើងវិញថា នេះជាលើកទីមួយហើយ ក្នុងរយៈពេលប្រហែលមួយឆ្នាំ និងបីខែ ដែលកូរ៉េខាងជើងបានប្រើប្រាស់ពាក្យ «អាយ៉ង» ដើម្បីសំដៅលើទីក្រុងសេអ៊ូល បន្ទាប់ពីមានឧប្បត្តិហេតុមួយកាលពីខែមេសា ឆ្នាំ២០២៥ ដែលក្នុងនោះធុងប្រេង និងប្រអប់កាំភ្លើងដែលភ្ជាប់ទៅនឹងយន្តហោះកងទ័ពអាកាស បានដាច់ចេញពីគ្នា និងធ្លាក់ចូលទៅក្នុងតំបន់ភ្នំក្នុងខេត្ត Gangwon អំឡុងពេលធ្វើសមយុទ្ធហ្វឹកហ្វឺន៕

អត្ថបទ ៖ សាង ស្រីល័ក្ខ