ព័ត៌មានអន្ដរជាតិ

អាមេរិកកំពុងពិនិត្យនូវជម្រើសប្រើប្រាស់យោធា ដើម្បីវាយប្រហារកាន់កាប់គុយបា

បានផុស

៣ នាទី មុន

នៅ

ថ្ងៃព្រហស្បតិ៍ ១៦ កក្កដា ២០២៦

ដោយ

ថ្វីដ្បិតសហរដ្ឋអាមេរិក កំពុងជាប់ដៃលើសង្រ្គាមនៅអ៊ីរ៉ង់ តែទីក្រុងវ៉ាស៊ីនតោន មិនបានបោះបង់ចោលជម្រើសប្រើប្រាស់យោធាប្រកបដោយមហិច្ឆតាក្នុងការវាយប្រហាគុយបាដែលនៅក្បែរខាងខ្លួននោះទេ។

កាលពីម្សិលមិញ អ្នករៀបចំផែនការយោធាអាមេរិកកំពុងពិនិត្យមើលជម្រើសជាច្រើនសម្រាប់ប្រើប្រាស់សកម្មភាពយោធាដែលអាចទៅរួចប្រឆាំងនឹងប្រទេសគុយបា រួមទាំងការវាយប្រហារតាមផ្លូវអាកាស ដឹកនាំដោយកងទ័ពអាមេរិករាប់ពាន់នាក់។ នេះបើយោងតាមការរាយការណ៍របស់ CBS News កាលពីថ្ងៃពុធ ទី១៥ ខែកក្កដា ឆ្នាំ២០២៦ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍នោះ បានលើកឡើងដោយដកស្រង់សម្តីមន្ត្រីអាមេរិកថា ការវាយប្រហារតាមអាកាសនឹងត្រូវបានអនុវត្តដោយកងពលទ័ពអាកាសទី១០១ ដែលជាអង្គភាពតែមួយគត់ត្រូវបានបណ្តុះបណ្តាលសម្រាប់បេសកកម្មពិសេសបែបនេះ។

មន្ត្រីទាំងនោះបានសង្កត់ធ្ងន់ថា៖ « ផែនការនេះមិនមានន័យថាប្រធានាធិបតី ដូណាល់ ត្រាំ ឬមន្ទីរបញ្ចកោណសម្រេចចិត្ត ចាប់ផ្តើមប្រតិបត្តិការនោះទេ»។

របាយការណ៍ដដែលរៀបរាប់ថា សកម្មភាពយោធាណាមួយប្រឆាំងនឹងប្រទេសគុយបាប្រឈមនឹងបញ្ហាធំៗ ពីព្រោះធនធានយោធាសំខាន់ៗរបស់អាមេរិក នៅតែទាក់ទងនឹងប្រតិបត្តិការប្រឆាំងនឹងអ៊ីរ៉ង់។

ក្នុងសេចក្តីថ្លែងការណ៍មួយនៅថ្ងៃទី១១ ខែកក្កដា រដ្ឋមន្រ្តីការបរទេសអាមេរិក លោក Marco Rubio និយាយថា៖ « របបគុយបានិងឥស្សរជនពុករលួយ នៅតែបន្តបដិសេធកំណែទម្រង់ ដោយជំនួសមកវិញដោយបន្តការគ្រប់គ្រងទាំងស្រុងនិងការប្រកាន់ខ្ជាប់នូវមនោគមវិជ្ជា Marxist និយមដែលក្ស័យធនខាងសីលធម៌»។

ក្រសួងការបរទេសក៏បានពង្រីកទណ្ឌកម្ម ផ្តោតលើអង្គភាពរដ្ឋគុយបាដែលបញ្ជូនប្រាក់ចំណូលទៅឱ្យរបបនេះ និងកងកម្លាំងប៉ារ៉ាយោធាបង្ក្រាបប្រជាជនគុយបា រួមទាំងកងពលតូចឆ្លើយតបរហ័សផងដែរ។

មិនតែប៉ុណ្ណោះ មន្ទីរបញ្ចកោណបានធ្វើសន្និសីទគំនិតនៃប្រតិបត្តិការ កាលពីខែមុន ដើម្បីពិនិត្យមើលជម្រើសយោធាដំណាក់កាលដំបូង។ ការធ្វើផែនការបន្ទាន់បែបនេះតែងតែវាយតម្លៃគោលបំណងបេសកកម្ម តម្រូវការកងទ័ព ភស្តុភារ ពេលវេលា និងហានិភ័យ។

យ៉ាងណា ដោយសារយន្តហោះ ទ្រព្យសម្បត្តិចារកម្ម និងសមត្ថភាពផ្សេងទៀតបានផ្លាស់ប្តូរទៅមជ្ឈិមបូព៌ារួចហើយ មន្ត្រីអាមេរិកថា ចលនាប្រឆាំងនឹងគុយបាទំនងជាមិនកើតឡើងក្នុងពេលដ៏ខ្លីខាងមុខនេះទេ ដោយសារតែប្រតិបត្តិការប្រឆាំងនឹងអ៊ីរ៉ង់ត្រូវធ្វើឡើងវិញ៕

សម្រួល៖ ណឺ មិនា