មនុស្សស្លាប់ដោយសារគ្រោះទឹកជំនន់ដ៏សាហាវនៅ អយុធ្យា បន្តកើនឡើង

មិនធូរស្រាលទេ តែគ្រោះទឹកជំនន់នៅខេត្តអយុធ្យា កាន់តែសាហាវទៅៗ ដោយសម្លាប់មនុស្សច្រើនឡើងៗ និងបង្កការខូចខាតទ្រង់ទ្រាយធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Amarin នៅថ្ងៃសុក្រទី១៤ខែវិច្ឆិកាឆ្នាំ២០២៥ តួលេខមនុស្សស្លាប់ដោយទឹកជំនន់នៅអយុធ្យា បានហក់ឡើងដល់១៥នាក់ហើយ។

ដោយសារតែការបញ្ចេញទឹកកម្រិតខ្ពស់ ២ ៩០០ម៉ែត្រគូបក្នុងមួយវិនាទី ពីទំនប់ចៅប្រាយ៉ា ជំនន់បានជន់លិចផ្ទះប៉ះពាល់មនុស្ស៦២ ៣៤៨គ្រួសារក្នុង៩៤៧ភូមិ ១៤៣ឃុំ ១១ស្រុក ជាពិសេសស្រុក Sena, Phak Hai, Bang Ban, Bang Sai និង Phra Nakhon Si Ayutthaya។

ខេត្តអយុធ្យា រងការជន់លិចខ្លាំងមែនទែន ពោលគឺឈានដល់កម្រិតធ្ងន់ធ្ងរខុសពីរាល់ឆ្នាំ  ដោយប៉ះពាល់សូម្បីប្រាសាទបុរាណ។ កាលពីសប្តាហ៍មុន ប្រាសាទបុរាណ Choeng Tha ដែលសាងសង់ក្នុងសម័យអាយុធ្យា និងត្រូវបានចុះបញ្ជីជាទីតាំងបុរាណវិទ្យា ត្រូវទឹកលិចជម្រៅមួយម៉ែត្រ ហើយឥឡូវនេះ ទឹកឡើងកាន់តែខ្លាំងព្រោះតែការទម្លាយទឹកចេញពីទំនប់ចៅប្រាយ៉ា។

ឆ្នាំនេះទូទាំងប្រទេសថៃ ត្រូវវាយប្រហារយ៉ាងដំណំដោយសារព្យុះជាបន្តបន្ទាប់​ បង្កជាទឹកជំនន់ធ្ងន់ធ្ងរ។​ អយុធ្យាក្លាយជាខេត្តមួយដែលរងគ្រោះខ្លាំង ដោយកត្តាដែលធ្វើឲ្យទីនោះលិចលង់ លិចទាំងប្រាសាទទៀតនោះ គឺដោយសារភ្លៀងធ្លាក់ឥតឈប់មិនធ្លាប់មាន ជាឥទ្ធិពលនៃព្យុះយ៉ាងច្រើន (ពិសេសព្យុះ Kalmaegi) បានរុញកម្ពស់ទឹកនៅទំនប់ចៅប្រាយ៉ា ឲ្យឡើងដល់កម្រិតគ្រោះថ្នាក់ ជាហេតុត្រូវបង្ខំរំដោះទឹកចេញ បើមិនដូច្នេះអាចប្រឈមការបាក់ធ្លាយ៕

អត្ថបទ៖ សុខ សុវណ្ណ

ចុចអាន៖ ហេតុអ្វីប្រាសាទបុរាណនៅខេត្តអយុធ្យា ត្រូវទឹកលិចធ្ងន់ធ្ងរខុសប្លែកជាងរាល់ឆ្នាំ?