ចិន បញ្ចេញតួលេខអ្នកចាក់វ៉ាក់សាំងកូវីដ រយលានដូស ខណៈភាគច្រើនជាបុគ្គលិកពេទ្យ

ប្រទេសចិននិយាយកាលពីថ្ងៃពុធថា បានចាក់វ៉ាក់សាំងបង្ការជំងឺកូវីដ ១៩ ចំនួន ២០០ លានដូសហើយនៅក្នុងប្រទេសនេះ រួមទាំងការចាក់ភាគច្រើនដល់បុគ្គលិកពេទ្យរបស់ខ្លួនជាដើម ។

យោងតាមគណៈកម្មការសុខភាពជាតិ (NHC) បានឲ្យដឹងថា អ្នកទទួលការចាក់វ៉ាក់សាំង ២០០ លាននោះ រួមមានប្រហែល ៨០ ភាគរយនៃបុគ្គលិកពេទ្យទាំងអស់ ។

តួលេខនេះមានន័យថា ប្រទេសចិនដែលបានចាប់ផ្តើមចាក់ថ្នាំបង្ការរោគដ៏ធំមួយនៅក្នុងខែមករានេះ និងបានគ្របដណ្តប់លើពលរដ្ឋមិនមែនជាជនជាតិចិននៅក្នុងយុទ្ធនាការរបស់ខ្លួនផងដែរនោះ គឺស្ថិតនៅលំដាប់ទី ២ បន្ទាប់ពីសហរដ្ឋអាមេរិកទាក់ទងនឹងការចាក់ថ្នាំបង្ការរោគសរុប ។

បើយោងតាមការចេញផ្សាយរបស់សារព័ត៌មាន Daily Times បានឲ្យដឹងថា អត្រានៃការចាក់ថ្នាំបង្ការនៅក្នុងប្រទេសនេះបានកើនឡើងដល់ ១២.២ ភាគរយ ដែលជាប់ចំណាត់ថ្នាក់ទី ៨ នៅលើពិភពលោក ។

ប្រទេសចិនកំពុងប្រើប្រាស់វ៉ាក់សាំងដែលបង្កើតឡើងដោយក្រុមហ៊ុនក្នុងស្រុកដូចជា Sinovac, Sinopharm និងក្រុមហ៊ុន CanSino ជាដើម ហើយពុំមានវ៉ាក់សាំងណាមួយផលិតនៅបរទេសត្រូវបានប្រើប្រាស់នៅក្នុងប្រទេសនេះឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ចិន អះអាងថា មានសមត្ថភាពផលិតវ៉ាក់សាំងការពារកូវីដប្រហែល ៥ ពាន់លានដូសក្នុងមួយឆ្នាំៗ

ចុចអាន ៖ ដំណឹងល្អ! ចិនអនុម័តវ៉ាក់សាំងកូវីដទី ៣ របស់ក្រុមហ៊ុន Sinopharm សម្រាប់ការសាកល្បងព្យាបាល