ត្រាំ គំរាមម្តងទៀត! បើគ្មានកិច្ចព្រមព្រៀងនុយក្លេអ៊ែរ អ៊ីរ៉ង់នឹងទទួល «លទ្ធផលខ្លោចផ្សា»

ជាថ្មីម្តងទៀត ប្រធានាធិបតីអាមេរិក ដូណាល់ ត្រាំ បានព្រមានទៅអ៊ីរ៉ង់ថា ប្រទេសនេះនឹងទទួល «លទ្ធផលខ្លោចផ្សា» បើគ្មានកិច្ចព្រមព្រៀងនុយក្លេអ៊ែរទេនោះ។ នេះបើតាមការផ្សាយរបស់ AFP។

ថ្លែងប្រាប់អ្នកសារព័ត៌មានកាលពីថ្ងៃព្រហស្បតិ៍ទី១២ខែកុម្ភៈឆ្នាំ២០២៦ ពោលគឺមួយថ្ងៃបន្ទាប់ពីជំនួបពិភាក្សាជាមួយនាយករដ្ឋមន្ត្រីអ៊ីស្រាអែល Benjamin Netanyahu, លោកត្រាំព្រមានថា៖ «យើងត្រូវតែឈានដល់កិច្ចព្រមព្រៀងមួយ បើមិនដូច្នោះទេ វានឹងក្លាយជារឿងដ៏ខ្លោចផ្សា។ ខ្ញុំអត់ចង់ឲ្យរឿងអ៊ីចឹងកើតឡើងទេ ប៉ុន្តែយើងត្រូវតែមានកិច្ចព្រមព្រៀង។ វានឹងក្លាយជារឿងដ៏ខ្លោចផ្សាបំផុតសម្រាប់អ៊ីរ៉ង់ ប្រសិនបើពួកគេមិនព្រម»។

លោក ត្រាំ បន្តថា៖ «យើងនឹងរង់ចាំមើលថាតើយើងអាចសម្រេចបានកិច្ចព្រមព្រៀងជាមួយពួកគេដែរឬទេ ហើយប្រសិនបើយើងមិនអាច យើងនឹងត្រូវឈានទៅដល់ដំណាក់កាលទីពីរ ដែលនឹងធ្ងន់ធ្ងរបំផុតសម្រាប់ពួកគេ»។

ការព្រមាននេះកើតឡើងមិនបានប៉ុន្មានថ្ងៃផង បន្ទាប់ពីលោកត្រាំ ប្រកាសថា សហរដ្ឋអាមេរិកនឹងបញ្ជូនកងនាវាចម្បាំងដ៏មហិមាទីពីរ ទៅកាន់តំបន់មជ្ឈិមបូព៌ា ពោលគឺសំដៅទៅអ៊ីរ៉ង់តែម្តង។

ប្រធានាធិបតីអាមេរិកបានប្រាប់ទៅសារព័ត៌មាន Axios ថា៖ «យើងមានកងនាវាចម្បាំងមួយកំពុងធ្វើដំណើរទៅទីនោះ ហើយមួយទៀតក៏អាចនឹងទៅដែរ។ យើងនឹងសម្រេចកិច្ចព្រមព្រៀងមួយ បើមិនដូច្នោះ យើងនឹងចាត់វិធានការយ៉ាងតឹងរ៉ឹងបំផុត ដូចកាលពីលើកមុន»។

កាលពីខែមុន សហរដ្ឋអាមេរិកបានបញ្ជូនកងនាវាចម្បាំងដ៏ធំមួយរួចទៅហើយ ឆ្ពោះទៅកាន់ប្រទេសអ៊ីរ៉ង់។ នោះគឺនាវាផ្ទុកយន្តហោះ USS Abraham Lincoln និងក្រុមនាវាអមដំណើរ ដែលធ្វើដំណើរឆ្ពោះទៅកាន់តំបន់នោះ ខណៈនាវា USS George H.W. Bush កំពុងប្រតិបត្តិការនៅមហាសមុទ្រអាត្លង់ទិក។

មុននោះទៀត លោក ត្រាំ បានដាក់លក្ខខណ្ឌ២ចំណុចរួចហើយ ឲ្យទីក្រុងតេហេរ៉ង់ អនុវត្តតាម ប្រសិនបើពួកគេមិនចង់ទទួលធម៌ក្តៅទេនោះ។ ប្រមុខរដ្ឋាភិបាលទីក្រុងវ៉ាស៊ីនតោន បញ្ជាក់យ៉ាងច្បាស់ថា បើអ៊ីរ៉ង់មិនចង់ឲ្យអាមេរិក ធ្វើសកម្មភាពយោធាទេនោះ អ៊ីរ៉ង់ត្រូវតែបោះបង់ចោលកម្មវិធីនុយក្លេអ៊ែរ និងឈប់សម្លាប់បាតុករ៕

អត្ថបទ៖ សុខ សុវណ្ណ