ត្រាំ ព្រមឈប់បាញ់២សប្តាហ៍ ជាមួយអ៊ីរ៉ង់ និងកំពុងពិនិត្យសំណើ១០ចំណុច ដើម្បីបញ្ចប់សង្គ្រាមជាស្ថាពរ

ទីបំផុត ប្រធានាធិបតីអាមេរិក ដូណាល់ ត្រាំ បានយល់ព្រមលើបទឈប់បាញ់រយៈពេល២សប្តាហ៍ ជាមួយអ៊ីរ៉ង់ហើយ ហើយក៏កំពុងពិនិត្យលើសំណើរ១០ចំណុចរបស់ទីក្រុងតេហេរ៉ង់ដែរ ដើម្បីបញ្ចប់សង្គ្រាមជាស្ថាពរ។ 

ក្នុងសារបង្ហោះលើបណ្តាញសង្គម Truth Social នៅថ្ងៃពុធទី៨ខែមេសាឆ្នាំ២០២៦ (ពេលវេលានៅកម្ពុជា) ប្រមុខសេតវិមានរូបនេះសរសេរថា៖ «ខ្ញុំយល់ព្រមផ្អាកការទម្លាក់គ្រាប់បែក និងការវាយប្រហារលើប្រទេសអ៊ីរ៉ង់ ក្នុងរយៈពេលពីរសប្តាហ៍។ នេះនឹងក្លាយជា បទឈប់បាញ់ ពីភាគីទាំងសងខាង!។ កិច្ចព្រមព្រៀងនេះគឺផ្អែកលើការពិភាក្សាជាមួយនាយករដ្ឋមន្ត្រីប៉ាគីស្ថាន Shehbaz Sharif និងសេនាប្រមុខ Asim Munir»។

ស្របពេលជាមួយនឹងការប្រកាសបទឈប់បាញ់នេះ ប្រធានាធិបតីអាមេរិក ក៏បញ្ជាក់ដែរថា លោកបានទទួលសំណើ ១០ ចំណុចពីប្រទេសអ៊ីរ៉ង់ ហើយជឿជាក់ថា វាគឺជាមូលដ្ឋានដែលអាចយកទៅអនុវត្តបានសម្រាប់ការចរចាដើម្បីបញ្ចប់សង្គ្រាម។ ចំណុចចម្រូងចម្រាសស្ទើរតែទាំងអស់កាលពីពេលមុន ឥឡូវត្រូវបានយល់ព្រមហើយរវាងអាមេរិកនិងអ៊ីរ៉ង់ ប៉ុន្តែក្នុងរយៈពេលពីរសប្តាហ៍នេះ នឹងអនុញ្ញាតឲ្យកិច្ចព្រមព្រៀងត្រូវបានសម្រេចជាស្ថាពរ និងពេញលេញ។

សំណើ១០ចំណុចនោះរួមមាន៖

១. ការធានាថា អ៊ីរ៉ង់នឹងមិនត្រូវបានវាយប្រហារម្តងទៀតទេ។

២. ការបញ្ចប់សង្រ្គាមជាស្ថាពរ មិនមែនត្រឹមបទឈប់បាញ់។

៣. បញ្ឈប់ការវាយប្រហាររបស់អ៊ីស្រាអែលនៅលីបង់។

៤. លុបចោលរាល់ទណ្ឌកម្មរបស់អាមេរិកលើអ៊ីរ៉ង់។

៥. បញ្ឈប់ការវាយប្រហារក្នុងតំបន់ប្រឆាំងនឹងសម្ព័ន្ធមិត្តរបស់អ៊ីរ៉ង់។  

៦. ជាការឆ្លើយតប អ៊ីរ៉ង់នឹងបើកច្រកសមុទ្រ Hormuz ឡើងវិញ។

៧. អ៊ីរ៉ង់នឹងកំណត់យកកម្រៃសេវា ២ លានដុល្លារ ក្នុងមួយនាវា។

៨. អ៊ីរ៉ង់នឹងបែងចែកប្រាក់ចំណូលទាំងនេះជាមួយប្រទេសអូម៉ង់។

៩. អ៊ីរ៉ង់នឹងចេញច្បាប់សម្រាប់ការធ្វើដំណើរដោយសុវត្ថិភាពតាមច្រក Hormuz។

១០. អ៊ីរ៉ង់នឹងប្រើប្រាស់ប្រាក់ចំណូលពីច្រក Hormuz សម្រាប់ការស្តារឡើងវិញ ជំនួសឲ្យការបង់សំណង។

នេះគឺជាដំណឹងល្អមួយសម្រាប់ពិភពលោក ដែលសង្ឃឹមថា ភ្លើងសង្គ្រាមមជ្ឈិមបូព៌ានឹងរលត់ ហើយវិបត្តិសេដ្ឋកិច្ចដែលបង្កឲ្យថ្លៃទំនិញនិងប្រេងឡើងថ្លៃ ក៏ត្រូវបញ្ចប់ដែរ៕

អត្ថបទ៖ សុខ សុវណ្ណ

រដ្ឋ​មន្រ្តី​​​អ៊ីតាលី​៖ សង្គ្រាម​នៅ​អ៊ីរ៉ង់​ធ្វើឱ្យភាព​ជាអ្នកដឹកនាំ​សកល​អា​មេរិក​ស្ថិតក្នុង​ភាព​គ្រោះថ្នាក់