ព័ត៌មានអន្ដរជាតិ

បណ្តារដ្ឋឈូងសមុទ្រជំរុញឱ្យ UN ធ្វើសកម្មភាព ដើម្បីធានាសុវត្ថិភាពនៃ ច្រក Hormuz

បានផុស

១ ខែ មុន

នៅ

ថ្ងៃសុក្រ ៨ ឧសភា ២០២៦

ដោយ

បណ្តារដ្ឋឈូងសមុទ្រ កំពុងជំរុញសំណើដំណោះស្រាយថ្មីមួយដល់ក្រុមប្រឹក្សាសន្តិសុខអង្គការសហប្រជាជាតិ (UNSC) ដោយគំរាមអ៊ីរ៉ង់ជាមួយនឹងទណ្ឌកម្ម និងវិធានការផ្សេងទៀត ប្រសិនបើទីក្រុងតេហេរ៉ង់មិនបញ្ឈប់ការវាយប្រហារលើកប៉ាល់ក្នុងច្រកសមុទ្រ Hormuz, ដាក់ពន្ធខុសច្បាប់ បង្ហាញទីតាំងគ្រាប់មីនទាំងអស់ ដើម្បីអនុញ្ញាតឱ្យមានសេរីភាពក្នុងការធ្វើនាវាចរណ៍ឡើងវិញ។ នេះបើយោងតាមសារព័ត៌មាន Al Jazeera ផ្សាយថ្ងៃទី៧ ខែឧសភា ឆ្នាំ២០២៦ ។

ថ្លែងនៅឯអង្គការសហប្រជាជាតិកាលពីថ្ងៃព្រហស្បតិ៍ អ្នកការទូតកំពូលៗមកពីប្រទេសកាតា បារ៉ែន និងអារ៉ាប់រួម (UAE) សង្កត់ធ្ងន់លើសារៈសំខាន់នៃការធ្វើនាវាចរណ៍មុនសង្គ្រាម ក្នុងច្រកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Alya Ahmed Saif al-Thani ឯកអគ្គរដ្ឋទូតកាតាប្រចាំអង្គការសហប្រជាជាតិថា៖ « ការធានាថាច្រកសមុទ្រនៅតែបើកចំហ គឺជាតម្រូវការដែលបានកំណត់ដោយអនុសញ្ញាអង្គការសហប្រជាជាតិ ក៏ដូចជាការទទួលខុសត្រូវរួមគ្នាជាអន្តរជាតិ»។

លោកស្រីបន្ថែមថា៖ « ស្ថានភាពបច្ចុប្បន្នមិនត្រឹមតែធ្វើឱ្យប៉ះពាល់ដល់ស្ថិរភាពសេដ្ឋកិច្ចពិភពលោក និងសន្តិសុខថាមពលប៉ុណ្ណោះទេ ថែមទាំងធ្វើឱ្យមានវិបត្តិមនុស្សធម៌កាន់តែអាក្រក់ទៅៗ និងប៉ះពាល់ដល់ស្ថិរភាពក្នុងតំបន់ផងដែរ»។

ប្រទេសឈូងសមុទ្រទាំងបី បានរួមគ្នារៀបចំសេចក្តីសម្រេចនេះ រួមជាមួយអារ៉ាប៊ីសាអូឌីត គុយវ៉ែត និងសហរដ្ឋអាមេរិក ក៏ទាមទារឱ្យអ៊ីរ៉ង់ «ចូលរួមនិងអនុញ្ញាតភ្លាមៗ» ចំពោះកិច្ចខិតខំប្រឹងប្រែងរបស់អង្គការសហប្រជាជាតិ បង្កើតច្រកមួយប្រកបដោយសុវត្ថិភាព ដើម្បីផ្តល់ជំនួយសំខាន់ៗ និងទំនិញផ្សេងទៀត តាមតម្រូវការ។

លោក Jamal Alrowaiei ឯកអគ្គរដ្ឋទូតបារ៉ែនប្រចាំអង្គការសហប្រជាជាតិ បានគូសបញ្ជាក់ពីតម្រូវការសម្រាប់សកម្មភាពរួមគ្នា ដើម្បីរក្សាច្រកសមុទ្រឱ្យមានសុវត្ថិភាព និងបើកចំហរពេញលេញ។

សេចក្តីព្រាងសម្រេចនោះត្រូវបានដឹកនាំដោយមានគោលការណ៍ច្បាស់លាស់ ពីសេរីភាពនៃការធ្វើនាវាចរណ៍ស្របតាមច្បាប់អន្តរជាតិ។

លោក Mohammed Issa Abushahab តំណាងរបស់អារ៉ាប់រួមប្រចាំអង្គការសហប្រជាជាតិបន្ថែមថា៖ « ផ្លូវទឹកអន្តរជាតិមិនអាចគ្រប់គ្រងបានតាមរយៈការបង្ខិតបង្ខំ ការវាយប្រហារ ឬការគំរាមកំហែងប្រឆាំងនឹងការដឹកជញ្ជូនស៊ីវិល និងពាណិជ្ជកម្មនោះទេ។ សេចក្តីសម្រេចនេះទាមទារឱ្យដកមីនសមុទ្រជុំវិញច្រកសមុទ្រ Hormuz ។ គ្មានការយកពន្ធខុសច្បាប់ ការជ្រៀតជ្រែកលើសេរីភាពនៃការធ្វើនាវាចរណ៍ ហើយបើកឱ្យកប៉ាល់ឆ្លងកាត់ស្របច្បាប់»៕

ប្រែដោយ៖ ណឺ មិនា

Related Topics:UN សហរដ្ឋអាមេរិក អ៊ីរ់ង់ច្រកសមុទ្រ Hormuz

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា