កីឡា

យប់នេះ កម្ពុជា ប្រកួតជាមួយ សិង្ហបុរី ជាការជួបគ្នាលើកទី១១ គិតពីឆ្នាំ២០០៤

បានផុស

៥ ម៉ោង មុន

នៅ

ថ្ងៃសុក្រ ២៤ កក្កដា ២០២៦

ដោយ

វេលាម៉ោង ៧:០០នាទី យប់ថ្ងៃសុក្រនេះ ក្រុមកម្ពុជា បើកទ្វារពហុកីឡដ្ឋានជាតិមរតកតេជោ ទទួលស្វាគមន៍ក្រុមសិង្ហបុរី វគ្គសន្សំពិន្ទុក្នុងពូល ពានរង្វាន់ASEAN Championship ដែលជាការប្រកួតបើកឆាកអបអរសាទរខួប ៣០ ឆ្នាំ ពានរង្វាន់អាស៊ានមួយនេះបានដំណើរការប្រកួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជា និង សិង្ហបុរី ស្ថិតនៅក្នុងពូលជាមួយគ្នាដូចកាលពីឆ្នាំ ២០២៤។ ការប៉ះគ្នាចុងក្រោយបំផុតរវាង ក្រុមទាំងពីរកាលពីខែធ្នូ ឆ្នាំ ២០២៤ នៅប្រទេសសិង្ហបុរី ដែលកម្ពុជា បានចាញ់ដោយលទ្ធផល ២-១។ ការប្រកួតនោះ បានធ្វើឲ្យអ្នកគាំទ្រខកចិត្តយ៉ាងខ្លាំង ដោយសារពេលនោះ សិង្ហបុរី រកបាន ២ គ្រាប់យ៉ាងលឿនលើក្រុមកម្ពុជា នៅនាទី ៩ និង ១៦ ក្នុងវគ្គទី១ ហើយកម្ពុជា រកបាន ១ គ្រាប់វិញនៅនាទី ៥៩ ក្នុងវគ្គទី២។

ការប្រកួតនោះបានធ្វើឲ្យអ្នកគាំទ្របានលើកឡើងមតិផ្សេងៗរហូតធ្វើឲ្យសហព័ន្ធកីឡាបាល់ទាត់កម្ពុជាធ្វើការស៊ើបអង្កេត ហើយទីបំផុត សហព័ន្ធកីឡាបាល់ទាត់កម្ពុជា បានចេញសេចក្តីថ្លែងការណ៍បញ្ជាក់ថា គ្រាប់បាល់ទាំងពីរនោះបានកើតមានឡើងដោយកំហុសបច្ចេកទេសរបស់អ្នកចាំទីពោលគឺគ្មានជាប់ពាក់ព័ន្ធនឹងរឿងអ្វីផ្សេងឡើយ។

គិតចាប់ទាំងពីពេលនោះមកមានរយៈពេលប្រមាណជិត ២ ឆ្នាំហើយដែល កម្ពុជា ត្រូវប៉ះគ្នាជាថ្មីនៅក្នុងពានរង្វាន់ដដែល ប៉ុន្តែនៅទឹកដីកម្ពុជាវិញម្តង ដូច្នេះជាពេលវេលាដែលក្រុមបាល់ទះកម្ពុជាជម្រុះជាមួយ សិង្ហបុរី ជាថ្មី។

ក្រុមកម្ពុជា បច្ចុប្បន្នស្ថិតនៅលេខ ១៧៥ ក្នុងតារាងចំណាត់ថ្នាក់ពិភពលោក FIFA Ranking ខណៈ សិង្ហបុរី ស្ថិតនៅលេខ ១៤៨។ កម្ពុជាអវត្តមានកីឡាករសំខាន់ៗជាច្រើន ក្នុងនោះមានកីឡាករចូលសញ្ជាតិថែមទៀត។ ផ្ទុយទៅវិញ សិង្ហបុរី មានកីឡាករពេញជើងល្អដោយសារក្លិបរបស់គេអនុញ្ញាតឲ្យកីឡាករចូលជម្រើសជាតិ បើទោះបីជាក្លិបរបស់ពួកគាត់មានកាតព្វកិច្ចប្រកួតពានរង្វាន់ក្លិបអាស៊ីកម្រិតទី២ក៏ដោយ។

គិតត្រឹមឆ្នាំ ២០០៤ កម្ពុជា និង សិង្ហបុរី ធ្លាប់ជួបគ្នា ១០ លើក ក្នុងកម្ពុជា បានឈ្នះតែ ១ លើកគត់ក្នុងជំនួបមិត្តភាពអន្តរជាតិ ឆ្នាំ ២០១៦ ដោយលទ្ធផល ២-១ នៅពហុកីឡដ្ឋានជាតិអូឡាំពិក ខណៈ ៩ ប្រកួតផ្សេងទៀតសុទ្ធតែ សិង្ហបុរី ជាអ្នកឈ្នះ។

៥ ប្រកួតចុងក្រោយរបស់កម្ពុជា គឺឈ្នះ ២ ស្មើ១ និងចាញ់ ២ ក្នុងនោះឈ្នះ ប៊ូតាន់ ៤-០ និងឈ្នះ ហុងកុង ២-០ ហើយស្មើ ហុងកុង ១-១ ប៉ុន្តែចាញ់ អារូប៉ា ២-១ និងចាញ់ តាហ្ស៊ីគីស្ថាន ២-១។ ចំណែក ៥ ប្រកួតចុងក្រោយរបស់ សិង្ហបុរី ឈ្នះ ៣ និងចាញ់ ២ ក្នុងនោះឈ្នះ ហុងកុង ២-១, ឈ្នះ បង់ក្លាដែស ១-០ និងឈ្នះ ម៉ុងហ្គោលី ៤-១ ប៉ុន្តែចាញ់ សៀម ៣-២ និងចាញ់ ចិន ២-១។

មុនប៉ះគ្នា ក្រុមទាំងពីរសុទ្ធតែបានទៅបោះជំរុំហ្វឹកហាត់នៅប្រទេសជប៉ុនដូចគ្នា។ នៅទីនោះ កម្ពុជា បានប្រកួតកម្តៅសាច់ដុំជាមួយក្លិបរបស់ជប៉ុន ២ ប្រកួត ហើយ សិង្ហបុរី ក៏មានការប្រកួតកម្តៅសាច់ដុំជាមួយក្លិបជប៉ុន ២ ប្រកួតដែរ។