វ៉ាក់សាំងរុស្ស៊ី Sputnik V ក៏មានប្រសិទ្ធភាពមិនធម្មតាប្រឆាំង វីរុសបំប្លែងខ្លួនឥណ្ឌា Delta

បើតាមរដ្ឋមន្ត្រីក្រសួងសុខាភិបាលរុស្ស៊ីលោក Mikhail Murashko បាននិយាយនៅថ្ងៃពុធនេះថា វ៉ាក់សាំង Sputnik V របស់រុស្ស៊ីបង្ហាញពីលទ្ធផលដ៏អស្ចារ្យ ប្រឆាំងនឹងវីរុសបំប្លែងខ្លួនឥណ្ឌា “Delta” ដោយប្រសិទ្ធភាពរបស់វាឈានដល់ប្រមាណ ៨៣ ភាគរយ ។

លោក Murashko បានប្រាប់អ្នកយកព័ត៌មានថា “វ៉ាក់សាំង Sputnik V បង្ហាញលទ្ធផលប្រកបដោយប្រសិទ្ធភាពបំផុត ក្នុងការការពារ និងប្រយុទ្ធប្រឆាំងនឹងវីរុសបំប្លែងខ្លួនឥណ្ឌា Delta” ។

លោកបាននិយាយថា “ទិន្នន័យចុងក្រោយបង្អស់បង្ហាញថា វាមានប្រសិទ្ធភាព ៨៣ ភាគរយ បន្ទាប់ការសាកល្បងលើប្រជាជនរុស្ស៊ី” ។

ទន្ទឹមនោះ លោករដ្ឋមន្ត្រីបានបន្ថែមថា វ៉ាក់សាំងនេះក៏មានប្រសិទ្ធភាពជាង ៩៥ ភាគរយផងដែរ ប្រឆាំងនឹងករណីជំងឺកូវីដ ១៩ ធ្ងន់ធ្ងរ ។

គួររំឭកថា នៅខែសីហា ឆ្នាំ ២០២០ រុស្ស៊ីបានក្លាយជាប្រទេសដំបូងគេនៅលើពិភពលោក ដែលចុះបញ្ជីវ៉ាក់សាំងប្រឆាំងជំងឺកូវីដ ១៩ ឈ្មោះថា Sputnik V ហើយវ៉ាក់សាំងនេះ ត្រូវបានបង្កើតឡើងដោយវិទ្យាស្ថានស្រាវជ្រាវ Gamaleya ខណៈរហូតមកដល់ពេលនេះ វ៉ាក់សាំង Sputnik V ត្រូវបានអនុម័តឲ្យប្រើប្រាស់ជាបន្ទាន់នៅក្នុងប្រទេសចំនួន ៦៩ ហើយ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ផ្ដល់ភ្លើងខៀវឲ្យចាក់វ៉ាក់សាំង AstraZeneca និង Sputnik V លាយគ្នា