ចិន ផលិតឈុតការពារ បំពាក់ម៉ាស៊ីនត្រជាក់ ដើម្បីជួយក្រុមគ្រូពេទ្យ

យោងតាមប្រភពពីទីភ្នាក់ងារសារព័ត៌មានចិនស៊ិនហួ (Xinhua) បានឱ្យដឹងថា ក្រុមហ៊ុនផលិតសម្ភារៈវេជ្ជសាស្ត្រ Tuoren Group ដែលមានមូលដ្ឋាននៅទីក្រុងស៊ីនស៊ាំង (Xinxiang) ខេត្តហឺណាន (Henan) ភាគកណ្តាលនៃប្រទេសចិន បានបង្កើតឈុតការពារវេជ្ជសាស្ត្រ (PPE) មួយប្រភេទដោយបំពាក់នូវប្រព័ន្ធម៉ាស៊ីនត្រជាក់ ជួយសម្រួលឱ្យមានខ្យល់ត្រជាក់សម្រាប់បុគ្គលិកសុខាភិបាល ក្នុងពេលបំពេញការងារនៅក្រោមអាកាសធាតុក្ដៅ ឬត្រូវធ្វើការច្រើនម៉ោងជាប់គ្នា។

ប្រភពដដែលបន្តថា ឈុតការពារវីរុសកូវីដ-១៩ប្រភេទថ្មីនេះ មានភ្ជាប់ជាមួយម៉ាស៊ីនត្រជាក់ដែលផ្ដល់សុវត្ថិភាព ​និងប្រសិទ្ធភាពនៅក្នុងការប្រើប្រាស់។ វាមានការដំឡើងបន្ទះបន្សុទ្ធខ្យល់ និងដំណើរការដោយចុចលើប៊ូតុងបិទ/បើក យ៉ាងងាយស្រួល។ អ្នកប្រើប្រាស់អាចគ្រប់គ្រងសីតុណ្ហភាពឈុតការពារនេះចន្លោះពី ២៦-២៩ អង្សាសេ ដែលវាអាចជួយសម្រួលការងាររបស់បុគ្គលិកសុខាភិបាលឱ្យកាន់តែមានផាសុកភាពនៅពេលមានអាកាសធាតុក្ដៅ។

យ៉ាងណាមិញ មិនទាន់មានប្រភពផ្សព្វផ្សាយអំពីការបញ្ចេញលក់ឱ្យទូលំទូលាយនៅទូទាំងប្រទេសចិននៅឡើយទេ៕

ប្រែសម្រួល៖ សន្យា

ចុចអាន៖ វីរុសបំប្លែងខ្លួនថ្មី ដែលឆ្លងសាហាវបំផុតលើលោក ហើយមិនខ្លាចវ៉ាក់សាំង ចូលដល់ចិន និងអង់គ្លេសហើយ!

ចុចអាន៖ អ៊ីស្រាអែលប្រកាសថា មនុស្សគ្រប់រូបចាំបាច់ត្រូវចាក់វ៉ាក់សាំងកូវីដ ដូសទី៣