ព័ត៌មានអន្ដរជាតិ

WHO បានបង្កើនកម្រិតស្តង់ដាវ៉ាក់សាំងថៃ

បានផុស

៥ years មុន

នៅ

ថ្ងៃចន្ទ ១១ តុលា ២០២១

ដោយ

អាជ្ញាធរបទប្បញ្ញត្តិជាតិថៃ (NRA) សម្រាប់វ៉ាក់សាំងបានឈានដល់កម្រិតទី៣ដែលជាកម្រិតខ្ពស់បំផុតលំដាប់ទី២នៅក្នុងប្រព័ន្ធចំណាត់ថ្នាក់បទប្បញ្ញត្តិរបស់អង្គការសុខភាពពិភពលោក (WHO) កាលពីថ្ងៃទី២៧ ខែសីហា។ នេះបើយោងតាមព័ត៌មានចេញផ្សាយនៅលើវេបសាយ។

ព័ត៌មាននេះត្រូវបានប្រកាសដោយអ្នកស្រីវេជ្ជបណ្ឌិត Marieangela Simao ជំនួយការរបស់អគ្គលេខាធិការ WHO ស្តីពីលទ្ធភាពទទួលបានឱសថ និងផលិតផលសុខភាព នៅក្នុងសន្និសីទអន្តរជាតិនៃអាជ្ញាធរបទប្បញ្ញត្តិឱសថ (ICDRA) ពីថ្ងៃទី២០ដល់២៤ ខែកញ្ញា។

ចំណាត់ថ្នាក់ត្រូវបានផ្តល់ បន្ទាប់ពីក្រុមការងារ WHO មួយបានប្រើ «ឧបករណ៍កំណត់ចំណាត់ថ្នាក់សកល (GBT) របស់អង្គការដើម្បីពិនិត្យគុណភាព សុវត្ថិភាព និងប្រសិទ្ធភាពរបស់វ៉ាក់សាំងដែលផលិតនៅក្នុងប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម WHO បណ្តាប្រទេសកម្រិត៣មានប្រព័ន្ធស្ថិរភាព ដំណើរការល្អ និងបទប្បញ្ញត្តិរួមបញ្ចូលគ្នាជុំវិញការផលិតវ៉ាក់សាំង។

ទន្ទឹមជាមួយគ្នានេះ បណ្តាប្រទេសកម្រិត៤មានប្រព័ន្ធបទប្បញ្ញត្តិកម្រិតខ្ពស់ដែលបង្ហាញពីភស្តុតាងនៃការធ្វើឲ្យប្រសើរឡើងបន្តដំណើរការ។

អ្នកនាំពាក្យរដ្ឋាភិបាលថៃ លោក Thanakorn Wangboonkongchana បាននិយាយថា កាលពីថ្ងៃអាទិត្យម្សិលមិញ លោកនាយករដ្ឋមន្ត្រី ប្រាយុទ្ធ ចាន់អ៊ូចា រីករាយដែលបានឮដំណឹងដ៏ជោគជ័យនេះ។ លោកនាយករដ្ឋមន្ត្រីបានកោតសរសើរដល់មន្ត្រីឱសថ និងសុខាភិបាលទាំងអស់សម្រាប់ការប្រឹងប្រែងអភិវឌ្ឍប្រព័ន្ធសុខភាពសាធារណៈនេះ។

លោកមានប្រសាសន៍ថា ការប្រឹងប្រែងចេះតែបន្តនឹងជួយធ្វើឲ្យអាជ្ញាធរបទប្បញ្ញត្តិជាតិរបស់ប្រទេសកាន់តែល្អប្រសើរឡើងនៅក្នុងវិស័យផ្សេងៗទៀត៕

ប្រែសម្រួល៖ វីរបុត្រ
ប្រភព៖ bangkokpost