ជា​​រឿង​​កម្រ​ មេ​​ដឹក​​នាំ​​កូរ៉េ​​ទាំង​​ពីរ​​ផ្លាស់​​ប្តូរ​​លិខិត​មិត្តភាព​​គ្នា​​ចំ​​ពេល​​តាន​​តឹង

មេ​ដឹក​នាំ​របស់​ប្រទេស​កូរ៉េ​ខាង​ជើង លោក គីម ជុងអ៊ុន ​បាន​ផ្ញើ​លិខិត​មិត្តភាព​ឆ្លើយ​តប​ទៅ​​ប្រធានាធិបតី​កូរ៉េ​ខាង​ត្បូង​ជិត​ផុត​អាណត្តិ លោក  Moon Jae-in និង​បាន​អរគុណ​​​ចំពោះ​​ការ​ប្រឹង​ប្រែង​ធ្វើ​ឲ្យ​ទំនាក់​ទំនង​ល្អ​ប្រសើរ។

ការ​​ផ្ញើ​លិខិត​ផ្លាស់​ប្តូរ​គ្នា​បាន​កើត​មាន​ឡើង​ផ្ទុយ​ទៅ​នឹងខាង​ក្រោយ​ឆាក​នៃ​ទំនាក់​ទំនង​​​​ចាប់​តាំង​ពី​បរាជ័យ​ក្នុង​កិច្ច​ប្រជុំ​កូរ៉េ​ខាង​ជើង-អាមេរិក​កាល​ពី​ឆ្នាំ​២០១៩ និង​បាន​ធ្វើ​ឲ្យ​កើន​ឡើង​នូវ​ភាព​តាន​តឹងខ្លាំង​ បន្ទាប់​ពី​ទី​ក្រុង​​ព្យុងយ៉ាង​បាន​បាញ់​សាក​ល្បង​មីស៊ីល​ឆ្លង​ទ្វីប​ (ICBMs) កាល​ពី​ខែ​មុន​។

ទី​ភ្នាក់​ងារ​សារព័ត៌មាន​ផ្លូវ​ការ​របស់​កូរ៉េ​ខាង​ជើង KCNA បានផ្សាយ​នៅ​ថ្ងៃ​សុក្រ ទី​២២ ខែ​មេសា​នេះ​ថា លោក Moon បាន​ផ្ញើ​លិខិត​មួយ​ច្បាប់​កាល​ពី​ថ្ងៃ​ពុធ និង​បាន​សន្យា​​បន្ត​ព្យាយាម​ដាក់​​មូលដ្ឋាន​គ្រឹះ​នៃ​ការ​រួប​រួម​ដោយ​ផ្អែក​លើ​​សេចក្តី​ប្រកាស​រួម​​កាលពី​កិច្ច​ប្រជុំ​កំពូល​ឆ្នាំ​២០១៨ ទោះ​ជា​ស្ថានភាព​លំបាក​ក៏​ដោយ»។

ការិយាល័យ​របស់​លោក Moon បាន​បញ្ជាក់​ថា លោក​ប្រធានាធិបតី​ពិត​ជា​​បាន​ផ្លាស់​ប្តូរ​លិខិត​​មិត្តភាព​ជា​មួយ​លោក គីម ជុងអ៊ុន​ មែន។

ស្ត្រី​អ្នក​នាំ​ពាក្យ Park Kyung-mee បាន​ប្រាប់​អ្នក​កាសែត​ថា ក្នុង​ខ្លឹមសារ​លិខិត លោក Moon បាន​លើក​ឡើង​៖«យុគ​សម័យ​នៃ​ការ​ប្រឈម​មុខ​ដាក់​គ្នា​គួរ​ត្រូវ​បាន​យក​ឈ្នះ​ដោយ​ការ​សន្ទនា ហើយ​ថា ការ​ទំនាក់​ទំនង​អន្តរកូរ៉េ​ឥឡូវ​នេះ​គឺ​ជា​ការងារ​សម្រាប់​រដ្ឋបាល​ប្រធានាធិបតី​បន្ទាប់»។

លោក Moon ក៏​បាន​សម្តែង​នូវ​សេចក្តី​សង្ឃឹម​សម្រាប់​​ការបន្ត​កិច្ចពិភាក្សា​​ស្តីពី​ការ​រំសាយ​អាវុធ​នុយក្លេអ៊ែរ​អាមេរិក-កូរ៉េខាង​ជើង។

KCNA បាន​ផ្សាយ​ថា លោក គីម បាន​និយាយ​ក្នុង​លិខិត​ឆ្លើយ​តប​វិញ​ក្នុង​ថ្ងៃ​ព្រសហ្បតិ៍​ថា ៖«កិច្ច​ប្រជុំ​កំពូល​ជា​ប្រវត្តិ​សាស្ត្រ​​ផ្តល់​នូវ​សេចក្តី​សង្ឃឹម​ដល់​ប្រជា​ជន​នា​ពេល​អនាគត» ហើយ​​ប្រទេស​ទាំង​ពីរ​បាន​យល់​ព្រម​ថា ទំនាក់​ទំនង​គួរ​អភិវឌ្ឍ ប្រសិន​បើ​ភាគី​ទាំង​ពីរ«ធ្វើ​ការ​ប្រឹង​ប្រែង​ដោយ​មិន​គិត​ពី​ការ​នឿយ​ហត់​ដើម្បី​ក្តី​សង្ឃឹម»។

«លោក គីម ជុងអ៊ុន បាន​កោត​សរសើរ​ចំពោះ​ការលះ​បង់ និង​ប្រឹង​ប្រែង​របស់​លោក Moon Jae-in សម្រាប់​បុព្វហេតុ​ជាតិ​រហូត​ដល់​ថ្ងៃ​ចុង​ក្រោយ​នៃ​អាណត្តិ​របស់​លោក»។  KCNA បាន​ផ្សាយ និង​បន្ថែម​ថា ការ​ផ្លាស់​ប្តូរ​លិខិត​គ្នា​គឺ​ជា​ការ​បង្ហាញ​ពី​ការ​ទុក​ចិត្ត​​ជ្រាល​​ជ្រៅ​ទៅ​វិញ​ទៅ​មក។

ការ​ផ្លាស់​ប្តូរ​លិខិត​មិត្ត​ភាព​​បាន​​កើត​ឡើង​ចំពេល​ដែល​តំណាង​ពិសេស​របស់​សហរដ្ឋ​អាមេរិក​សម្រាប់​​កូរ៉េ​ខាង​ជើង លោក Sung Kim ស្ថិត​នៅ​ទី​ក្រុង​សេអ៊ួល ដើម្បី​ពិភាក្សា​​​ជា​មួយ​មន្ត្រី​កូរ៉េ​ខាង​ត្បូង​ក្នុង​សប្តាហ៍​នេះ។ លោក Sung Kim បាន​និយាយ​ថា លោក​បើក​ចំហរ​​សម្រាប់​កិច្ច​ពិភាក្សា​ជា​មួយ​កូរ៉េ​ខាង​ជើង​ពេល​ណា​មួយ​ដោយ​គ្មាន​លក្ខខណ្ឌ​ទុក​ជា​មុន៕

ប្រែ​សម្រួល៖ វីរបុត្រ
ប្រភព៖ KCNA