ស្ថានការណ៍កាន់តែវឹកវរ! បាតុករដុតកម្ទេច ផ្ទះមេដឹកនាំ ស្រីលង្កា

បាតុករមានកំហឹងនៅក្នុងប្រទេសស្រីលង្កា បានដុតបំផ្លាញផ្ទះជាច្រើនខ្នងដែលជាកម្មសិទ្ធិរបស់ត្រកូល Rajapaksa កំពុងកាន់អំណាចនិងសមាជិកសភា។

អំពើហិង្សាបានកើតឡើងចំពេលមានភាពចលាចល ដែលធ្វើឲ្យលោកនាយករដ្ឋមន្ត្រី Mahinda Rajapaksa លាលែងពីតំណែង ខណៈមានការតវ៉ាទ្រង់ទ្រាយធំ ចំពោះការដោះស្រាយវិបត្តិសេដ្ឋកិច្ចរបស់រដ្ឋាភិបាល។

យ៉ាងណាក្តី ការលាលែងនេះ មិនបាន​ធ្វើ​ឲ្យ​បាតុករ​ស្ងប់​ស្ងាត់នោះទេ ហើយបាតុករថែមទាំង​ប៉ុនប៉ង​សម្រុក​ចូល​ទៅ​ក្នុង​លំនៅដ្ឋាន​ផ្លូវការ​របស់​គាត់ ទាំងគាត់​​នៅ​ខាង​ក្នុងទៀតផង។

មនុស្ស៧នាក់បានស្លាប់ និងជាង១៩០នាក់រងរបួស ចាប់តាំងពីថ្ងៃចន្ទមក។ បម្រាម​គោចរ​ទូទាំង​កោះនេះ ​ត្រូវ​បានពង្រីក​ដល់​ព្រឹក​ថ្ងៃ​ពុធ ខណៈ​អាជ្ញាធរ​ព្យាយាម​បង្ក្រាប​អំពើ​ហិង្សា។

មនុស្សជាច្រើននៅតែអំពាវនាវឲ្យលោកប្រធានាធិបតី Gotabaya Rajapaksa ដែលជាបងប្រុសរបស់លោក Mahinda ចុះចេញពីតំណែង បន្ទាប់ពីបាតុកម្មពុះកញ្ជ្រោលជាច្រើនសប្តាហ៍ជុំវិញការឡើងថ្លៃ និងការដាច់ភ្លើងចាប់តាំងពីខែមុនមក។

កាលពីថ្ងៃចន្ទ អ្នកគាំទ្ររដ្ឋាភិបាល បានប៉ះទង្គិចគ្នាយ៉ាងហិង្សាជាមួយក្រុមបាតុករក្នុងរដ្ឋធានីកូឡុំបូ នៅខាងក្រៅលំនៅដ្ឋាន Temple Trees របស់លោក Mahinda Rajapaksa ហើយបន្ទាប់មកនៅកន្លែងតវ៉ាសំខាន់ Galle Face Green។

ប៉ូលិស និងក្រុមបង្ក្រាបកុបកម្ម ត្រូវបានដាក់ពង្រាយ ហើយឧស្ម័នបង្ហូរទឹកភ្នែក និងកាណុងបាញ់ទឹក បានបាញ់ទៅលើអ្នកគាំទ្ររដ្ឋាភិបាល បន្ទាប់ពីពួកគេផ្គើននឹងការព្រមានរបស់ប៉ូលិស ហើយបានវាយប្រហារក្រុមអ្នកតវ៉ាដោយប្រើដំបង និងព្រនង់។

ប៉ូលិសស្រីលង្កានិយាយថា ក្រុមបាតុករខឹងសម្បាបានសងសឹក ដោយវាយប្រហារអ្នកគាំទ្ររដ្ឋាភិបាល និងកំណត់គោលដៅសមាជិកសភាបក្សកាន់អំណាច។

នៅ​ពេល​យប់​ចូលមកដល់ ក្រុម​អ្នក​តវ៉ា​នៅ​ទូទាំង​ប្រទេស ​បាន​ដុត​បំផ្លាញ​ផ្ទះ​សម្បែង​របស់​ត្រកូល​ Rajapaksa, រដ្ឋមន្ត្រី និង​សមាជិក​សភា​ផ្សេងៗ​គ្នា។ នេះ​រួម​ទាំង​ផ្ទះ​មួយ​ខ្នង ដែលត្រូវបានប្រែ​ក្លាយ​ទៅ​ជា​សារមន្ទីរ​ដ៏​ចម្រូងចម្រាស​​ដោយគ្រួសារត្រកូល Rajapaksas ក្នុង​ភូមិ​ដូនតា​របស់​គ្រួសារ​នៅ Hambantota នៅ​ភាគ​ខាង​ត្បូង​ស្រីលង្កា ផងដែរ។

យោងតាមរបាយការណ៍បានឲ្យដឹងថា តំបន់នៅជិតលំនៅដ្ឋានផ្លូវការរបស់ប្រធានាធិបតី ក៏ត្រូវបានដុតបំផ្លាញដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ នាយករដ្ឋមន្ត្រី ស្រីលង្កា លាលែងពីតំណែង