ស្រីលង្កា ស្នើសុំឲ្យ ចិន ជួយ

ប្រទេសស្រីលង្កា បានស្នើឲ្យចិនជួយលើវិស័យពាណិជ្ជកម្ម ការវិនិយោគ និងទេសចរណ៍ ដើម្បីជួយឲ្យខ្លួនរីកចម្រើនប្រកបដោយនិរន្តរភាព។ នេះបើតាមសម្តី បេសកជនរបស់ទីក្រុងកូឡុំបូប្រចាំទីក្រុងប៉េកាំង កាលពីថ្ងៃចន្ទទី២៥ខែកក្កដា ខណៈខ្លួន កំពុងចរចាសម្រាប់កញ្ចប់ថវិកាសង្គ្រោះបន្ទាន់ចំនួន៤ពាន់លានដុល្លារ ដើម្បីជួយប្រទេសងើបចេញពីការដួលរលំនៃសេដ្ឋកិច្ច។

ប្រទេសដែលមានប្រជាជន ២២ លាននាក់មួយនេះ​ កំពុងទទួលរងនូវវិបត្តិសេដ្ឋកិច្ចដ៏អាក្រក់បំផុតចាប់តាំងពីការទទួលបានឯករាជ្យនៅឆ្នាំ១៩៤៨។

ការសង្កត់ធ្ងន់របស់ឯកអគ្គរដ្ឋទូត Palitha Kohona លើប្រទេសចិន គឺជាចំណុចគន្លឹះចំពោះការស្តារសេដ្ឋកិច្ចរបស់ប្រទេសស្រីលង្កា ហើយឆ្លុះបញ្ចាំងពីឋានៈរបស់ទីក្រុងប៉េកាំងជាម្ចាស់បំណុលបរទេសធំជាងគេលំដាប់ទីពីររបស់ប្រទេសស្រីលង្កា រួមជាមួយនឹងប្រទេសជប៉ុន។ ចិន ក៏កាន់កាប់ ១០% នៃបំណុលខាងក្រៅរបស់ស្រីលង្កាផងដែរ។

ក្នុងបទសម្ភាសន៍ជាមួយ Reuters នៅស្ថានទូតក្រុងប៉េកាំងប្រចាំប្រទេសស្រីលង្កា លោក Kohona បាននិយាយថា ទីក្រុង កូឡុំបូ ចង់ឲ្យប្រទេសចិន ស្នើសុំក្រុមហ៊ុនរបស់ខ្លួន ទិញតែខ្មៅ ត្បូងកណ្តៀង គ្រឿងទេស និងសម្លៀកបំពាក់របស់ស្រីលង្កា និង ធ្វើឲ្យច្បាប់នាំចូលរបស់ចិនកាន់តែមានតម្លាភាព និងងាយស្រួល។

លោកបន្តថា រដ្ឋាភិបាលក្រុងប៉េកាំងក៏អាចជួយតាមរយៈការចាក់បញ្ចូលការវិនិយោគបន្ថែម ទៅក្នុងគម្រោងកំពង់ផែដ៏ធំដែលគាំទ្រដោយប្រទេសចិននៅក្នុងទីក្រុង កូឡុំបូ និង Hambantota ផងដែរ។

យោងតាមលោក Kohona, ផែនការវិនិយោគសំខាន់ៗរបស់ចិន មិនបានសម្រេចទេ ដោយសារតែជំងឺរាតត្បាត។ លើសពីនេះទៀត ស្រីលង្កាចង់ឃើញភ្ញៀវទេសចរចិនកាន់តែច្រើនចូលមកក្នុងប្រទេស បន្ទាប់ពីតួលេខបានធ្លាក់ចុះពី២៦៥ ០០០នាក់ក្នុងឆ្នាំ២០១៨ មកស្ទើរតែសូន្យ ក្រោយការវាយប្រហារអត្តឃាត និងជំងឺរាតត្បាតឆ្នាំ២០១៩៕

ប្រែសម្រួល៖ Vann Vann

ប្រភព៖ TOI

ចុចអាន៖ លោក Ranil Wickremesinghe ស្បថចូលកាន់តំណែងប្រធានាធិបតី ស្រីលង្កា ចំពេលមានចលាចល