មូលហេតុ ប្រទេស តួកគី ប្តូរឈ្មោះ

ប្រទេសតួកគី (Turkey) នឹងត្រូវបានគេស្គាល់ថា Türkiye នៅអង្គការសហប្រជាជាតិ (UN) ​ចាប់ពីពេលនេះតទៅ បន្ទាប់ពីខ្លួនបានយល់ព្រមលើសំណើផ្លូវការពីទីក្រុងអង់ការ៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថាប័នអន្តរជាតិជាច្រើន នឹងត្រូវបានស្នើសុំឲ្យធ្វើការផ្លាស់ប្ដូរឈ្មោះនេះ ជាផ្នែកនៃយុទ្ធនាការប្ដូរឈ្មោះថ្មី ដែលធ្វើឡើងដោយប្រធានាធិបតីតួកគីកាលពីចុងឆ្នាំមុន។

ប្រធានាធិបតីតួកគី លោក Recep Tayyip Erdogan បាននិយាយកាលពីខែធ្នូថា “ការប្តូរឈ្មោះទៅ Türkiye គឺដើម្បីជាការតំណាង និងជាការបង្ហាញដ៏ល្អបំផុតនៃវប្បធម៌ អរិយធម៌ និងគុណតម្លៃរបស់ប្រជាជនតួកគី”។

ប្រជាជនតួកគីភាគច្រើន ស្គាល់ប្រទេសរបស់ពួកគេរួចហើយថាជា Türkiye។ ទោះបីជាយ៉ាងណាក៏ដោយ ទម្រង់មកពីពាក្យថា Turkey ត្រូវបានគេប្រើយ៉ាងទូលំទូលាយ សូម្បីតែនៅក្នុងប្រទេស។

ជាផ្នែកមួយនៃការប្តូរឈ្មោះនេះ, ពាក្យថា “Made in Türkiye” នឹងដាក់លើផលិតផលនាំចេញទាំងអស់ ហើយនៅក្នុងខែមករា យុទ្ធនាការទេសចរណ៍មួយត្រូវបានចាប់ផ្តើមជាមួយនឹងឃ្លា “Hello Türkiye”។

គួរបញ្ជាក់ថា វាមិនមែនជារឿងចម្លែកទេ ដែលប្រទេសនានាប្តូរឈ្មោះរបស់ពួកគេ។

នៅឆ្នាំ២០២០ ហូឡង់បានប្តូរឈ្មោះទៅជា Netherlands។ ហើយមុននោះ ម៉ាសេដូនី បានប្តូរឈ្មោះទៅជា ម៉ាសេដូនីខាងជើង ដោយសារជម្លោះនយោបាយជាមួយក្រិច ហើយស្វាស៊ីឡង់បានក្លាយជា អេសវ៉ាធីនី ក្នុងឆ្នាំ ២០១៨។

បន្ថែមពីនេះ ក្នុងប្រវត្តិសាស្ត្រ អ៊ីរ៉ង់ធ្លាប់ត្រូវបានគេហៅថាពែក្ស, សៀមឥឡូវជាប្រទេសថៃ ហើយ រ៉ូដៀសៀ ត្រូវបានប្តូរទៅជា ស៊ីមបាវ៉េ៕

ប្រែសម្រួល៖ Vann Vann

ប្រភព៖ BBC

ចុចអាន៖ ប្រទេស តួកគី ប្តូរឈ្មោះថ្មីជាផ្លូវការ