នាវាចម្បាំងរុស្ស៊ី និងចិន បាញ់កាំភ្លើងយន្តនៅសមុទ្រជប៉ុន អំឡុងសមយុទ្ធ Vostok 2022

យោងតាមក្រសួងការពារជាតិជប៉ុន, នាវាចំនួនប្រាំមួយគ្រឿង មកពីកងទ័ពជើងទឹករុស្ស៊ី និងចិន បានបាញ់កាំភ្លើងយន្តនៅសមុទ្រជប៉ុន ដែល​ជា​ផ្នែកមួយ​នៃ​សមយុទ្ធ​យោធា “Vostok-2022” ​ដ៏ធំ​របស់​រុស្ស៊ី។

ក្រសួងនិយាយថា កងកម្លាំងស្វ័យការពារដែនសមុទ្ររបស់ប្រទេសជប៉ុន សូមបញ្ជាក់ថា នាវាចម្បាំងរុស្ស៊ីចំនួន ៣គ្រឿង និងនាវាចិនចំនួន ៣គ្រឿង បានធ្វើដំណើរទៅទិសខាងកើតក្នុងដែនទឹក ដែលមានចម្ងាយប្រហែល ១៩០ គីឡូម៉ែត្រ ភាគខាងលិចទីក្រុង Cape Kamui ក្នុងខេត្តភាគខាងជើង ហុកកៃដូ របស់ប្រទេសជប៉ុន កាលពីរសៀលថ្ងៃសៅរ៍។

ក្រសួងបន្តថា នាវារបស់ចិនរួមមានទាំងនាវាពិឃាតផងដែរ។

នាវាទាំងប្រាំមួយគ្រឿង បានបាញ់កាំភ្លើងយន្តនៅក្នុងដែនទឹកនោះ ហើយក្រោយមក នាវាទាំងអស់បានធ្វើដំណើរឆ្លងកាត់ច្រកសមុទ្រ Soya ចូលទៅសមុទ្រ Okhotsk។

មកទល់ពេលនេះ ក្រសួងការពារជាតិជប៉ុន កំពុងបន្តតាមដាន ស្ថានការណ៍ យ៉ាងដិតដល់ជាទីបំផុត។

គួរបញ្ជាក់ថា កាលពីថ្ងៃព្រហស្បតិ៍ទី០១ខែកញ្ញា រុស្សីបានធ្វើសមយុទ្ធរយៈពេលមួយសប្តាហ៍ដែលមានឈ្មោះថា Vostok នៅសមុទ្រជប៉ុន និងតំបន់ផ្សេងៗទៀត។

សមយុទ្ធនេះ មានការចូលរួមពី​កម្លាំង​មក​ពី​ប្រទេស​ចិន និង​ប្រទេស​ផ្សេង​ទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ NHK

ចុចអាន៖ ចំណុចសំខាន់ៗ ដែលអ្នកគួរដឹងអំពីសមយុទ្ធ Vostok 2022