អាមេរិក ញាប់ដៃញាប់ជើងរកការអភិវឌ្ឍអាវុធល្បឿនលឿនជាងសំឡេង ទុកប្រជែងចិន និងរុស្ស៊ី

បើយោងតាមលោកមេបញ្ជាការ Johnny Wolfe នាយកកម្មវិធីប្រព័ន្ធយុទ្ធសាស្ត្ររបស់កងទ័ពជើងទឹកសហរដ្ឋអាមេរិកបានឲ្យដឹងថា ទីក្រុងវ៉ាស៊ីនតោនគ្រោងនឹងអភិវឌ្ឍអាវុធលឿនជាងសំឡេងលឿន ដើម្បីប្រជែងជាមួយរុស្ស៊ី និងចិន នៅក្នុងវិស័យមួយនេះ ។

លោក Wolfe បានថ្លែងទៅកាន់សារព័ត៌មាន CNN ថា “រហូតមកដល់ពេលនេះ អាមេរិកកំពុងខ្វះអ្នកជំនាញពិតប្រាកដ ដែលស្ទាត់ក្នុងបច្ចេកវិទ្យាដាក់បញ្ចូលទៅក្នុងប្រព័ន្ធអាវុធនោះនៅឡើយទេ ខណៈដែលប្រទេសរុស្ស៊ី និងចិនបានបង្កើតអាវុធបែបនេះរួចទៅហើយ” ។

សេចក្តីថ្លែងការណ៍របស់លោក Wolfe បានកើតឡើង បន្ទាប់ពីប្រទេសរុស្ស៊ីបានប្រើប្រាស់មីស៊ីលល្បឿនលឿនជាងសំឡេង Kinzhal ដោយជោគជ័យ ក្នុងអំឡុងពេលសង្គ្រាមលុកលុយ ដែលកំពុងបន្តនៅប្រទេសអ៊ុយក្រែនក្នុងឆ្នាំនេះ និងបន្ទាប់ពីប្រទេសចិន បានសាកល្បងអាវុធល្បឿនលឿនជាងសំឡេងរបស់ខ្លួនផងដែរនៅឆ្នាំ ២០២១ ។

ដោយឡែក បើយោងតាមទីភ្នាក់ងារស្រាវជ្រាវសភាអាមេរិកបានឲ្យដឹងថា មន្ទីរបញ្ចកោណបានស្នើរសុំប្រាក់ ៤.៧ ពាន់លានដុល្លារសម្រាប់ការស្រាវជ្រាវអាវុធល្បឿនលឿនជាងសំឡេង ក្នុងឆ្នាំសារពើពន្ធបន្ទាប់ ពោលកើនឡើងពី ៣.៨ ពាន់លានដុល្លារ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik / CNN

ចុចអាន ៖ កូរ៉េខាងត្បូង សុំឲ្យ រុស្ស៊ី និងចិន ជួយ