រុស្ស៊ី និង ចិន ជឿថា សង្រ្គាមនុយក្លេអ៊ែរ គ្មានអ្នកឈ្នះឡើយ

រុស្ស៊ី និងចិនជឿជាក់ថា សង្រ្គាមនុយក្លេអ៊ែរគ្មានអ្នកឈ្នះឡើយ ហើយមិនត្រូវបង្កឲ្យមាននោះទេ។ នេះបើយោងតាមសេចក្តីថ្លែងការណ៍រួម ស្តីពីការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ នៃការសម្របសម្រួលសម្រាប់យុគសម័យថ្មី ដែលចុះហត្ថលេខាដោយប្រធានាធិបតីរុស្ស៊ីលោក វ្ល៉ាឌីមៀរ ពូទីន និងប្រធានាធិបតីចិនលោក ស៊ី ជីនពីង កាលពីថ្ងៃអង្គារទី២១ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍ដដែលបន្តថា “ដោយសង្កត់ធ្ងន់លើសារសំខាន់នៃសេចក្តីថ្លែងការណ៍រួមរបស់មេដឹកនាំនៃប្រទេសមានអាវុធនុយក្លេអ៊ែរទាំង៥ ស្តីពីការទប់ស្កាត់សង្គ្រាមនុយក្លេអ៊ែរនិងការប្រកួតប្រជែងសព្វាវុធ ភាគីទាំងពីរបានបញ្ជាក់ជាថ្មីម្តងទៀតថា មិនអាចមានអ្នកឈ្នះទេនៅក្នុងសង្គ្រាមនុយក្លេអ៊ែរ ហើយសង្គ្រាមនេះ ដាច់ខាតមិនត្រូវបង្កឡើងឡើយ”។

ស្របពេលជាមួយគ្នានោះ រុស្ស៊ីនិងចិន បានអំពាវនាវឲ្យប្រទេសជាហត្ថលេខីទាំងអស់ ត្រូវខិតខំប្រឹងប្រែងដើម្បីកាត់បន្ថយហានិភ័យនៃការផ្ទុះសង្គ្រាមនុយក្លេអ៊ែរ និងជម្លោះប្រដាប់អាវុធណាមួយរវាងរដ្ឋដែលមានអាវុធនុយក្លេអ៊ែរ។

សេចក្តីថ្លែងការណ៍បានសង្កត់ធ្ងន់ទៀតថា “មហាអំណាចនុយក្លេអ៊ែរទាំងអស់ មិនត្រូវដាក់ពង្រាយអាវុធនុយក្លេអ៊ែរនៅខាងក្រៅទឹកដីជាតិរបស់ពួកគេនោះទេ ហើយត្រូវតែដកអាវុធនុយក្លេអ៊ែររបស់ពួកគេទាំងអស់ដែលដាក់នៅបរទេស”។

មេដឹកនាំទាំងពីរ ក៏បានប្តេជ្ញាបន្តកិច្ចខិតខំប្រឹងប្រែងដើម្បីថែរក្សា និងពង្រឹងផលប្រយោជន៍នៃការរក្សាសន្តិភាព និងសន្តិសុខអន្តរជាតិផងដែរ៕

ប្រែសម្រួល៖ Vann Vann

ប្រភព៖ TASS

ចុចអាន៖ ពូទីន ព្រមានបញ្ចេញប្រតិកម្មទាំងបង្ខំចិត្ត បើលោកខាងលិច បញ្ជូនគ្រាប់ផ្ទុក សារ ធាតុ វិទ្យុ សកម្ម ទៅឲ្យអ៊ុយក្រែន