ប្រមុខណាតូ ៖ រុស្ស៊ី សុំអាវុធពី ចិន ក្នុងជំនួបរវាងប្រធានាធិបតីទាំងពីរ

អគ្គលេខាធិការអង្គការណាតូលោក Jens Stoltenberg បានប្រាប់អ្នកយកព័ត៌មាននៅទីក្រុងប្រ៊ុចសែលកាលពីថ្ងៃអង្គារថា រុស្ស៊ីប្រហែលជាបានស្នើសុំអាវុធពីចិន ក្នុងជំនួបរវាងលោកប្រធានាធិបតី វ្ល៉ាឌីមៀរ ពូទីន និងលោក ស៊ី ជីនពីង នៅទីក្រុងមូស្គូ ។

លោក Stoltenberg បានបន្ថែមថា អង្គការណាតូឃើញសញ្ញាមួយចំនួនដែលរុស្ស៊ីបានស្នើសុំការចែកចាយអាវុធពីប្រទេសចិន ប៉ុន្តែទោះជាយ៉ាងណា បញ្ហានេះកំពុងស្ថិតនៅក្នុងការពិចារណាពីសំណាក់អាជ្ញាធរចិន ។

ប្រមុខអង្គការណាតូរូបនេះបញ្ជាក់ថា “សាររបស់យើងនៅពេលនេះ គឺថាចិនមិនគួរផ្តល់ជំនួយដ៍សាហាវៗដល់រដ្ឋាភិបាលទីក្រុងមូស្គូនោះទេ ព្រោះថា វានឹងក្លាយទៅជាការគាំទ្រដល់សង្រ្គាមខុសច្បាប់” ។

ទន្ទឹមនោះ លោក Stoltenberg ក៏បានលើកឡើងដែរថា កិច្ចប្រជុំរបស់លោក ពូទីន និងលោក ស៊ី នៅក្នុងទីក្រុងមូស្គូកាលពីពេលថ្មីៗនេះ កាន់តែធ្វើឲ្យចិន និងរុស្ស៊ីធ្វើការកាន់តែជិតស្និទ្ធ ក៏ដូចជាកសាងភាពជាដៃគូជាមួយគ្នាកាន់តែរឹងមាំ ។

គួរបញ្ជាក់ថា លោក ស៊ី ជីនពីង បានធ្វើដំណើរទស្សនកិច្ចផ្លូវដ្ឋទៅកាន់ប្រទេសរុស្ស៊ីរយៈពេល ៣ ថ្ងៃ តបតាមការអញ្ជើញរបស់លោក ពូទីន ហើយវាក៏ជាដំណើរទស្សនកិច្ចលើកដំបូងរបស់លោកផងដែរទៅកាន់ទីក្រុងមូស្គូ ចាប់តាំងពីផ្ទុះប្រតិបត្តិការសឹករបស់រុស្ស៊ីទៅលើប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ដឹងទេ លោក ស៊ី ជីនពីង ធ្វើទស្សនកិច្ចនៅ រុស្ស៊ី ប៉ុន្មានលើកហើយ ចាប់តាំង ពីក្លាយជាប្រធានាធិបតីចិន?