ទេសចរក្នុងស្រុករបស់ ចិន ស្ទុះងើបឡើងវិញដល់កម្រិតមុនកូវីដ

ទិន្នន័យពីរដ្ឋាភិបាលចិនបានបង្ហាញកាលពីថ្ងៃពុធថា អាជីវកម្មទេសចរណ៍របស់ចិន ក្នុងអំឡុងពេលថ្ងៃឈប់សម្រាកខែឧសភា បានស្ទុះងើបឡើងវិញដល់កម្រិតមុនកូវីដ ដោយសារចំនួនការធ្វើដំណើរក្នុងស្រុកបានកើនឡើង ៧០.៨ ភាគរយ ធៀបនឹងឆ្នាំមុន ។

ក្រសួងវប្បធម៌ និងទេសចរណ៍ចិន បាននិយាយនៅលើគេហទំព័ររបស់ខ្លួនថា ការធ្វើដំណើរក្នុងស្រុកសរុបរបស់ប្រជាជនចិនមានចំនួន ២៧៤ លានដង ក្នុងអំឡុងពេលឈប់សម្រាករយៈពេល ៥ ថ្ងៃ ចាប់តាំងពី​ថ្ងៃ២៩ មេសា ដល់ថ្ងៃទី៣ ខែឧសភា ពោលគឺកើនឡើង ៧០.៨ ភាគរយ​ធៀបនឹងឆ្នាំមុន និងច្រើនជាង ១៩ ភាគរយច្រើនក្នុងឆ្នាំ ២០១៩ ។

ក្នុងអំឡុងពេលនៃការធ្វើដំណើរកម្សាន្តនេះដែរ ភ្ញៀវទេសចរចិនបានចំណាយសរុបចំនួន ២១.៤២ ពាន់លានដុល្លារ កើនឡើង ១២៩ ភាគរយ ធៀបនឹងឆ្នាំមុន ហើយស្មើនឹងកម្រិតឆ្នាំ ២០១៩ ។

ទន្ទឹមនឹងនេះ វិទ្យាស្ថានទេសចរណ៍ចិនប៉ាន់ប្រមាណថា ការធ្វើដំណើរទេសចរណ៍ក្នុងស្រុកប្រហែល ៤.៥៥ ពាន់លាន នឹងត្រូវបានធ្វើឡើងនៅឆ្នាំនេះ ដោយនឹងកើនឡើង ៧៣ ភាគរយពីឆ្នាំ ២០២២ ។

ជាចុងក្រោយក្រសួងវប្បធម៌ និងទេសចរណ៍ចិនបញ្ជាក់ថា ទម្រាំឈានដល់ការសម្រេចបាននេះ ខាងក្រសួងបានចាប់ផ្តើមយុទ្ធនាការរយៈពេល ១ ខែក្នុង អំឡុងពេលវិស្សមកាលខែឧសភា ដើម្បីលើកកម្ពស់ការធ្វើដំណើរក្នុងស្រុក និងការកម្សាន្តផ្សេងៗជាដើម ហើយរដ្ឋាភិបាលក្នុងតំបន់ក៏កំពុងខិតខំប្រឹងប្រែងលើបញ្ហានេះផងដែរ ៕

ប្រែសម្រួល ៖ នាង​ រតនៈ

ប្រភព ៖ Zawya

ចុចអាន ៖ ចិន ប្រកាសសហការជាមួយរុស្ស៊ី ដោះស្រាយ វិបត្តិ អ៊ុយក្រែន