មកដឹងគោលនយោបាយដែលនាំ គណបក្សចលនាឆ្ពោះទៅមុខ ឈ្នះការ​បោះឆ្នោតនៅ ថៃ

គណៈកម្មាធិការរៀបចំការបោះឆ្នោតថៃ (EC) បានបញ្ចប់ការរាប់សន្លឹកឆ្នោតហើយកាលពីថ្ងៃចន្ទ ទី១៥ ខែឧសភា ហើយជាលទ្ធផលគណបក្សចលនាឆ្ពោះទៅមុខ (MFP) ទទួលបានជ័យជម្នះលើគណបក្សថៃរួបរួមជាតិ (UTN) របស់លោក ប្រាយុទ្ធ ចាន់អូចា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុននឹងឈានដល់សម្រេចគោលដៅឈ្នះឆ្នោតនេះដែរ គណបក្សប្រឆាំងដែលដឹកនាំដោយលោក ភីថា លីមចារើនរ៉ាត់ (Pita Limjaroenrat) បានដាក់ចេញគោលនយោបាយធំៗមួយចំនួនដូចជា នាំប្រទេសថៃទៅរកលទ្ធិប្រជាធិបតេយ្យ, ប្រឆាំងរបបយោធានិយម, ការធ្វើឲ្យស្របច្បាប់នៃពិពាហ៍ពិពាហ៍ភេទដូចគ្នា, សមភាពសេដ្ឋកិច្ច, លុបចោលការកេនប្រជាពលរដ្ឋចូលបម្រើយោធា, ការស្វែងរកប្រជាមតិទាក់ទងនឹងការសរសេររដ្ឋធម្មនុញ្ញឡើងវិញ និងកំណែទម្រង់របបរាជានិយមជាដើម ។

គណបក្សនេះត្រូវបានបង្កើតឡើងក្នុងឆ្នាំ២០១៤ ដែលមានឈ្មោះដើមជាគណបក្ស Ruam Pattana Chart Thai ហើយក្រោយមកបានប្តូរឈ្មោះមកជាគណបក្ស Phung Luang ប៉ុន្តែនៅឆ្នាំ២០២០ គណបក្សនេះបានដាក់ឈ្មោះថ្មីថា គណបក្សអនាគតឆ្ពោះទៅមុខ (FFP) ដែលដឹកនាំដោយលោក Thanathorn Juangroongruangkit ប៉ុន្តែមិនបានប៉ុន្មានផង គណបក្សក៏ត្រូវបានរំលាយវិញដោយដីការបស់តុលាការធម្មនុញ្ញយោធាថៃ ។

ចំណែកពាក់ព័ន្ធនឹងលទ្ធផលបោះឆ្នោតវិញ គណៈកម្មាធិការរៀបចំការបោះឆ្នោតថៃ (EC) បានប្រកាសថា គណបក្សចលនាឆ្ពោះទៅមុខទទួលបានអាសនៈសរុប ១៥១ បន្ទាប់មកគណបក្សភឿថៃទទួលបាន ១៤១ អាសនៈ, គណបក្សភូមិចៃថៃបាន ៧១ អាសនៈ ខណៈគណបក្សថៃរួបរួមជាតិរបស់លោក ប្រាយុទ្ធ ទទួលបានត្រឹមតែ ៣៦ អាសនៈប៉ុណ្ណោះ ៕

ប្រែសម្រួលដោយ ៖ ជីវ័ន្ត

ប្រភព ៖ Wikipedia

ចុចអាន ៖ មកស្គាល់បេក្ខជននាយករដ្ឋមន្ត្រីថ្មីរបស់ ថៃ ដែលឈ្នះការបោះឆ្នោត