ឥណ្ឌា៖ យើងនឹងធ្វើអ្វីដែលអាចធ្វើទៅបានដើម្បីជួយដោះស្រាយវិបត្តិនៅអ៊ុយក្រែន

ថ្លែងនៅក្នុងជំនួបផ្ទាល់លើកដំបូង ចាប់តាំងពីសង្គ្រាមលុកលុយរបស់រុស្ស៊ី នាយករដ្ឋមន្ត្រី Narendra Modi បានសន្យានឹងប្រធានាធិបតី Volodymyr Zelenskyy ថា ឥណ្ឌានឹងធ្វើអ្វីដែលអាចធ្វើទៅបាន ដើម្បីដោះស្រាយវិបត្តិនៅអ៊ុយក្រែន។

លោកនាយករដ្ឋមន្ត្រី Modi បាននិយាយថា “ខ្ញុំយល់ពីការឈឺចាប់របស់អ្នក និងការឈឺចាប់របស់ពលរដ្ឋអ៊ុយក្រែនយ៉ាងច្បាស់” ខណៈពេលដែលមេដឹកនាំទាំងពីរបានជួបគ្នានៅខាងក្រៅកិច្ចប្រជុំកំពូល G7 នៅទីក្រុងហ៊ីរ៉ូស៊ីម៉ា ប្រទេសជប៉ុន កាលពីថ្ងៃទី២០ ខែឧសភា ឆ្នាំ២០២៣។ បន្ថែមពីលើនោះ នាយកមន្រ្តីរូបនេះ បញ្ជាក់ថា លោកផ្ទាល់នឹងធ្វើអ្វីគ្រប់យ៉ាងដែលអាចធ្វើបាន ដើម្បីជួយដល់អ៊ុយក្រែន។

ក្រោយការសន្យារបស់នាយករដ្ឋមន្ត្រី Narendra Modi លោក Zelenskyy បានបង្ហោះសារអរគុណដល់ឥណ្ឌានៅលើគណនី Telegram សម្រាប់ការគាំទ្របូរណភាពទឹកដី និងអធិបតេយ្យភាពនៃប្រទេសរបស់លោក។ លោក Zelenskyy ក៏បានថ្លែងអំណរគុណដល់លោក Modi សម្រាប់ការផ្តល់ជំនួយមនុស្សធម៌ដល់ប្រទេសដែលហែកហួរដោយសង្រ្គាម ហើយបានអញ្ជើញឥណ្ឌាឱ្យចូលរួមក្នុងការអនុវត្តគំនិតផ្តួចផ្តើម “រូបមន្តសន្តិភាព” ដែលបង្កើតឡើងដោយអ៊ុយក្រែនផងដែរ៕

ប្រែសម្រួល៖ សន្យា

ប្រភព៖ CNA

ចុចអាន៖ G7 ដាក់ទណ្ឌកម្មថ្មី ប្រឆាំងរុស្ស៊ី