៥ប្រទេស ជាប់ឆ្នោតចូល ក្រុមប្រឹក្សាសន្តិសុខអង្គការសហប្រជាជាតិ

កាលពីថ្ងៃអង្គារ ទី៦ ខែមិថុនា មហាសន្និបាតអង្គការសហប្រជាជាតិ បានបោះឆ្នោតជ្រើសរើសប្រទេសអាល់ហ្សេរី ហ្គីយ៉ាន សៀរ៉ាឡេអូន ស្លូវេនី និងកូរ៉េខាងត្បូង ទៅកាន់ក្រុមប្រឹក្សាសន្តិសុខអង្គការសហប្រជាជាតិ សម្រាប់អាណត្តិរយៈពេល ២ ឆ្នាំ ចាប់ពីថ្ងៃទី១ ខែមករា ឆ្នាំ២០២៤ ទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអាល់ហ្សេរី ហ្គីយ៉ាន សៀរ៉ាឡេអូន និងកូរ៉េខាងត្បូង បានជាប់ឆ្នោតដោយមិនមានការជំទាស់នៅស្ថាប័នដែលទទួលបន្ទុករក្សាសន្តិភាព និងសន្តិសុខអន្តរជាតិ មានសមាជិក ១៥ ប្រទេសមួយនេះ ។ ទោះយ៉ាងណាក៏មានការប្រកួតប្រជែងមួយផងដែរ គឺប្រទេសស្លូវេនី បានយកឈ្នះបេឡារុស ហើយប្រទេសជាប់ឆ្នោតទាំង ៥ នេះ នឹងជំនួសអាល់បានី ប្រេស៊ីល ហ្គាបុង ហ្គាណា និងអារ៉ាប់រួម ។

ប្រទេសហ្គីយ៉ាន ទទួលបានការបោះឆ្នោត ១៩១ សំឡេង, សៀរ៉ាឡេអូន ១៨៨ សំឡេង, អាល់ហ្សេរី ១៨៤ សំឡេង ខណៈកូរ៉េខាងត្បូង ១៨០ សំឡេង ។ ចំណែកស្លូវេនី ទទួលបាន ១៥៣ សំឡេងដើម្បីយកឈ្នះបេឡារុស ដែលទទួលបានត្រឹម ៣៨ សំឡេង ។

ដើម្បីធានាបាននូវតំណាងភូមិសាស្រ្ត អាសនៈត្រូវបានបែងចែកទៅឲ្យក្រុមតាមតំបន់ ហើយថ្វីបើបេក្ខជនឈរឈ្មោះ មិនទទួលបានការជំទាស់នៅក្នុងក្រុមរបស់ពួកគេក៏ដោយ ប៉ុន្តែពួកគេនៅតែចាំបាច់ត្រូវទទួលបានការគាំទ្រច្រើនជាងពីរភាគបី នៃមហាសន្និបាត។

គួរបញ្ជាក់ថា ក្រុមប្រឹក្សាសន្តិសុខ គឺជាស្ថាប័នតែមួយគត់របស់អង្គការសហប្រជាជាតិ ដែលអាចធ្វើសេចក្តីសម្រេចមានកាតព្វកិច្ចស្របច្បាប់ ដូចជាការដាក់ទណ្ឌកម្ម និងការអនុញ្ញាតឲ្យប្រើប្រាស់កម្លាំងជាដើម។ ក្រុមប្រឹក្សានេះ​មាន​សមាជិក​អចិន្ត្រៃយ៍​ចំនួន៥ គឺ​អង់គ្លេស ចិន បារាំង រុស្ស៊ី និង​អាមេរិក ៕

ប្រែសម្រួល៖ Vann Vann

ប្រភព៖ CNA

ចុចអាន៖ UN និងរុស្ស៊ី ព្រមានថា ពិភពលោក កំពុងស្ថិតក្នុងកម្រិតគ្រោះថ្នាក់ធ្ងន់ធ្ងរ