បារាំង សរសេរលិខិតសុំការអនុញ្ញាតចូលរួមកិច្ចប្រជុំជាមួយប្លុកដែលមាន រុស្ស៊ី និងចិន

ប្រធានាធិបតីបារាំងលោក Emmanuel Macron​ បានសរសេរលិខិតស្នើ​សុំការអញ្ជើញចូលរួមក្នុងកិច្ចប្រជុំកំពូលជាមួយ​ក្រុមប្រទេស​ BRICS ដែលគ្រោងធ្វើឡើងនៅអាហ្វ្រិកខាងត្បូង ហើយប្រសិនជាត្រូវបានអនុញ្ញាតមែន បារាំងនឹងក្លាយជាប្រទេស G7 ដំបូងគេបានចូលរួមក្នុងកិច្ចប្រជុំកំពូលដែលធ្វើឡើងដោយប្លុកមានរុស្ស៊ី និងចិនមួយនេះ ។

រដ្ឋមន្ត្រីការបរទេសបារាំងលោកស្រី Catherine Colonna បាននិយាយនៅក្នុងសន្និសីទសារព័ត៌មានមួយក្នុងទីក្រុង Pretoria ប្រទេសអាហ្វ្រិកខាងត្បូងកាលពីពេលថ្មីៗនេះថា លោកស្រីបានជូនដំណឹងដល់ទីក្រុង Pretoria រួចហើយអំពីចំណាប់អារម្មណ៍របស់លោកប្រធានាធិបតី Macron ដើម្បីចួលរួមក្នុងកិច្ចប្រជុំ BRICS ក្នុងឋានៈជាអ្នកសង្កេតការណ៍ ។

ពាក់ព័ន្ធនឹងបញ្ហានេះដែរ លោកស្រី Naledi Pandor រដ្ឋមន្ត្រីការបរទេសអាហ្វ្រិកខាងត្បូងក៏បានឆ្លើយតបទៅវិញផងដែរថា ទោះបីជាបារាំងចង់ចូលរួមកិច្ចប្រជុំមួយនេះ ក្នុងនាមជាអ្នកសង្កេតការណ៍ក៏ដោយ ប៉ុន្តែការសម្រេចចិត្ត គឺអាស្រ័យលើប្រធានាធិបតីអាហ្វ្រិកខាងត្បូងលោក Cyril Ramaphosa ដែលជាប្រធានបច្ចុប្បន្ននៃប្លុកនេះ ។

ទំនាក់ទំនងរបស់លោក Macron ជាមួយរុស្ស៊ីកំពុងមានភាពតានតឹងយ៉ាងខ្លាំង ដោយប្រធានាធិបតី​បារាំង​រូបនេះបាន​ចោទប្រកាន់ទី​ក្រុង​មូស្គូ​ពី​បទ​ផ្សព្វផ្សាយ​ការ​ឃោសនា​ប្រឆាំង​បារាំង​នៅ​ក្នុង​បណ្តា​ប្រទេស​ទ្វីប​អាហ្រ្វិក ដែលធ្វើឲ្យ​ទីក្រុង​ប៉ារីស​បាត់បង់​ឥទ្ធិពល​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ ។

លើសពីនេះ មេដឹកនាំបារាំងក៏បានអំពាវនាវឲ្យមានកិច្ចចរចាសន្តិភាពនៅអ៊ុយក្រែនផងដែរ ហើយបានតាំងខ្លួនជាអ្នកសម្រុះសម្រួលដ៏មានសក្តានុពល បើទោះបីជាបន្តបញ្ជូនអាវុធធុនធ្ងន់ទៅកាន់ទីក្រុងកៀវ និងគាំទ្រផែនការសន្តិភាពដែលតាក់តែងឡើងដោយអ៊ុយក្រែន ហើយត្រូវបានប្រឆាំងយ៉ាងខ្លាំងពីសំណាក់រុស្ស៊ីក៏ដោយ ។

គួរបញ្ជាក់ថា BRICS គឺជាពាក្យកាត់សម្រាប់តំណាងឲ្យប្រទេសដែលមានសេដ្ឋកិច្ចរីកចម្រើនប្រចាំតំបន់ចំនួន ៥ មានដូចជា ប្រេស៉ីល រុស្ស៉ី ឥណ្ឌា ចិន និងអាហ្វ្រិកខាងត្បូង ហើយកិច្ចប្រជុំកំពូលលើកទី ១៥ នៃប្លុកមួយនេះ នឹងប្រព្រឹត្តទៅនៅទីក្រុង Johannesburg ពីថ្ងៃទី២២ ដល់ថ្ងៃទី២៤ ខែសីហាខាងមុខនេះ ៕

ប្រែសម្រួល៖ នាង រតនៈ

ប្រភព៖ RT

ចុចអាន ៖ ទោះជាប់ដៃធ្វើសង្គ្រាម តែសេដ្ឋកិច្ច រុស្ស៊ី ស្ទុះងើបទៅរកសភាពដូច ២ ឆ្នាំមុន