នីហ្សេ បិទដែនអាកាស ចំពេលមានការគំរាម ធ្វើអន្តរាគមន៍យោធា

រដ្ឋាភិបាលដែលកើតចេញពីរដ្ឋប្រហាររបស់ប្រទេសនីហ្សេ បានសន្យាថា នឹងមានការឆ្លើយតបខ្លាំងក្លានិងភ្លាមៗ ចំពោះការរំលោភបំពានណាមួយលើដែនអាកាសរបស់ខ្លួន ខណៈប្រទេសនេះត្រៀមខ្លួនទប់ទល់នឹងអន្តរាគមន៍យោធា បន្ទាប់ពីថ្ងៃ​​​​​​​ឱសានវាទ ដែលកំណត់ដោយសហគមន៍សេដ្ឋកិច្ចនៃរដ្ឋអាហ្វ្រិកខាងលិច (ECOWAS) ដើម្បីស្តារអំណាចប្រធានាធិបតី Mohamed Bazoum ​បាន​កន្លងផុត​កាល​ពី​ថ្ងៃ​អាទិត្យទី៦ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលយោធាបានប្រកាសថា “ខណៈប្រឈមមុខនឹងការគំរាមកំហែងនៃអន្តរាគមន៍កាន់តែជាក់ស្តែងពីប្រទេសជិតខាង, ដែនអាកាសរបស់នីហ្សេ ត្រូវបានបិទចាប់ពីថ្ងៃអាទិត្យទៅ រហូតដល់មានការជូនដំណឹងបន្ថែម”។

សេចក្តីថ្លែងការណ៍នោះក៏បានព្រមានដែរថា “ការប៉ុនប៉ងណាមួយដើម្បីបំពានដែនអាកាស នឹងនាំឲ្យមានការឆ្លើយតបយ៉ាងខ្លាំងក្លា និងភ្លាមៗ”។

ក្រុមប្រឹក្សាជាតិការពារមាតុភូមិ ដែលឡើងកាន់អំណាចក្នុងរដ្ឋប្រហារយោធា កាលពីខែមុន បានអះអាងថា កងកម្លាំងអរិភាពក្នុងតំបន់បានដាក់ពង្រាយ រួចស្រេចអស់ហើយ ដើម្បីត្រៀមធ្វើអន្តរាគមន៍ នៅក្នុងប្រទេសអាហ្វ្រិកកណ្តាលចំនួន២ ប៉ុន្តែមិនបញ្ចេញឈ្មោះទេ។ ក្រុមប្រឹក្សានេះ​បន្ថែម​ថា “​រដ្ឋ​ណា​ដែល​ពាក់ព័ន្ធ ​នឹង​ត្រូវ​បាន​ចាត់​ទុក​ថា​ជា អ្នក​សហ​ការ​បះបោរ”។

ECOWAS បានដាក់ទណ្ឌកម្មយ៉ាងតឹងរ៉ឹង ហើយបានចេញឱសានវាទរយៈពេល៧ថ្ងៃ ដល់មេដឹកនាំយោធាកាលពីសប្តាហ៍មុន ដោយគំរាមថា នឹងបញ្ជូនកងទ័ពចូលទៅក្នុងប្រទេសនីហ្សេ បើឧត្តមសេនីយ៍ Abdourahamane Tchiani និងគណៈរដ្ឋមន្ត្រីរបស់គាត់ មិនចុះចេញពីតំណែង ហើយដាក់ប្រធានាធិបតី Bazoum ឲ្យឡើងកាន់អំណាចវិញទេនោះ។

ទោះបីជាយ៉ាង​ណា​ក៏​ដោយ កាល​បរិច្ឆេទ​កំណត់ ​បាន​កន្លង​ផុត​ទៅ​ដោយ​គ្មាន​អ្នកណា​គោរពឡើយ ហើយថ្វីបើយោធានៃសមាជិក ECOWAS ភាគច្រើនបានយល់ព្រមលើផែនការធ្វើអន្តរាគមន៍យោធា នៅក្នុងកិច្ចប្រជុំមួយកាលពីថ្ងៃសុក្រក៏ដោយ ប៉ុន្តែប្លុកនេះ នៅតែត្រូវការពេលវេលាបន្ថែមទៀត ដើម្បីរៀបចំសម្រាប់ការធ្វើសកម្មភាព៕

ប្រែសម្រួល៖ Vann Vann

ប្រភព៖ RT

ចុចអាន៖ មេដឹកនាំអាហ្វ្រិកខាងលិច រៀបផែនការ ធ្វើអន្តរាគមន៍យោធា ក្នុងប្រទេស នីហ្សេ