លោក Biden ដាក់កំហិតបន្ថែមលើក្រុមហ៊ុន​ អាមេរិក មិនឲ្យវិនិយោគលើបច្ចេកវិទ្យាសំខាន់នៅ ចិន  

ប្រធានាធិបតីអាមេរិកលោក Joe Biden បានចុះហត្ថលេខាលើបទបញ្ជាប្រតិបត្តិមួយ ដើម្បីគ្រប់គ្រងការវិនិយោគលើវិស័យបច្ចេកវិទ្យាធំៗចំនួន ៣ នៅក្នុងប្រទេសចិនដែលមានលក្ខណៈរសើប រួមមាន បច្ចេកវិទ្យា semiconductors និងបញ្ញាសិប្បនិម្មិត AI ។

តាមរយៈរតនាគារអាមេរិកបញ្ជាក់ថា លោក Joe Biden បានអនុញ្ញាតឲ្យរដ្ឋលេខាធិការរតនាគារគ្រប់គ្រងលើការវិនិយោគមួយចំនួនចូលទៅក្នុងប្រទេសចិនដែលជាគូប្រជែងដ៏ខ្លាំងក្លារបស់អាមេរិក ហើយវិស័យទាំងបីដែលត្រូវដាក់កម្រិត​នោះគឺបច្ចេកវិទ្យា semiconductors និង microelectronics, បច្ចេកវិទ្យាព័ត៌មាន Quantum និង AI ។

កម្មវិធីនេះនឹងបំពេញបន្ថែមការគ្រប់គ្រងដែលមានស្រាប់របស់សហរដ្ឋអាមេរិកលើការនាំចេញឧបករណ៍អេឡិចត្រូនិកកម្រិតខ្ពស់ និងវត្ថុផ្សេងៗទៀតទៅកាន់ប្រទេសចិន ។ ទន្ទឹមនេះ វានឹងហាមឃាត់ការវិនិយោគមួយចំនួនទាក់ទងនឹងបច្ចេកវិទ្យា និងផលិតផលដែលបង្កហានិភ័យសន្តិសុខជាតិធ្ងន់ធ្ងរបំផុត ហើយនឹងតម្រូវឲ្យមានការជូនដំណឹងសម្រាប់ការវិនិយោគដ៏រសើបផ្សេងទៀតផងដែរ ។

ទន្ទឹមនោះ រដ្ឋបាលលោក Biden សង្កត់ធ្ងន់ថា អាមេរិកនឹងរឹតបន្តឹងលើការនាំចេញទៅកាន់ប្រទេសចិននូវបច្ចេកវិទ្យាទំនើបមួយចំនួនដែលអាចបង្វែរទិសដៅសម្រាប់ការប្រើប្រាស់យោធា ខណៈពេលដែលបន្តសកម្មភាពសេដ្ឋកិច្ចនៅក្នុងតំបន់ផ្សេងទៀត ។

ដោយឡែក ចាប់ពីថ្ងៃទី ១ ខែសីហា ប្រទេសចិនក៏បានដាក់កំហិតលើការនាំចេញឧបករណ៍ដែលទាក់ទងនឹងហ្គាលីយ៉ូមនិងហ្គេម៉ាញ៉ូម ជាលោហធាតុដ៏កម្រដែលប្រើក្នុងវត្ថុធាតុដើមសម្រាប់ឧបករណ៍អេឡិចត្រូនិក ៕

ប្រែសម្រួល៖ នាង​ រតនៈ

ប្រភព៖ NHK

ចុចអាន៖ FBI បាញ់សម្លាប់បុរសម្នាក់ ដែលបង្ហោះ Facebook គំរាមប្រធានាធិបតីអាមេរិក