ព្យុះទីហ្វុងមួយទៀត កំពុងវាយប្រហារប្រទេស ជប៉ុន

ប្រទេសជប៉ុន កំពុងជួបប្រទះនឹងព្យុះទីហ្វុង Lan ខណៈក្រុមហ៊ុនអាកាសចរណ៍ និងរថភ្លើង បានលុបចោលសេវាកម្មនៅតំបន់កណ្តាលនៃកោះសំខាន់ ហើយផ្ទះរាប់ម៉ឺនខ្នង មិនមានអគ្គិសនីប្រើប្រាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារ​ឧតុនិយម​ជប៉ុន (JMA), ព្យុះ Lan បាននាំមកជាមួយខ្យល់ល្បឿនអតិបរមា ១៣៩គីឡូម៉ែត្រក្នុងមួយម៉ោង និងខ្យល់កន្ត្រាក់ ១៩៥គីឡូម៉ែត្រក្នុងមួយម៉ោង។ 

ព្យុះនេះបានទៅដល់ឆ្នេរសមុទ្រនៃខេត្ត Wakayama នៅម៉ោងប្រហែល៩ព្រឹកថ្ងៃអង្គារទី១៥ខែសីហា បន្ទាប់មក ឆ្ពោះទៅភាគខាងជើងលើមជ្ឈមណ្ឌលប្រជាជនសំខាន់ៗនៃទីក្រុង Osaka និង Kyoto។

ស្របពេលជាមួយគ្នានេះ JMA បាន​ព្រមាន​អំពី​ភ្លៀង​ធ្លាក់​និង​ខ្យល់​បក់​ខ្លាំង ព្រមទាំង​ហានិភ័យ​នៃ​ទឹកជំនន់ ក៏ដូចជា​ការ​បាក់ដីផងដែរ នៅក្នុងតំបន់ខាងលើ។

ទន្ទឹមនោះ ក្រុមហ៊ុន Japan Airlines និង ANA Holdings បានលុបចោលជើងហោះហើរជាច្រើន។ ចំណែកក្រុមហ៊ុន West Japan Railway បានប្រកាសផ្អាកសេវារថភ្លើង Tokaido Shinkansen ពីទីក្រុង Nagoya ទៅ Osaka ក៏ដូចជាសេវា Sanyo Shinkansen ពី Osaka ទៅ Okayama។

មិនត្រឹមប៉ុណ្ណឹង ព្យុះទីហ្វុង Lan បានគំរាម រំខានដល់រដូវកាលធ្វើដំណើរដ៏មមាញឹកបំផុតរបស់ប្រទេសជប៉ុន ក្នុងអំឡុងពេលវិស្សមកាលរដូវក្តៅ Obon ដែលជាពេលមនុស្សជាច្រើនឈប់សម្រាក ហើយវិលត្រលប់ទៅស្រុកកំណើតវិញ។

សូមបញ្ជាក់ ការមកដល់របស់ព្យុះទីហ្វុង Lan គឺកើតឡើងបន្ទាប់ព្យុះទីហ្វុង Khanun វាយប្រហារភាគខាងត្បូងប្រទេសជប៉ុន បន្ទាប់មកធ្វើដំណើរទៅភាគខាងជើង វាយលុកកូរ៉េខាងត្បូង ចិន និងរុស្ស៊ីចុងបូព៌ា៕

ប្រែសម្រួល៖ Vann Vann

ប្រភព៖ Tuoi Tre, CNA

ចុចអាន៖ ជប៉ុន ជម្លៀសមនុស្សរាប់ម៉ឺននាក់ ដោយសារព្យុះ Mawar