កូរ៉េខាងជើង ព្រមានថា នៅសល់មួយជំហានទៀតប៉ុណ្ណោះ ពិភពលោក នឹងធ្លាក់ចូលសង្គ្រាមនុយក្លេអ៊ែរ

ក្នុងសេចក្តីថ្លែងការណ៍មួយ នៅសន្និសីទសន្តិសុខអន្តរជាតិទីក្រុងមូស្គូ លោក Kang Sun-nam រដ្ឋមន្ត្រីក្រសួងការពារជាតិកូរ៉េខាងជើង បាននិយាយថា ពិភពលោក នៅសល់មួយជំហានទៀតប៉ុណ្ណោះពីជម្លោះនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ មន្ត្រី​រូប​នេះ ​បានស្តី​បន្ទោស​បំណងប្រាថ្នារបស់​ទីក្រុង​វ៉ាស៊ីនតោន ដែលចង់​ផ្លាស់​ប្តូរ​របប​ក្រុង​ព្យុងយ៉ាង ថាជាហេតុបង្កឲ្យមាន​ភាព​តានតឹងកាន់តែខ្លាំងឡើងៗ។ លោកក៏បានចោទប្រកាន់សហរដ្ឋអាមេរិក ពីការបង្កើនវត្តមានយោធារបស់ខ្លួននៅក្នុងតំបន់ ជាពិសេសការដាក់ពង្រាយយន្តហោះដែលមានសមត្ថភាពនុយក្លេអ៊ែរ និងនាវាមុជទឹកផងដែរ។

លោកបន្ថែមថា ទីក្រុងវ៉ាស៊ីនតោនត្រូវតែទទួលស្គាល់ចំពោះគោលនយោបាយដ៏ឃោរឃៅរបស់ខ្លួន ប្រឆាំងនឹងទីក្រុងព្យុងយ៉ាង ហើយត្រូវបោះបង់វិធីសាស្រ្តប្រឈមមុខរបស់ខ្លួន ប្រសិនបើពិតជាចង់ដោះស្រាយវិបត្តិដោយសន្តិវិធីមែននោះ។

លោក Kang ព្រមានថា “ឥឡូវនេះ សំណួរគឺមិនមែនថាតើសង្រ្គាមនុយក្លេអ៊ែរ នឹងផ្ទុះឡើងនៅលើឧបទ្វីបកូរ៉េដែរឬអត់នោះទេ ប៉ុន្តែត្រូវសួរថាតើនរណា និងនៅពេលណាដែលវាចាប់ផ្តើម។ នៅឆ្នាំនេះ សហរដ្ឋអាមេរិកបានបញ្ជូនអាវុធយុទ្ធសាស្ត្រទ្រង់ទ្រាយធំទៅកាន់តំបន់ រួមទាំងនាវាមុជទឹកដែលមានសមត្ថភាពនុយក្លេអ៊ែរ ក្រុមនាវាផ្ទុកយន្តហោះ និងយន្តហោះទម្លាក់គ្រាប់បែកដែលមានសមត្ថភាពនុយក្លេអ៊ែរ ផងដែរ”។

ក្រុមនាវាផ្ទុកយន្តហោះចម្បាំងទី១១ របស់កងទ័ពជើងទឹកអាមេរិក ដែលដឹកនាំដោយនាវាមេ USS Nimitz បានទៅដល់កំពង់ផែយោធាកូរ៉េខាងត្បូង កាលពីចុងខែមីនា ពោលភ្លាមៗបន្ទាប់ពីទីក្រុងព្យុងយ៉ាង បង្អួតក្បាលគ្រាប់នុយក្លេអ៊ែរទំហំតូចស៊េរីថ្មីរបស់ខ្លួន ដែលគេសន្មត់ថា អាចហោះហើរក្នុងរយៈចម្ងាយខ្លី។

ទន្ទឹមនោះ កាលពីចុងខែមិថុនា យន្តហោះទម្លាក់គ្រាប់បែកយុទ្ធសាស្ត្រ B-52 របស់អាមេរិក ក៏បានចូលរួមក្នុងសមយុទ្ធរួមគ្នាជាមួយកូរ៉េខាងត្បូងផងដែរ ។ ពីរសប្តាហ៍ក្រោយមក អាមេរិកក៏បានដាក់ពង្រាយនាវាមុជទឹកមីស៊ីលផ្លោងថ្នាក់ Ohio ឈ្មោះ USS Kentucky ទៅកាន់កូរ៉េខាងត្បូងថែមទៀត ខណៈនាវាមុជទឹកដែលក៏អាចបំពាក់ដោយមីស៊ីលផ្លោង Trident II ចំនួន ២០ គ្រាប់ផងដែរនោះ មានសមត្ថភាពផ្ទុកក្បាលគ្រាប់នុយក្លេអ៊ែរសរុបរហូតដល់ចំនួន ៨០ គ្រាប់៕

ប្រែសម្រួល៖ Vann Vann

ប្រភព៖ RT

ចុចអាន៖ កូរ៉េខាងជើង គំរាមបាញ់នុយក្លេអ៊ែរ សងសឹកអាមេរិក