ព័ត៌មានអន្ដរជាតិ

កងទ័ពជើងទឹកអាមេរិក ប្តេជ្ញាទប់ទល់នឹង “សកម្មភាពដ៏គឃ្លើន” របស់ចិន

បានផុស

៧ ខែ មុន

នៅ

ថ្ងៃចន្ទ ២៨ សីហា ២០២៣

ដោយ

មេបញ្ជាការនៃកងនាវាចម្បាំងធំបំផុតរបស់កងទ័ពជើងទឹកអាមេរិក បានឆ្លើយតបទៅនឹងការប្រឈមមុខដាក់គ្នានាពេលថ្មីៗនេះរវាងនាវាចិននិងហ្វីលីពីននៅសមុទ្រចិនខាងត្បូង ដោយសន្យាថា ទីក្រុងវ៉ាស៊ីនតោន នឹងរារាំងសកម្មភាពដ៏គឃ្លើនរបស់កងកម្លាំងទីក្រុងប៉េកាំងនៅក្នុងតំបន់។

កងទ័ពជើងទឹកអាមេរិក ធ្វើទស្សនកិច្ចនៅ ហ្វីលីពីន (រូបថត៖ Petty Officer)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអាទិត្យទី២៧ខែសីហា អនុឧត្តមនាវីឯក Karl Thomas មេបញ្ជាការកងនាវាចរទីប្រាំពីររបស់សហរដ្ឋអាមេរិក បានធានាដល់ប្រទេសហ្វីលីពីននូវការគាំទ្ររបស់ទីក្រុងវ៉ាស៊ីនតោន ក្នុងការប្រឆាំងនឹងអាកប្បកិរិយារបស់ចិន។ ដោយលើកឡើងពីបញ្ហារួមដែលអាមេរិកនិងសម្ព័ន្ធមិត្តហ្វីលីពីន កំពុងប្រឈមមុខ, លោកនិយាយថា “កងកម្លាំងរបស់ខ្ញុំចេញមកទីនេះសម្រាប់ហេតុផលតែមួយគត់ គឺដោះស្រាយបញ្ហាប្រឈម”។

ការអត្ថាធិប្បាយរបស់លោក Thomas កើតឡើងប្រហែលបីសប្តាហ៍ បន្ទាប់ពីឧប្បត្តិហេតុមួយដែលឆ្មាំសមុទ្រចិន បានដាក់ពង្រាយកាណុងបាញ់ទឹកប្រឆាំងនាវាហ្វីលីពីន ដែលកំពុងព្យាយាមផ្តល់គ្រឿងផ្គត់ផ្គង់ឡើងវិញដល់នាវាចម្បាំងមួយគ្រឿង ដែលទីក្រុងម៉ានីល មានចេតនាដាក់ជាមូលដ្ឋាននៅសមុទ្រចិនខាងត្បូងក្នុងឆ្នាំ ១៩៩៩។

អនុឧត្តមនាវីឯក Karl Thomas (រូបថត៖ American Security Today)

បេសកកម្មផ្គត់ផ្គង់ឡើងវិញត្រូវបានបញ្ចប់កាលពីថ្ងៃអង្គារ ដោយបានដឹកជញ្ជូនស្បៀងអាហារ និងទំនិញផ្សេងទៀតដល់ទាហាន ដែលឈរជើងលើកប៉ាល់ Sierra Madre សម័យសង្រ្គាមលោកលើកទីពីរ។

ភាពតានតឹងរវាងហ្វីលីពីន និងចិន បានកើនឡើងខ្លាំងចាប់តាំងពីលោក Ferdinand Marcos Jr. ចូលកាន់តំណែងជាប្រធានាធិបតីនៅទីក្រុងម៉ានីល កាលពីឆ្នាំមុន។ លោកបានបង្កើតទំនាក់ទំនងការពារជាតិកាន់តែជិតស្និទ្ធជាមួយសហរដ្ឋអាមេរិក និង អះអាងពីការទាមទារទឹកដីរបស់ប្រទេសលោក នៅក្នុងសមុទ្រចិនខាងត្បូង។

ទោះបីជាយ៉ាងណាក៏ដោយ មន្ត្រីចិនបានព្រមានថា ការពង្រឹងកិច្ចសហប្រតិបត្តិការយោធាជាមួយសហរដ្ឋអាមេរិក នឹងចងហ្វីលីពីនជាប់ទៅនឹងជម្លោះភូមិសាស្ត្រនយោបាយ ដែលបង្កគ្រោះថ្នាក់ដល់សន្តិសុខរបស់ប្រទេស៕

ប្រែសម្រួល៖ Vann Vann

ប្រភព៖ RT

ចុចអាន៖ ចិន ឲ្យ ហ្វីលីពីន អូសនាវាចម្បាំងដែលច្រែះចាប់ជំនាន់សង្គ្រាមលោកលើក ទី ២ ចេញពីដែនទឹកមានជម្លោះជាបន្ទាន់