ព្យុះទីហ្វុង សាវឡា ចូលដល់សមុទ្រវៀតណាម ជាមួយកម្លាំងខ្យល់ ២០១គីឡូម៉ែត្រក្នុងមួយម៉ោង

ទីភ្នាក់ងារអាកាសធាតុកណ្តាលរបស់ប្រទេសវៀតណាម បានរាយការណ៍ថា ព្យុះទីហ្វុង សាវឡា បានចូលក្នុងសមុទ្រវៀតណាមខាងកើតហើយ និងកំពុងរំកិលទៅទិសខាងលិចជាមួយកម្លាំងខ្យល់បក់ខ្លាំងរហូតដល់ ២០១ គីឡូម៉ែត្រក្នុងមួយម៉ោង និងរលកកម្ពស់ ១០ ម៉ែត្រផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃព្រហស្បតិ៍ ព្យុះទីហ្វុងនេះស្ថិតនៅភាគខាងជើងនៃសមុទ្រវៀតណាមខាងកើត ចម្ងាយប្រហែល ៤៧០ គីឡូម៉ែត្រភាគអាគ្នេយ៍នៃទីក្រុងហុងកុង ។

ទន្ទឹមនោះ មជ្ឈមណ្ឌលព្យាករឧតុនិយមបានព្រមានថា ដោយសារតែកម្លាំងខ្យល់បក់ខ្លាំង ព្យុះទីហ្វុងនេះ នឹងបង្កការបំផ្លិចបំផ្លាញធំធេង ហើយអាចពន្លិចនាវាដែលដឹកធ្ងន់ៗផងដែរ ។

ស្របពេលជាមួយគ្នានោះ ការិយាល័យអចិន្ត្រៃយ៍នៃគណៈកម្មាធិការជាតិដឹកនាំការការពារ និងគ្រប់គ្រងគ្រោះមហន្តរាយធម្មជាតិវៀតណាម បានចេញសេចក្តីជូនដំណឹងដល់អង្គភាព និងទីភ្នាក់ងារពាក់ព័ន្ធនានា ចាប់ពីភាគខាងជើងខេត្ត Quang Ninh ទៅកាន់ខេត្ត Ha Tinh ដោយស្នើឲ្យពួកគេចាត់វិធានការឆ្លើយតបទៅនឹងផលប៉ះពាល់ដែលអាចកើតមានពីព្យុះទីហ្វុងនេះ ។

ពេលចេញពីវៀតណាម ព្យុះនេះនឹងបន្តបោះពួយទៅដែនទឹកភាគខាងត្បូងនៃខេត្ត Guangdong របស់ប្រទេសចិន ជាមួយនឹងខ្យល់បក់ត្រឹម ១៣៤ ទៅ ១៦៦ គីឡូម៉ែត្រប៉ុណ្ណោះក្នុងមួយម៉ោង ប៉ុន្តែខ្យល់កន្ត្រាក់នឹងមានរហូតដល់ ២២០ គីឡូម៉ែត្រក្នុងមួយម៉ោងនៅថ្ងៃចន្ទសប្ដាហ៍ក្រោយ ។

ទោះបីជាយ៉ាងណាក៏ដោយ ព្យុះទីហ្វុងនេះ នឹងមិនវាយប្រហារចិនដីគោកនោះទេ ប៉ុន្តែឆ្ពោះទៅឆ្នេរសមុទ្រ Guangdong រួចនឹងបន្តឆ្ពោះទៅឧបទ្វីប Leizhou និងកោះហៃណាន ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ កម្ពុជានឹងទទួលរងនូវឥទ្ធិពលព្យុះទីហ្វុង «សាវឡា» បង្កឱ្យមានភ្លៀងធ្លាក់ និងខ្យល់កន្ត្រាក់