អាមេរិក គាំទ្រ ជប៉ុន ចំពោះការបង្ហូរទឹកសំណល់ចេញពីរោងចក្រនុយក្លេអ៊ែរ Fukushima

សហរដ្ឋ​អាមេរិក​បាន​បង្ហាញ​ការ​គាំទ្រ​ចំពោះ​ប្រទេស​ជប៉ុន​ជុំវិញ​ការ​បង្ហូរទឹកសំណល់ចេញពីរោងចក្រថាមពលនុយក្លេអ៊ែរ Fukushima Daiichi ចូលទៅក្នុងមហាសមុទ្រប៉ាស៊ីហ្វិកកាលពីថ្ងៃទី២៤ ខែសីហាកន្លងទៅ ។

អ្នកនាំពាក្យក្រុមប្រឹក្សាសន្តិសុខជាតិសេតវិមានលោក John Kirby បាននិយាយកាលពីថ្ងៃពុធថា ការគាំទ្ររបស់អាមេរិកពាក់ព័ន្ធទៅនឹងការបង្ហូរទឹកសំណល់ចេញពីរោងចក្រនុយក្លេអ៊ែរ គឺដោយសារតែជប៉ុនបានចាត់វិធានការចាំបាច់ទាំងអស់ដើម្បីអនុវត្តតាមស្តង់ដារអន្តរជាតិ និងត្រឹមត្រូវតាមបែបវិទ្យាសាស្ត្រសុវត្ថិភាព ។

ចំណែកទាក់ទិនទៅនឹងការផ្អាករបស់ប្រទេសចិនលើការនាំចូលអាហារសមុទ្រទាំងអស់ពីប្រទេសជប៉ុនវិញ អ្នកនាំពាក្យរូបនេះបានលើកឡើងថា វាមិនគួរមានហេតុផលសម្រាប់ប្រទេសណាមួយដើម្បីព្យាយាមអនុវត្តវិធានការសេដ្ឋកិច្ចបែបទណ្ឌកម្មនោះទេ ។

បន្ទាប់ពីបង្ហូរទឹកសំណល់ចេញពីរោងចក្រថាមពលនុយក្លេអ៊ែរនោះហើយ ចិនបានហាមប្រាមការនាំចូលអាហារសមុទ្ររបស់ជប៉ុនភ្លាមៗ បើទោះបីជាភ្នាក់ងារថាមពលបរមាណូអន្តរជាតិ (IAEA) បានបញ្ជាក់ហើយថា កម្រិតវិទ្យុសកម្មក្នុងទឹកមានផលប៉ះពាល់តិចតួចដល់មនុស្ស និងបរិស្ថានក៏ដោយ ។

គួរបញ្ជាក់ថា ប្រទេសចិនគឺជាទីផ្សារដ៏ធំបំផុតសម្រាប់ការនាំចេញអាហារសមុទ្ររបស់ប្រទេសជប៉ុនក្នុងទំហំទឹកប្រាក់ ៦០០ លានដុល្លារកាលពីឆ្នាំមុន ខណៈក្នុង​ចំណោម​ផលិតផល​ដែល​មាន​ការ​ពេញ​និយម​បំផុត​នោះគឺ ​ខ្យង ត្រីធូណា កាំប្រម៉ាសមុទ្រ ត្រីឆ្ពង់ក្រហម និងឈ្លើងសមុទ្រជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ គ្រាប់បែកចង្កោម ស្ថិតក្នុងជំនួយ យោធា ថ្មី តម្លៃ ១៧៥ លាន ដុល្លារ ដែលអាមេរិក នឹងបញ្ជូនទៅឲ្យ អ៊ុយក្រែន