លោក គីម ជុងអ៊ុន ទៅទស្សនារោងចក្រផលិតយន្តហោះចម្បាំង រុស្ស៊ី

មេដឹកនាំកូរ៉េខាងជើង លោក គីម ជុងអ៊ុន នៅព្រឹកថ្ងៃសុក្រនេះបានធ្វើដំណើរទៅដល់ទីក្រុង Komsomolsk-on-Amur ភាគខាងកើតនៃប្រទេសរុស្ស៊ីដើម្បីទស្សនារោងចក្រផលិតយន្តហោះចម្បាំង បន្ទាប់ពីកិច្ចប្រជុំកំពូលដ៏កម្រជាមួយលោកប្រធានាធិបតី វ្ល៉ាឌីមៀរ ពូទីន នៅដើមសប្តាហ៍នេះ ។

ទីក្រុងរុស្ស៊ីមួយនេះមានរោងចក្រផលិតយន្តហោះចំនួន ២ គឺរោងចក្រ Yuri Gagarin ដែលត្រូវបានគេដាក់ឈ្មោះតាមអវកាសយានិកសូវៀតដែលបានទៅលំហអាកាសដំបូងគេ និងរោងចក្រមួយទៀតឈ្មោះ Yakovlev ដែលត្រូវបានគេស្គាល់ថាជា Irkut ។

ទន្ទឹមនោះ ទីភ្នាក់ងារសារព័ត៌មានរដ្ឋ Tass របស់រុស្ស៊ីបានរាយការណ៍ថា រោងចក្រ Yuri Gagarin ជារោងចក្រផលិតយន្តហោះចម្បាំងទំនើបៗ រួមទាំងយន្តហោះចម្បាំង Su-35 និង Su-57 ផងដែរ ខណៈរោងចក្រ Yakovlev ផលិតយន្តហោះដឹកអ្នកដំណើររយៈចម្ងាយជិត ។

ក្រៅពីចុះទៅទីក្រុងដែលមានរោងចក្រផលិតយន្តហោះនេះហើយ លោក គីម ជុងអ៊ុន ក៏រំពឹងនឹងទៅទស្សនាទីក្រុងជាច្រើនផ្សេងទៀតក្នុងប្រទេសរុស្ស៊ីផងដែរ ជាពិសេសទីក្រុង Vladivostok ដើម្បីមើលកងនាវាចរប៉ាស៊ីហ្វិករបស់រុស្ស៊ី បន្ទាប់ពីកិច្ចប្រជុំកំពូលកាលពីថ្ងៃពុធនៅឯទីក្រុងកំពង់ផែ Vostochny ។

គួរបញ្ជាក់ថា ជំនួបរវាងលោក គីម និងលោក ពូទីន កំពុងបង្កក្ដីព្រួយបារម្ភយ៉ាងខ្លាំងទៅដល់បណ្ដាប្រទេសលោកខាងលិចពាក់ព័ន្ធទៅនឹងការពង្រីកកិច្ចសហប្រតិបត្តិការយោធារវាងប្រទេសទាំងពីរ ជាពិសេសការរំពឹងទុករបស់ទីក្រុងព្យុងយ៉ាងក្នុងការបញ្ជូនគ្រាប់បន្ថែមទៀតទៅកាន់ទីក្រុងមូស្កូសម្រាប់ប្រើប្រាស់ក្នុងសង្គ្រាមនៅអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ រុស្ស៊ី រៀបចំម្ហូប ៧ មុខ និងស្រា ២ ប្រភេទជូនជាពិសេសសម្រាប់លោក គីម ជុងអ៊ុន