ព័ត៌មានអន្ដរជាតិ

រុស្ស៊ី ថា ជម្លោះអ៊ុយក្រែន នឹងបង្កជា សង្រ្គាមលោកលើកទី៣ ដោយសារ មានមនុស្សល្ងីល្ងើ កំពុងកាន់តួនាទីធំៗ នៅលោកខាងលិច

បានផុស

៣ years មុន

នៅ

ថ្ងៃចន្ទ ២ តុលា ២០២៣

ដោយ

អតីតប្រធានាធិបតីរុស្ស៊ី លោក Dmitry Medvedev បានព្រមានថា ជម្លោះនៅអ៊ុយក្រែន អាចឈានទៅដល់សង្រ្គាមលោកលើកទី៣ ដោយសារតែមានមនុស្សល្ងង់ កំពុងកាន់តួនាទីធំៗ នៅលោកខាងលិច។

ឆ្លើយតបទៅសេចក្តីថ្លែងការណ៍ពីទីក្រុងឡុងដ៍និងបែរឡាំង កាលពីថ្ងៃសៅរ៍ទី៣០ខែកញ្ញា, អនុប្រធានក្រុមប្រឹក្សាសន្តិសុខរុស្ស៊ីរូបនេះ បានបង្ហោះសារនៅលើ Telegram កាលពីថ្ងៃអាទិត្យទី១ខែតុលាថា “ចំនួនមនុស្សឆ្កួតជាន់ខ្ពស់ កំពុងកើនឡើងជាលំដាប់នៅក្នុងរដ្ឋសមាជិកណាតូ”។

ស្របពេលជាមួយគ្នានោះ លោក Medvedev បានចាត់ទុករដ្ឋមន្ត្រីការពារជាតិអង់គ្លេស ដែលទើបតែងតាំងថ្មីឈ្មោះ Grant Shapps ថាជា មនុស្សល្ងីល្ងើ ជុំវិញគំនិតរបស់គាត់ក្នុងការបញ្ជូនគ្រូយោធាអង់គ្លេសទៅអ៊ុយក្រែន ដើម្បីបណ្តុះបណ្តាលកងទ័ពក្នុងតំបន់សម្រាប់ជម្លោះជាមួយរុស្ស៊ី។

លោក Medvedev បានព្រមានថា ប្រសិនបើរឿងនេះកើតឡើងមែននោះ ទាហានអង់គ្លេសនឹងក្លាយទៅជា គោលដៅស្របច្បាប់ សម្រាប់កងកម្លាំងរុស្ស៊ី។ លោក Shapps បានស្នើដាក់ពង្រាយគ្រូបង្រៀនទៅអ៊ុយក្រែន ទាំងដែលដឹងច្បាស់ហើយថា ពួកគេនឹងត្រូវកម្ទេចដោយគ្មានមេត្តា។

ទន្ទឹមនោះ លោក Medvedev ក៏បានហៅប្រធានគណៈកម្មាធិការការពារជាតិ របស់សភាអាល្លឺម៉ង់ឈ្មោះ Marie-Agnes Strack-Zimmermann ថាជាមនុស្សល្ងីល្ងើម្នាក់ទៀតផងដែរ បន្ទាប់ពីលោកស្រី ជំរុញឲ្យរដ្ឋាភិបាលទីក្រុងបែរឡាំង ផ្គត់ផ្គង់មីស៊ីលរយៈចម្ងាយឆ្ងាយ Taurus ដល់ទីក្រុងកៀវ។

លោកស្រីក៏បានអះអាងដែរថា ការវាយប្រហាររបស់អ៊ុយក្រែន ទៅលើគោលដៅនានានៅក្នុងប្រទេសរុស្ស៊ី ដោយប្រើអាវុធដែលផលិតដោយអាល្លឺម៉ង់ នឹងត្រូវគោរពតាមច្បាប់អន្តរជាតិទាំងស្រុង។

ក្នុងករណីនេះ លោក Medvedev គំរាមថា រុស្ស៊ី នឹងវាយប្រហារលើរោងចក្រអាល្លឺម៉ង់ ទាំងឡាយណា ដែលកំពុងផលិតមីស៊ីលប្រភេទនេះ។ ទោះយ៉ាងណា មនុស្សល្ងង់ទាំងនោះកំពុងជំរុញយើង ឆ្ពោះទៅរកសង្គ្រាមលោកលើកទី៣៕

ប្រែសម្រួល៖ Vann Vann

ប្រភព៖ RT

ចុចអាន៖ ក្រោយលោក Zelensky ថា សង្រ្គាមវិលត្រលប់ទៅរុស្ស៊ីវិញ ស្រាប់តែលោក Medvedev គំរាមបាញ់នុយក្លេអ៊ែរ