ក្រោយលោក Zelensky ថា សង្រ្គាមវិលត្រលប់ទៅរុស្ស៊ីវិញ ស្រាប់តែលោក Medvedev គំរាមបាញ់នុយក្លេអ៊ែរ

ប្រធានាធិបតីអ៊ុយក្រែន លោក Volodymyr Zelensky បានព្រមានថា សង្រ្គាមកំពុងវិលត្រលប់មកប្រទេសរុស្ស៊ីវិញហើយ បន្ទាប់ពីការវាយប្រហារដោយយន្តហោះគ្មានមនុស្សបើកលើរដ្ឋធានីមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាវីដេអូកាលពីថ្ងៃអាទិត្យទី៣០ខែកក្កដា ចេញពីទីក្រុង Ivano-Frankivsk ភាគខាងលិចប្រទេសអ៊ុយក្រែន លោក Zelensky និយាយថា ការវាយប្រហារលើទឹកដីរុស្ស៊ី គឺជាដំណើរការធម្មជាតិ និងយុត្តិធម៌ពិតប្រាកដនៃសង្គ្រាមរវាងប្រទេសទាំងពីរ។

លោកនិយាយថា “ថ្ងៃនេះជាថ្ងៃទី៥២២ នៃអ្វីដែលគេហៅថា ប្រតិបត្តិការយោធាពិសេស ដែលមេដឹកនាំរុស្ស៊ីគិតថានឹងមានរយៈពេលត្រឹមពីរបីសប្តាហ៍ប៉ុណ្ណោះ។ អ៊ុយក្រែន កាន់តែរឹងមាំបន្តិចម្ដងៗ សង្រ្គាមកំពុងវិលត្រលប់ទៅទឹកដីរុស្ស៊ីវិញ ទៅកាន់មជ្ឈមណ្ឌលដ៏សំខាន់ និងមូលដ្ឋានយោធារបស់ពួកគេ ហើយនេះគឺជាដំណើរការដែលចៀសមិនរួច”។

ពាក់ព័ន្ធនឹងបញ្ហានេះដែរ ក្រសួងការពារជាតិរុស្ស៊ីនិយាយថា យន្តហោះគ្មានមនុស្សបើករបស់អ៊ុយក្រែនចំនួនបីគ្រឿងត្រូវបានបាញ់ទម្លាក់កាលពីថ្ងៃអាទិត្យ ដោយក្នុងនោះ មានពីរគ្រឿងបានធ្លាក់ចូលទៅក្នុងការិយាល័យ។ អាកាសយានដ្ឋាន Vnukovo ក៏ត្រូវបិទមួយរយៈពេលខ្លីផងដែរ។

ការវាយប្រហារដោយយន្តហោះគ្មានមនុស្សបើក នាពេលព្រឹកព្រលឹមថ្ងៃអាទិត្យនោះ គឺជាហេតុការណ៍ចុងក្រោយបង្អស់ ដែលទីក្រុងមូស្គូ ស្តីបន្ទោសទៅលើទីក្រុង កៀវ។

ទោះបីជាយ៉ាងណាក៏ដោយ ក្រោយលោក Zelensky អះអាងដូចខាងលើ, អតីតប្រធានាធិបតីរុស្ស៊ី លោក Dmitry Medvedev បាននិយាយថា ទីក្រុងមូស្គូ នឹងប្រើអាវុធនុយក្លេអ៊ែរ ប្រសិនបើការវាយលុកដែលកំពុងបន្តរបស់ទីក្រុង កៀវ ទទួលបានជោគជ័យ។

ជាចុងក្រោយលោក Medvedev ដែលក៏ជាអនុប្រធានក្រុមប្រឹក្សាសន្តិសុខរុស្ស៊ីផងដែរ បានគូសបញ្ជាក់ថា គ្មានជម្រើសផ្សេងឡើយ ប្រសិនបើអ៊ុយក្រែន ដណ្តើមយកទឹកដីរបស់យើង៕

ប្រែសម្រួល៖​ Vann Vann

ប្រភព៖ BBC

ចុចអាន៖ លោក ពូទីន បង្អួតកម្លាំងយោធា និងសព្វាវុធទំនើបៗ ក្នុងទិវាកងទ័ពជើងទឹករុស្ស៊ី