ហ្សេលេនស្គី អះអាងថា ពូទីន បញ្ឆេះសង្គ្រាមលោកលើកទី៣រួចទៅហើយ

ក្នុងបទសម្ភាសផ្តាច់មុខជាមួយ BBC ផ្សាយកាលពីថ្ងៃអាទិត្យទី២២ខែកុម្ភៈឆ្នាំ២០២៦ មេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី អះអាងថា តាមពិតប្រធានាធិបតីរុស្ស៊ី វ្ល៉ាឌីមៀរ ពូទីន បានបញ្ឆេះសង្គ្រាមលោកលើកទី៣រួចទៅហើយ។

លោកហ្សេលេនស្គី បានលើកអំណះអំណាងថា សង្គ្រាមលោកលើកទី៣ បានចាប់ផ្តើមដោយសារតែការចូលរួមដោយផ្ទាល់ពីសំណាក់កងទ័ពកូរ៉េខាងជើង ដើម្បីជួយរុស្ស៊ីក្នុងការវាយលុកលើអ៊ុយក្រែន។

ទន្ទឹមនោះ បើតាមការបញ្ជាក់ពីលោកហ្សេលេនស្គី, មានតែការដាក់សម្ពាធយោធានិងសេដ្ឋកិច្ចខ្លាំងក្លាបំផុតប៉ុណ្ណោះ ទើបអាចបញ្ឈប់លោកពូទីនបាន។

តាមសម្តីលោកហ្សេលេនស្គី៖ «ខ្ញុំជឿថា ពូទីន បានចាប់ផ្តើមសង្គ្រាមលោករួចទៅហើយ។ សំណួរសំខាន់គឺថា តើគាត់នឹងអាចដណ្តើមយកទឹកដីបានកម្រិតណា ហើយតើត្រូវបញ្ឈប់គាត់ដោយរបៀបណា? រុស្ស៊ីចង់បង្ខំឲ្យពិភពលោកទទួលយករបៀបរស់នៅខុសប្លែកពីមុន ហើយផ្លាស់ប្តូរជីវិតដែលមនុស្សគ្រប់គ្នាបានជ្រើសរើសសម្រាប់ខ្លួនឯង»។

ជុំវិញរឿងនេះ សូម្បីអតីតមេទ័ពអ៊ុយក្រែន ក៏ធ្លាប់ប្រកាសដែរថា តាមពិតសង្គ្រាមលោកលើកទី៣ បានកើតឡើងហើយមែន។

លោក Valeriy Zaluzhny ដែលវាយទប់កងកម្លាំងលោកពូទីន បម្រុងសម្រុកចូលទីក្រុងកៀវ នៅពេលសង្គ្រាមរុស្ស៊ី-អ៊ុយក្រែន ផ្ទុះឡើងដំបូង បានលើកឡើងថា តាមពិតសង្គ្រាមលោករវាងបស្ចិមប្រទេសនិងរុស្ស៊ី បានផ្ទុះឡើងរួចទៅហើយ។

យោងតាមបុរសវ័យ៥១ឆ្នាំរូបនេះ, ការដែលលោកហ៊ានអះអាងថា សង្គ្រាមលោកលើកទី៣បានកើតឡើងហើយនោះព្រោះថា អ៊ុយក្រែន មិនមែនប្រឈមមុខតែជាមួយរុស្ស៊ីទេ ​ពោ​លគឺមានកូរ៉េខាងជើងទៀត។ មិនត្រឹមប៉ុណ្ណឹង សូម្បីអ៊ីរ៉ង់ ក៏ចូលដៃជួយរុស្ស៊ីដែរ ជាពិសេសតាមរយៈការផ្តល់យន្តហោះគ្មានមនុស្សបើក Shahed សម្លាប់ប្រជាជនអ៊ុយក្រែនស្លូតត្រង់។

លោកបន្តថា មីស៊ីលផលិតដោយកូរ៉េខាងជើងក៏ហោះចូលទឹកដីអ៊ុយក្រែន បូករួមជាមួយកងទ័ពលោកគីម ជុងអ៊ុនប្រហែល១០ ០០០នាក់ មកជួយប្រយុទ្ធលោក ពូទីន ទៀត។ លើសពីនេះ អ៊ុយក្រែន ក៏បានរកឃើញបំណែកសព្វាវុធរបស់ចិន នៅលើទឹកដីខ្លួនផងដែរ៕

អត្ថបទ៖ សុខ សុវណ្ណ