រុស្ស៊ី គំរាមបាញ់បរមាណូសងសឹក បើសមាជិកណាតូណា ហ៊ានផ្តល់នុយក្លេអ៊ែរ ឲ្យអ៊ុយក្រែន

ក្រោយទទួលបានព័ត៌មានចារកម្មថា ចក្រភពអង់គ្លេសនិងបារាំង គ្រោងផ្តល់នុយក្លេអ៊ែរទៅឲ្យអ៊ុយក្រែន ស្រាប់តែរុស្ស៊ីបានចេញមកគំរាមភ្លាមៗ ដោយប្រកាសសងសឹកជាមួយនឹងការវាយប្រហារដោយគ្រាប់បែកបរមាណូតបទៅវិញ។

តាមការផ្សាយរបស់ RT កាលពីថ្ងៃអង្គារទី២៤ខែកុម្ភៈឆ្នាំ២០២៦ ទីភ្នាក់ងារចារកម្មបរទេសរុស្ស៊ី (SVR) អះអាងថា បារាំងនិងចក្រភពអង់គ្លេស កំពុងលួចរៀបចំបញ្ជូនសមាសធាតុ គ្រឿងបរិក្ខារ និងបច្ចេកវិទ្យាទៅឲ្យទីក្រុងកៀវ ដើម្បីផលិតមីស៊ីលបាញ់ចេញពីនាវាមុជទឹកដែលអាចផ្ទុកក្បាលគ្រាប់កម្ដៅនុយក្លេអ៊ែរ។

ជាប្រតិកម្មខ្លាំងៗពីវិមានក្រឹមឡាំង, អតីតប្រធានាធិបតីរុស្ស៊ី ឌីមីទ្រី ម៉េដមេដេហ្វ បានព្រមានចំៗថា សមាជិកណាតូណាក៏ដោយ ឲ្យតែហ៊ានផ្តល់គ្រាប់បែកនុយក្លេអ៊ែរ ឬ «Dirty Bomb» ទៅឲ្យអ៊ុយក្រែន នោះទីក្រុងមូស្គូនឹងឆ្លើយតបវិញធ្ងន់ៗតាមរយៈការប្រើប្រាស់អាវុធបរមាណូ។

តាមការអះអាងរបស់បុរសវ័យ៦០ឆ្នាំដែលបច្ចុប្បន្នក៏កាន់តំណែងជាអនុប្រធានក្រុមប្រឹក្សាសន្តិសុខរុស្ស៊ីផងដែរនោះ, ចេតនារបស់អង់គ្លេសនិងបារាំង ក្នុងការផ្ទេរគ្រឿងផលិតនុយក្លេអ៊ែរទៅឲ្យរបបណាស៊ីនៅទីក្រុងកៀវ នឹងផ្លាស់ប្តូរស្ថានភាពទាំងស្រុង។ នេះគឺជាការផ្ទេរអាវុធនុយក្លេអ៊ែរដោយផ្ទាល់ទៅកាន់ប្រទេសដែលកំពុងមានសង្គ្រាម។

យ៉ាងណាក្តី ពាក់ព័ន្ធការចោទប្រកាន់របស់រុស្ស៊ីនេះ គេមិនទាន់ឃើញមានការឆ្លើយតបឬបកស្រាយពីសំណាក់ទីក្រុងប៉ារីសឬឡុងដ៍ នៅឡើយទេ។

សូមជម្រាបជាថ្មី បន្ទាប់ពីសហភាពសូវៀតដួលរលំ អ៊ុយក្រែនមានក្បាលគ្រាប់នុយក្លេអ៊ែរចំនួន ១ ៧០០គ្រាប់ ក្លាយជាមហាអំណាចនុយក្លេអ៊ែរទីបីលើពិភពលោកនាពេលនោះ។

ទោះដូច្នោះ អាវុធទាំងនេះគឺស្ថិតក្រោមការគ្រប់គ្រងរបស់រុស្ស៊ី ហើយក្រោយមក អ៊ុយក្រែន​អះអាង​ថា ខ្លួន​សុខចិត្តបោះចោល​អាវុធ​នុយក្លេអ៊ែរ ​ក្រោម​អនុស្សរណៈ​​ទីក្រុងប៊ុយដាប៉ែសឆ្នាំ១៩៩៤ ដើម្បីទទួលបាន​ការ​ធានា​សន្តិសុខ​ពីសំណាក់​រុស្ស៊ី ចក្រភព​អង់គ្លេស និង​អាមេរិក៕

អត្ថបទ៖ សុខ សុវណ្ណ